Mizoram hi a nuam, 'a boring hman lo', tih hi tunlai thalai tam tak te Status atangin i lo hmu tawh mai thei. Thil thleng langsar hluai a rawn awm a, ni hnih khat hnuah a dang kan hre thar leh zung zung a, chanchin chhia emaw a tha pawh a tak tak ngaihtuah hman lek lovin a phawvuak ah nuam ti em em in sawi nuam kan ti a, kan titi tui ber a ni zel bawk lah tak a. Thil nuihzatthlak kan zawng a, nuih tur zawngin hun kan hmang liam a ni ber mai. Heng te avang hian mi tam takin 'a boring hman lo', an ti a, kan society a thil thleng kan hre zung zung a, a hmasa ber nih duhna leh lar chakna in kan nun a luah khat ni berin a lang. Heng kan sawi tak te avang hian a zawng a zà in thil hlimawm leh nuihzatthlak lam ringawt kan buaipui tihna a ni lo va, thalai tam zawk te rilru sukthlek hian awn lam a neih chungchang hi tun tum chu i sawi dâwn teh ang.

A hmangtu tam ber thalaite kan ni a, midangte tih ang tih ve zel châkna in kan rilru leh ngaihtuahna a thunun a, midangte neih ang neih ve tumna, a tha lam leh chhe lam pawh ngaihtuah hman tawh lovin mit châkna avangin a bawiah kan tang ta fur a nih hi. Thil ho mai maiin kan nun a luah hneh hle a, thil ho kan ngaihtuah hi a ho hle a ni. Vawi leh khatah nuamsa taka awm kan châk a, kan duh zawng leh châk zawng tih zung zung kan duh a, awlsam taka tih theih zung zung duhna rilru a piang ta zel mai hi eng nge a chhan ni ta ber ang le? Khawvel a hmanhmawh tawh a, khawvel pian ken a ni tih chu hai rual a ni lo. Bengkhawnna, rilru senna leh takna lama kan intlansiak leh chuang lo lai tâk hi kan in enfiahna tur chu a ni. Thil hriat zung zung châkna in kan khat a, kan beng a zà zo tawh a, a nilo lo kan ngaihtuah a, kan zeldin chiam hnuah a lo ni lo leh thin bawk si a.

Heng min thununtu lak ata in lâk hran hi thil harsa tak a tling tawh a, a bawi ata tal chhuak tur chuan tunlai mi nih lohna nun kan neih a ngai. Tih tak takna leh dikna te, rilru senna lam kawngah kan fin a tlai bawk si a, a tha lam kawng chho kan zawh tha peih silo, thil ho mai mai lawm leh thu tak ni lovah hian kan ral mai ang tih erawh thil hlauhawm tak a ni. Kan zavaiin kan ho tlâng tihna ni lovin engkim tan hian hun ruat a awm tih Pathian thu ah pawh kan hmu reng a ni. A nawlpuiin kan thil lawm ho te te a kan ngaih hi kan sawi peih a, kan ngaihven peih chhung chuan a awm reng dâwn a, bengkhawn chin neih hi a tul hle a ni.

Thalai zingah a tam zawkte hian memes leh reels tel lo chuan a khawhar thlak kan ti tawh a, khawharna avanga in awm tleina tur zawng te pawh kan ni ang. A boring hman lo kan tih fo pawh hi nuihzatthlak lam a hawi tlat a, mi lar nih châk avanga mi pangngai lo ang a, lan duh tlatna rilru te, mi bawl te, a tha lo zawnga mi bawl phur te, nuihzatthlak lam hawi zawng ringawt a thil ngaihtuah reng mai kan nih chhung chuan a Boring hman lovang! Kan in cheibawl dan hian kawng a hril thui hle a, keini aia ram changkang te chin dan leh lawm zawng hi kan society hian a la zo ve lo a ni tih hi kan hriat thar a ngai. Hlimhlawp lam do ngawr ngawrna lam a ni lo va, thil reng rengah hian a chin tawk kan hriat hi kan zir thar tur a ni. A zawng a zaa kan hlimpui emaw kan tih hian mi rilru kan hliam thei a, mi bawl leh mi sawisak ringawt zawnga hlim tum kan nihna rilru pawh hi in siamthat kan ngai. A nuihzatthlak tak tak hi a awm, hetiang thil ho leh thil mai mai hi kan ngaihven a, kan lawm tlat chuan kan ti zalen a, tih zel duh châkna rilru kan insiam a, chin tawk hriat lohna in kan nun a ti chhe zel chu a nih hi.

Heng zawng zawng lo thlen chhan chu changkanna vang a ni a, lo thleng tur reng pawh a ni. Social Media kan hman tlâng lawn ber Facebook-ah thil thleng langsar tak post a ni a, rilru nilo pui a tawng chhuak pawp pawp, ngaihdan dik ber emaw ti a, midang ngaichang lek lova tlangau pui phawng phawng kan tam hle a, inzir lawkna nei hek lo le, heng social media te hian kan ram min luh chilh thut a, a thuk tawh hle a ni. Kan rin aiin Media in kan nunah nghawng a neih len tawh zia hi a hmangtute chuan kan hre theuh awm e. In khap theih ni hek lo le, kan nitin nunah a tello in kan khawsa thei tawh lo va, nun tak chu nun lemin a zui a, Social Media in min thunun tlat tawh a, a tello a khawsak chu harsa tawh tak a ni.

A boring hman lo kan tih chhan ber thil thleng langsar leh nuihna tur kan zawn reng karah hian thil tak tak duh leh chin tawk hria thalai eng emaw zat an awm thung. Thil reng reng hi a chhan hriat hmaa lo zeldin chiam te, eng a mah hmaa a chhe thei ang bera in chhuah chhal te hi kan sim a va tha em. Thil nihna dik tak hriat zel hi kan tih tur a ni. Thil ho leh nuihzatthlak ringawt buaipui a nilenga hman kan nih chuan kan in enfiah a tul hle tihna a ni. A chunga kan sawi tak atang hian hetiang lam do ngawr ngawr vang ni lovin a chin tawk hriat hi kan tih tur pawimawh tak leh kan zir tur a ni.