Kum 2007-a Zonet Cable TV-in a vawi khat nána Mizo Idol thlanna a buatsaihah khán, Saiha mipa naupang tih mai tùr, Hmingtea leh Chhinga véng tleirãwl, Remkimi Cherput te aw special zia kha kan la hre theuh àwm e. Mizo Idol dinhmun luah zo lo mah se, hming chher berte zínga mi, an tih ngam hial ang. Anni thian dùn khân, intihsiakna an neih lai khân hming vawrh làr deuh an nei a; chu chu, lang lo lama mi tangkai, an mentor, ‘U Mangheta,’ an tih sek thin, kan sawi lai JH Mangheta hi a ni.

Hmingtea kha kan lamhnai, Pu A Rohnuna te inah a thleng a. Pu Rohnuna tupa, Hmingthana khân enpui tùrin min ngèn a. A hnuah Pu Rohnuna nupui, U Lalhmai (Fam) khân kan inah a rawn kalpui a, kha kha kan bul tanna a ni,’ tiin Mangheta chuan Hmingtea Chhangte bul a tan pui dàn a sawi.

Tùna Bethlehem vénga a nupui nèna khawsa mék Hmingtea Chhangte chuan Mangheta chu a hla sak tùr thlanpuitu a nih piah lamah, zai dàn thlenga zirtírtu a nih thu a sawi a, ‘Zing kârah leh zànah kan kal thìn a. Ani bâkah U Adama leh U Victor-a (Even Flow guitarist) ten min pui nasa hle bâwk,’ Hmingtea chuan a ti. Mangheta chu music hria leh thiam a tih thu sawiin, ‘Tum khat pawh, hla muang chi deuh hlîr ka sak avàngin ka tla hniam deuh a. U Mangheta chuan chawpchilh takin, Rock n Roll hla, “A Pawi Ngei Ang” tih kha a phuah a. Cháng khatna leh a thunawn a phuah zo a, kan zir phawt a. A hnuah a cháng dang a phuah belh leh a…” a ti. Mizo Idol intihsiaknaah khân Mangheta hla pathum: kan sawi tâk,  “A Pawi Ngei Ang” te, “Ka Beisei Ang Chhandamna” tih leh Mizo Idol tho Jerry-a rawn sak làr leh, “Thlarauin Min Hruai Rawh” tihte a sa a ni.

Intihsiakna an neih laia a chauh thin thu sawiin, ‘Drip te khai ka ngai hial thìn a, chûngah pawh chuan U Mangheta hian min buaipui vek thìn,’ tiin tûna Shalom-a Youth mobiliser hna thawk mék Hmingtea chuan a sawi bawk. 

Top 20 vêlah a thiannu Remkimi Cherput chuan Mangheta hi a bèl ve bawk a. Kim Kimi pawh hi Mangheta hian hla thlanpuiin a tàwp thleng a pui bawk. ‘A rawn kal hmasak ber tumin a nutein a rawn hruai a. “Beautiful Angel” music video ka siam mai mai kha a ngaithla a. “E he! U Manghet, i phuah e law? Ka lo sa chhin,” tiin sak min díl a. A key ka siam thatsak (ka sàn) a. Video-in ka record a. Mahse, a audio chauh ka la chhuak a, thiante ka thawn a. Kha kha a nia, darh (viral) ta kha. A vawi khat sak mai maina, hla thu pawh en loa a sak a nih kha… ’ Mangheta chuan a ti. ‘A aw a dangdaiin a mawi a, music a man bawk si a, hla enpui pawh a nuam,’ tiin Mangheta chuan Remkimi Cherput a hmuh dàn a sawi.

Mizo Idol Hmangaihi phèna mi, Mangheta

Mizo Idol 2022 atána T Vanlalhmangaihi thlan a nih khán a thlangtute mai ni lo, mipuite pawh kan inlungrual tláng hle, ti ila kan sawi sual àwm lo e. Neuhof School, Chanmari-a a zirlai hlui Hmangaihi hi Mangheta hian enpui lo ta se, hetiang dinhmun hi a thleng zo ang em aw … ka ti vawng vawng hial—Mangheta a pan hmasak ber zàn, August 9, 2022, zàn dár 9.00-a “Hmangaihna Khingbai” a sak chhin, Mangheta’n a record kha min ngaihthlâktír khanglang a nih kha!

Mangheta chuan, ‘Kei akárah, nikum 2022 Mizo Idol-ah khán hla enpui (mentor) tùra sàwmna ka dawng nasa ve khawp mai a. Mahse, tù mah puih ka tum lo bur a. Insawi theihna ni lo se, mi 20 vêl chu ka hnar hial ang!’ tiin Mizo Idol-a inhnamhnawih a tum loh thu a sawi a. ‘Mahse, a mak lutuk, Hmangaihi rawn kal hma lawk khán, a záwnin zan hnih ka che chhia a. Tùn hma paw’n Pathian hian keimaha eng emaw thil thlentír a duh hian, thil tha lo hi a thlen hmasaktír ziah thìn a. Hemi tum pawh hian, ka chungah eng emaw tak thlentír a duh a nih ka ring a; A hnênah ka hlàn a. Hetiang hi Pathianin a lo tum lâwk ve rêng a ni,’ Mangheta chuan a ti.

A chêt chhiatna chanchin, Mangheta hian heti hian a sawi: ‘A hmasa zâwk chu kan band (Even Flow)-in The Warehouse Café, Falkland-ah concert kan siam a. Sound thar an nei tih hre loin kan sound kan keng bâwr lúk a. Red Rose pheiah lei min a hlauhawm avàngin Bawngkawn via Helipad lamah kan kal a. Kan tlai têp; kan tan dáwnin kan in-fit fel hman tâwk tih vêl a ni. Sound check pawh kan nei hman lo. Tichuan, sound kha a chiang thei ta rêng rêng lo mai a; mi khân min dem rawn vek a ni.

‘A zan leh Pathianni zànah, Robert Lalduhzuala official channel-ah, Pi Liandingpuii programme kha live tùr a ni a. Ani kha ka studio atanga zai tùr a ni. Sound check ka neih duh ringin inkhâwm pawh inkhâwm loin a fanu nèn an lo phei a. A hma chiahin fuh êm êmin Maruati kan live tawh a. Chutiang chiah chuan sound ka set-up leh vek a; mahse, thil ho tê ka tih sual avàngin a fuh thei ta tlat si lo a… Chutiang vêl chu a ni.’  

Mizo Idol 2022 Hmangaihi chuan Mangheta nèna bul an tan dàn heti hian a sawi: ‘Audition round ka patlang chiah khân Neuhof-a kan music teacher, Sir Malawma ka ráwn a, Sir Mangheta be tùrin min ti a. Ani a buai si. ’Bâkah mi tam tak a lo hnar tawh tih ka hria a; hreh tak chungin ka be ta a. “Lo kal chhin phawt la,” min ti ta hlauh a…’ tiin.

Mangheta chuan hla a thlan sak a ni ngawt lo a, a ‘aw a siam-sak’ hmasa phawt a ni ber. Hmangaihi chuan an hla zir dàn sawiin, ‘Mî zirtír dàn bîk riau kha a nei a. A tih ang ang khán ka ti mai a. A lam dàn tùr zawng zawng—aw tih puam leh a hla thu azira tih pherh dànte mai zirtír a. A tawng ringawt paw’n kan zir nasa. “Kan zir leh hma chuan hetiang hlîr hian lo tawng rawh,” te min ti a. Kalna apiangah a tih ang zêlin ka ti tawp a ni mai,’ a ti.

‘Music ka ngaithlâk nasat zual phah a … a bîkin Norah Jones, “Come Away With Me” album phei kha chu ka ngaithla reng a ni mai,’ Hmangaihi chuan a ti a. Kings & Prophets-a thawk thìn, Mess-a hla thlansak, “Hmangaihna Khingbai” pawh Zodi-ho sak a ni tih Mangheta chuan Hmangaihi hi hrilhin a sap hla thlûk ang deuh (a vibe ang) ngaithla chunga inzirtír an nih thu Hmangaihi hian a sawi bawk. A zai dànah eng emaw chen chu Norah Jones zai dàn a lâk thu a sawi hreh lo a, ‘A zai kha ka ngaihthlâk tam ber leh ka zir ber a ni si alãwm,’ a ti mai. ‘Sir Mangheta ka pan chhan pakhat pawh, hla thlan àwm ka hriat thlâwt loh vàng a ni; min ráwn chungin hla min thlansak thìn,’ a ti bawk.

‘Sir chu a fel a. Amah hi a creative over ka ti tawp a. A music produce te hi a dangdai a, a changkãng vek. Thil a hre zau a. Music bâkah hringnun zirlai ang chi, thu tha min hrilh nasa a, amah ka pan hian ka hãw thlàwn ngai lo. A hnên atangin thil tam tak ka zir chhuak,’ tiin tûna MA IInd Semester exam hmabâk mêk, Mizo Idol 2022 T Vanlalhmangaihi chuan amah hrualtu Mangheta a hmuh dàn a sawi bawk a ni.