Pêt ngheng hnua a nung ve duh hrâm thin hi chu a zia; mahse, mi naran ni lo ‘tu emaw ni’, sam sei dum hnâp mai; a siam zawh hlima Siamtun a en vang vang pawha, ‘mawi a tih êm êm tûr’ leh amah Siamtu ngei pawn a ‘bêm’ duh hial tûr nulâ; vânneih thil thû tak meuh meuh leh tû ka nih hre chiang hauh loa phurh tûr ka’n hmuh remchân ve hlauh tum hian—he ka scooter (scooty an ti ta vek mai!), a rûm chauh nalh satliah thinlung … ni lo! a khâwl chhûng tàwnzia hi—ka ning hluah hluah thin!

A self starter chhia hian ‘support’ a’n ngah khawp mai a—duhawm tak erawh a váng fú! Kick start a’n ‘chhawm’ pang a. A nun duh chuan loha main stand-a dintîra, a eng emaw ni, a choke an ti emaw ni pawh zauha kick leh vakte pawh hi thil naranah ka la ngai thei mai. Kawng chhuk tlân chânga mite two wheeler khalh anga -engine han off ve lo a, raise (rest kan tih tâk mai) vak ngai thin te pawh hi … a la pangngai tho.

Mahse, khawpui lûn leh traffic jam tamna lai tak maia a thih palh hlau reng renga khawsak hi chu—sim hmak châkawm tak a ni! A’n khawlh thinzia mai chu—traffic jam-ah, ding lui tûra a brake hmet tâng tâng chunga han raise ngat ngat a’n ngai tho ta thinin petrol a hehziate hi ngaih khata ngaih chu thla tin hnâa neih a har duh khawp mai a. A thih hlauh palh hlau chung sia hma lam tawlh tûra raise ngai reng bawk si chunga hnungtawlh (back) a’n ngai tlat—hma lama a tlân tak tak loh nana a brake hmeh ngai tel bawk sia khawsak hi chu—a va’n retheihthlâk bîk ngawih ngawih thin tak!

Brake hmet chunga raise ngai si hahthlâkzia chu kha nula chhe lo êm êm khân hre ve miah loin, ‘Inhmu ila, i scooter hnungah min phur mai ang a,’ tiin kan thiante inneih lawmnaa kal tûrin min sâwm vei a nih kha!

Zan thim hnu thleng kan awm a ngai dâwn tih hre lâwk hek lo; ka khâwl rûm theiin zan lam mit êng (headlight) a chhawm sâ pawh a chhit ên theih loh thute chu WhatsApp lamah hrilh bîk hek suh î—kan insâwm chhuak chu a ni ta mai a.

Inneih lawmna hmun tûr chu kan thleng thla. Parking-na hmun kan thleng. Security ‘cum’ traffic hna kawp pa chuan park tha tûrin min ti; mi dang in park ve luai luai—car changkâng tak takte kârah chuan. Ka thil huphurh a thleng dâwn chiang!

Ani, nulain chhuk tum hek suh—ka scooter chuan tawlh lêt chunga raise vak vak ngaih hun min thlenpui tak tak dâwn ta e… tihah chuan, chhuanlam hrang hrang siamin ka chhuk ‘luihtîr’ thei hrâm a. Tin, kei leh ka scooter awm zêl dân chu min rawn chîk zui lo hlauh chu ka va’n lâwm nasa tak!

Ruai kîl zawh tawh, zan lamah, ‘Duat!’ ti ngam khawpa online-a ka kawm hrep tawh Nula-i hnênah chuan, ‘Hâwna tûr thiante car i hriat chuan…’ ti duai chungin an sawi eng Farm emaw niah chuan kan thiante inneih chu kan lâwm ta a nih kha. Hâw hun—ka huphurh hun chu a thleng! Nula-i zûn phurh chu ka inhuam tehlul vei nên, scooter headlight nei, êng thei si loa phurh chu ka ngam tlat lo! Chu chuan amah chhai zui ka zuam lohna chu a tizual bawk—zan lama ka Ck-pui chhunzawm theih reng tûr chu! ‘Mi dang car-ah bet mai la…’ ka ti zuih ta raih ringawt a; tûm hmãn chungin min kalsan ta a. Nge, ka scooter tâwng zeta a chuan duh vei ni! Chuang kher lo pawn a nih theih ve tho âwm si a…

Kan thawmhnaw leh kan pâwn lam lan dân, kan thlalâk Facebook leh Instagram lama kan târ chhuah thin te hian, a tak takah keimah ngei pawh hi, min phû chiah ang em le? Ka scooter kaw chhûng tàwn ang maia a taka lo tâwng ru ve hi, Mizoram hian a mamawh aia tam thalai min kawl tûn lo’ng maw aw?