Khawvela kan awm chhung hian kan hringnun hi a parvul reng lo va, hlimna leh lawmna kan tawng a, lungngaihna leh mangannain min nang bawk thin. Lawm avangin kan nui a, a hnu lawkah lungngaiin kan tap leh thin. Hlimna chhe te pawh tawng ngai miah lo khawpa mi vanduai chungchuang a awm theih loh a, lungngaihnain a tlakbuak ngai miah loh mi vannei chungchuang lah a awm theih na hek lo.

Hringnun hi kan chhiar thiam chuan vanduaina te hi malsawmna hnar a ni fo a, kan chhiar thiam loh chuan vanduaina hian chhiathlenna khurah min hnuk lut thin. Pa pakhat chuan a nupui a sun a, nupa inngeih tak leh inthlahlel tak an nih avangin a tuar em em a, a lungleng lutuk chuan awm ngaihna a hre lo hial a ni. A rilru na chhawkna tur a nih beiseiin zu a in tan ta a, a in tam tial tial a, a harhfim apiangin a rilru natna a zual zel a, a tawpah a in in hlum ta a ni. Pa pakhat nupui sun ve thung chuan a khawhar leh lunglen zual lai takin a rilru ruak hnawhkhah nan lehkhabu a ziak ta thung a, inleng a neih loh lai leh a hunawlah chuan lungngaia indawmkun mai loin lehkhabu chu a ziak chhunzawm zel a, ni leh thla a lo ral a, a lunglenna pawh a zia hret hret a, lusun te tana inhnemna leh inkaihhruaina lehkhabu tha tak a ziak ta bawk a ni. 

Bible a fapa tlanbo pawh kha a tlanbona lamah khan a va boral teuh em! A neih zawng zawng a khawhral hnuah tamin a nang a, mi hnuaiah a inhlawh a, vawk chaw mai mai pawh ei chakin a en ngawih ngawih mai a ni. Fapa tlanbo kha tumahin an counselling lo a, camping-ah a lut hek lo. A pa, a hawn hun nghaka nitina lo thir thintu lah khan a tlanbona thleng thleng khan a umzui chuang bawk si lo. Amaherawhchu, he fapa tlanbo hi a inngaihhtuah harh ta hlawl a, a thu chhuak hlawl a, ‘Ka tho vang a, ka pa hnenah ka kal teh ang” a ti a, a tho a, a kal ta liah liah mai a ni. A pa chuan lawm takin a lo dawngsawng a, nun bul a tan thar leh thei ta a ni. He fapa tlanbo hi tumahin an chhanchhuak lo a, amah leh amah a inngaihtuah harh a, amah leh amah a inchhanchhuak a ni. A tan englai pawhin kawng hawnin awm reng mahse a inngaihtuah harh a, a thawh a, a kal hma loh chuan kawng hawnin a tan awmzia a awm chuang lo.

Nu pakhat chuan zu zuarin ei a zawng thin a. Kum tam tak hnuah chuan a eizawnna, zu zawrh hna chu kalsan a, nun thara nun a duh ta a. Chutiang rilru a put lai chuan vanneihthlak takin an vengah gospel camping an buatsaih a, a lut ve ta a ni. Camping-a a luh dawn chuan chu nu chuan a zu bel a ti ruak vek a, amah dawr thintute hnenah chuan, ‘Camping-ah ka lut ang a, ka piangthar tawh dawn. Ka inah zu in in thei tawh lo ang” a ti a, thenkhat chuan an nuihzat deuh a. Mahse, he nu hian pianthar a tum em a, huaisen taka a tum tlatna chu Pathianin mal a sawm a, camping a chhuah atang chuan zu zawrh a bansan ta vang vang a, tun thlengin zu a zuar leh ta lo. A rilru paukhauhna, a tumruhna chu chunglamin mal a sawm a ni. 

Zawlnei Jeremia kha Pathianin hna pawimawh tak thawk tura a koh khan a huphurh hle mai a, “Thu ka sawi thiam lo, ka naupang si” tiin phat a tum ngial a, a tirtu Pathian lah chuan a tir lui tlat mai bawk si. Khati taka huphurh chu a tirtu khan, ‘Zam reng reng suh. Huaisennain ka thuam dawn che a lawm’ a ti chuang bawk si lo. Chu ahnehin Pathian chuan, “An hmaah zam suh ang che; chuti lo chuan an hmaah ka ti zam ang che” a ti hmiah mai si. Jeremia tan duhthlan tur dang a awm ta lo. Amah leh amah a intih chak a, a intih huaisen a, zam lo tura a intih paukhauh mai a tul ta a ni. Huaisenna thuam inbelin a hmaa tih tur awm chu a tawn tlang a, hna (mission) ropui tak chu a hlen ta a, Pathian zawlnei ropui a lo ni ta a ni.

Kan awm mai mai hi Pathian hian min ti huaisen ngawt dawn lo a, min thuam thar ngawt dawn lo a, min khaichhuak ngawt dawn na hek lo. A khaichhuah theih tura a lama ban kan phar ve a ngai a ni. Chunglam malsawmna dawng tur hian a dawnthleng hian a zir ve a ngai a, malsawmna dawn thleng a khaikhupa tlat chuan chunglam tan malsawm ngaihna a awm lo ve bawk a ni. Chepa thang awkin ‘Ka awk ta sa sa’ tia talchhuah tum miah loa a in awh tir reng anga vanduaina hi kan inbawhbeh tir reng a, talchhuah kan tum loh chuan kan bet kumkhua mai ang. Chutih rualin vanduaina hi nun bul tan tharna rahbiah kan hman a, hma lam pan tura kan intih paukhauh a, kan intih huaisen chuan malsawmna pawh kan tawng baw leh ngei ang.