'Ka Huang’ hungna hi thiah ka’n sawi thin tak na a, tu emawte hian, “Titawp suh, kan chhiar châk, Zalen ka lak chhan chu KA HUANG,” tia min rawn phone-te hi an lo awm veleh angreng bawk si a. A ngaihna tak pawh ka hre thiam lo e. Hei tun tum chu kan han hung leh ta phawt chu a nia.

Tun tum chu Khua leh Veng hming an phuah dan ka hriat tlem azawng ka’n sawi ang e. Aizawl veng vel hi aw.

Chaltlang: hi Châlte (Mau tak ang deuh) hmun a nih thin avanga Chaltlang hming pu a nih a rinawm. thangthar Châlte hmu lo leh hre lo kan tam tawh ka ring. Châl chu mau tak ang deuh, mau tak aia te leh pan a ni. Hmanlai chuan ceiling-ah te an hmang thin.

Chandmary (Chanmari): hi chu Assam Rifles-ho silai kah zirna a ni. Chand chu thla (moon) tihna mai a ni.

KHATA (Vai hmeichhe veng): Mi tam ber hi chuan tun thlengin KHATLA kan tiin ka hria. Pu H.K.Hleia min hrilh danin gorkhali tawng a ni a, Khata tih chu (kha tihna ni maw). Hmanlai Assam Rifles khan an darbak ilo-ah savun dum an hman thin avang khan chu an sipai thuam nawh tlet nan chuan a tha em em mai a, chuta tanga Khata ti an ni a ti. Keini Mission Veng vel kha chuan Vai Hmeichhe Veng kan ti mai thin, Vai hmeichhe damdawi inte pawh a awm nghe nghe kha.

Republic Veng: Hei hi chu a hming atang hian a hriat mai a, Republic Day khan Pu Mena hoin a kawng hi kan lai a ni. Kan intlar put a, Pu Mena (E.L.Mendus) khan a chek hmasa ber a, kan lai ta a ni. Kei pawh ka tel ve nghe nghe.

New Street: Hetah hian hman laiin in a awm ngai lo. Mission sikul naupang (hmeichhia) puantah zirna in kawng thlang lamah a awm a, chu chauh chu in awm a ni. A thlang lamah chuan Tuikhuah tlanga tuikhuahna tur, a mawngphah atan lei an rawh chang a, pachang lu tiat tiatin, chu chu a mawngphahah an hmang a ni tih Pu Lalkhuma’n min hrilh. Chung lei hlum rawhna chu kawngpui thlang lamah khian a khuar thluah thin.

Mission Veng leh Dawrkai Veng khi chu a hriat mai a, Mission Veng Biak in thlang khi Ngawivung Ruam tih a ni. A phuahtu chu Pu Saia (Lord Robert inti thin kha) a ni. A phuah chhan chu Khrismas hi Mission Venglai mual leh dawrkai Veng hian an tihrang kum tin thin. Ngawivung Ruam kan tih tak khian an tihrang ve ta a, tlaivar khawpa zai tui tham la awm hek lo, a reh duk mai a, chuvang chuan Pu Saivbutua chuan NGAWIVUNG RUAM tiin a phuah a, tun thlengin hman a ni ta a nih khi.