Nula pakhat, mahni anpui ngaizawng thin hian a nun thlak a duh a. Ama anpui ngaihzawn a duh tawh lo. A chhan ka zawh chuan, “A ho tlat!” tiin min chhang nia! Mahni nihna mil loa nun hi a tawpah a ho tlat duh fo reng a ni. Nunna hlu tak ho taka khawhralna a ni duh khawp mai. Mahni inhriat chian a, mahni nihna pawm a, chumi azira nun hman a, hmasawn tumna nei chunga mahni inzahpui loh hi hlimna bul pawimawh tak a ni. Mi fing chuan tunge a nih a inhre chiang a, a thiam zawng leh thiam loh zawngte a hria a, a chakna leh chak lohna a hrechiang a, chumi mil chuan a tihtur a thlang a, a nun kaihruaituah a hmang thin. A thiam zawng a hmang tangkai a, a thiam loh zir belh a tum a, hma a sawn a, a hlim mai thin. Rilru lam enkawlna kawnga tehfung pawimawh tak kan hman fo chu, ‘insight a nei em? amah a inhre chiang em?’ tih hi a ni. Mi thenkhat chuan an mahni nihna miah lo ni tlatin an inhria a, an nihna ni miah lo chu nunpui an tum a, thil dik miah lote chu dik tlat emaw tiin an buai a. Ngaihdan dik lo leh hriat dan dik loh an neihte chu an tan chuan ‘a dik’ tlat avangin an nun a buai a, enkawl an ngai fo. Mi thenkhat chuan an nihna leh nih lohna chu an hrethiam tho a, mahse an nihna angin an nung lo a, an nun a buai tho bawk. An nihna an zahpui avang te, mi dang bum duh avangtein an nihna an thup a, an nihna lo anga lan an tum fo. Khawvelah hian keimahni ang chiah hi pakhatmah an awm lo a. Pathianin a bika a siam theuh kan ni. ‘Special’ tak vek kan ni maw le! Chutih lai chuan mahni inhmuhniam, mi dang pha lo leh tluk lo, nep bika inngai kan awm fo. Mahni inhmuhniam a, mahni inhmusitte nun hi a hlim thei lo. Mi tin hian thiam zawng leh thatna kan lo nei theuh. Mi dang nen hian kan intehkhin mawl satliah a, kan buk lung khai a dik lo a, tehfung dik loin kan inteh a, kan nun a buai a, kan hlim loh phah fo. Mi dang nen inkhaikhin mawl satliah ngawt lovin kan tih theih tawk theuhah theihtawp chhuah thin ila. Mahni hlutna hre chungin, mi dang dah hniam hauh si lo leh hmusit hauh lovin hmasawn tum mai ila, kan hlim ang a, kan nun kawng a buai dawn lo alawm! Kan ramah hian mahni nihna hre chiang loa nung ve mai mai, thli chhem zawnga awn dual dual, ze nghet leh kalphung nghet vawn tlat nei lo kan tam viau ang em? Mahni nihna hre reng chunga chutianga nung duh si lo, kan tih ve atana mawi lo pawh ti ve duh zel, kan rilru chhungrilin tih a duh loh pawh ‘mihring chak lohna’ chhuanlama hmanga ti ve mai duh zel kan tam viau ang em? Mahni nihna haia an nihna lo pui anga nungte hi han hlim ve viauin lang thin mahse a tawpah an nun a buai tho thin. An ho tlat zel! — Dr. Hrekima