Covid hripui len hnuah hian inlaichinna tha siam nana pawimawh tak leh kan puithunain a ken tel pakhat, ‘inchibai’ hi kan ching ta lo a. Kohhran serh leh sanga bet telte pawh a ni ve deuh asin maw le! Thil thleng kan chhinchhiahna lehkhabuah pawh, “Inpawlna kut ding lam pein,” tia ziak chi kan nih thinte kha a tibuai ta deuh roh a.

28.8.21 a Bial inkhawmpui kan neihnaah pawh, Bial Chairman an inthlak hunah inchibai tur nge tur loh tih an buai deuh a. Min rawn ve a. “Inchibai se la, khual chhawn zinga mi tu emaw kha lo awm hnai se la, an inchibai zawhah an kut inphuh thianghlimsak nghal dawn nia,” ka ti a. Ka sawi ang thlapin an ti ngei a. Mahse, kut an phuhna kha a bur te chi, han hmeh pawha ri set chauh mai chite kha a nia, ka duh tawk lo khawp mai a. Ka ding hnai bawk a, mi dang hriat phak lohin, “Phuh belh leh rawh,” tiin ka phuh huh belhtir a. 

Ni 10.10.21 khan Presbytery Inkhawmpuiah ka tel leh a. Upa nemngheh inkhawmah inchibai tur a ni em tih thlengin rorelnaah sawi a ngai ta bawk. He hripui zet hian ngaihtuah tur a va titam tak aw! 

Chu khawmpuiah chuan khualchhawn nula leh tlangvalten an tihtur an hre em em mai a, an zei thlap mai. Rorelnaa tawngrinna kan inhmantawm zawhah kut min phuh faisak thlap zel! An phuh huh hneh lo leh deuh mai pawh a! Ka dil belh nghe nghe. 

Hripui kai loh nana kan tih tur hi kan hre vek tawh a,  kan fimkhur viau vek mai. Mahse, hripui kai kan awm zel a. A kaite han bia ila, an fimkhurzia thu kan hre ziah bawk.

Inkhawmpuinaah pawh kan fimkhur a, tih tur chu kan ti vek mai. Mahse, kan tih dan hi a dik kim tha tawk em tihte ka ngaihtuah zui ta a. Kut kan sil leh kan tihthianghlim hian kan lo tilap lutuk thei dawn a nih hi. 

Nikum lama zirtirna pea kan zin kual khan khaw thenkhatah chuan, “Kut sil fai a ngai, inchibai loh tur,” kan tih chhan kha, Covid hrik paite taksa chhunga hrik kha, kut hmawrah te, vunah te lo chhuaka khawihna lai apianga bet tuar zel mai thin emaw an lo ti a. Chutiang chu a ni lo e. Kan kut hi a hlei em a, engkim kan khawih a. Khawi lai emawa mi chil per atanga hri tla kan khawih fuh emaw, kan hmui hmai kan tuaina atanga kan kuta hri kai emaw kha, tu kutah emaw kan va tat ang a, anni kut hlei ve bawk khan, an ka, an hnar, an mit an lo nuai ve ang a. Chung lai vun no bikah chuan hrik te kha a lut thei ta bik si a, chuvang chuan ‘kut sil that tur, inchibai loh tur’ an ti a ni zawk. 

Hrik tihlum tur khawpa kut sil dan dik hi a awm thung. Kut kan sil hian, kut zungtang zawng zawng leh a inkar zawng zawng, kut phah hma lam leh hnung lam zawng hi sahbawnin a hneh hle tur a ni. Second 20 chhung tal nuai phawn kim suah suah tur a ni.

Mi tam tak kut sil hi chuan kut kan tihuh puat a. Sahbawn kan khawih zeuh a, kan nuai zuai a, a nal reh tur tawk velin kan tleuh leh puat thin. Kut pawh a huh kim ngai lo fo. Kut tihthianghlimna pawhin kan phuh set chauh mai fo. Chutiang lek chuan Covid hrik a tihlum lo thei tlat a ni. 

Kut tihthianghlimna (hand sanitizer) kan hman pawhin kut sil ang thoa uluk a ngai. Hneh taka phuhin, a huh zuih tur a ni a, kan kut kum kar zawng zawng a huh kim hle tur a ni a, kut sil ang chiahin kan nuai kim tur a ni.

“Kut ka sil ziah, tihfaina ka hmang ziah,” kan tih hian, kan sil kim em tih te, a rei tawk em tih te, a huh kim em tih tihte hi ngaihtuah tel tur a ni.

Covid kai loh nan ni kher lo pawhin kut sil fai fo hi a hrisel hrim hrim a nia. Kim takin, hneh takin sil ang aw! A tihthianghlimna kan hman pawhin, huh zuihin aw niang! Vengchhak tuitai pût ang pûrin le!