Nikum 2019-a Mizoram Remna Ni lawmna, Vana Pa hall-a neih kha tun hnai khan Zonet Zawlbuk channel-ah an rawn ti chhuak leh a, khami tuma Chief Secretary hlui, Mizoram sawrkar aiawha Remna thuthung sign-tu, Pu Lalkhama’n ram hruaitute a fuihna kha a tha hle mai. Chief Minister leh Minister te mawhphurhna sanzia sawiin, vaibelchhe sing tel enkawltu, managing director lian an nih thu a sawi a. Vision mumal tak, hmasawnna kawnga inkhaihhruai tum dan mumal tak nei sa tan lo chuan Minister leh Chief Minister nih tum ngawt mai hi thil fuh ber a ni lo.

MLA nih hrim hrim te, vawi khat pian manah Minister nih hrim hrim te, Chief Minister nih hrim hrim te hi hi kan politician te tum pul pui ber a ni ta mai em? MLA nih te, MP nih te, Minister nih hrim hrimte hi hlawhtlinna ropui takah kan ngai nghal mai em ni? Minister pawh ni raw sek sek, Chief Minister pawh ni raw sek sek, a hun chhunga hmasawnna lian tham a then loh a, a rorelsak mipuite an retheih ngaia an retheih reng si chuan ram hruaitu hlawhtling a ni thei dawn em ni? MLA leh Minister meuh ni pha, ram tana ro hlu engmah hnutchhiah nei chuang lo, an term tawp ruala mipuiin kan theihnghilh zui nghal mai hi an tam fu tawh lo maw?

Chief Minster hlawhtlinna chu a hnathawh atangin, a ram kaihhruai dan atangin kan teh tur a ni dawn lawm ni? Dinhmun sang taka ding a, kum tin vaibelchhe sing tel chalai thintu chuan kum 5 chhungin ram tana rotling engzat nge hnutchhiah a neih? A rorel chhungin mipui nawlpui dinhmun a tha sawt em? Mi tin sum lak luh (per capita income) a pung sawt em? Ei leh barah kan in todelh sawt em? Power-ah kan in todelh em? A rorelna hnuaiah mipui kan ralmuang em? Mipui kan hlim tlang em? Rethei leh hausa inkar a zim tial tial nge a zau tial tial? A sawrkar chu huapzo sawrkar a ni tak zet em? Nge, party mi leh sa, unit leh block hruaitu chin chauh tlaktlumna sawrkar? Heng te hi ram hruaitu tha kan tehna tur (criteria) pawimawh tak te chu an ni.

Minister a ni emaw, Chief Minister pawh ni se, a term chhunga a rorel sak mipui nawlpui dinhmun chawikan a nih si loh chuan ram hruaitu hlawhchham a ni tho tho. An dinhmun sang tak leh thuneihna sang tak chu a tha lamin emaw, a nih tur angin a hmang chhuak zo lo tihna a ni. Pu Lalkhama tawngkam takin, Tingtang tha tak leh man to tak hi a neitu tur dik tak, music thiam takin a enkawl chuan zai mawi tak rem nan a hmang a, rimawi ngaihnawm tak a chhuah thin. Chu tingtang vek chu music thiam lo leh a ngaihna hre lo, ‘D’ key pawh hmet thiam thathum loin a kawl tlat chuan a nih tur angin a hmang chhuak lo hle ang. A changin a key a la sang lutuk ang a, mipuiin kan zai pui thei lo ang. A changin a la hniam leh lutuk ang a, kan phun kan phun ang. Eng vang nge? Tingtang thiam loh ni loin a tumtu thiam loh liau liau a ni. State Chief Minister theuh theuh, India constitution hnuaia thuneihna inang theuh theuh, an tingtang tum hi a in mawih hleih deuh chu a ni. Awmze neia tawtawrawt a rik loh chuan engtin nge sipaiin ral an do theih ang?

Sawi leh sawi hnu, ram hruaitu chuan vision mumal tak a nei tur a ni a, a ram kaihhruai tum danah a chiang hle tur a ni. Chu a vision ti hlawhtling tur chuan Chief Minister nih te, Minister nih te a tum chauh tur a ni zawk. Abraham Lincoln chuan mihring leh mihring sala in chhawr kha thil dik lo hul hual, mihring dikna chanvo (human rights) bawhchhiatna lian takah a ngai a. Sal chhuah zalen duhna chuan a thinlung a luah hneh em em a, an ram President a nih loh chuan sal a chhuah zalen thei dawn si lo. Chu a thil tum chiang tak (clear cut vision) tihlawhtling tur chuan President nih a tum ta ngat ngat a, a tawpah a hlawhtling ta. President a nih tuk atangin a thil tum ti hlawhtling turin ke a pen nghal chal char a, car man to tih te, lakluh inkhawm ropui tih velah a buai hman lo. Lehkhabu tlangzarhnaah a tel hman lo a, khuallianah a tang hman ngang lo a ni. A thawhrimna leh huaisenna avangin a tawpah sal te’n zalenna kawl eng an hmu ta. George Washington-a hun lai emaw Benjamin Franklin-a hun lai pawh khan salte kha chhuah zalen lo ni tawh se, Abraham Lincoln khan US President nih kha a tum buai kher lo ang. Hruaitu tha chuan thil tum a nei a, chu a thil tum ti hlawhtling tur chuan a lalthuthleng chu hmanruaah a hmang mai a ni zawk.

Kan ramah hian kan politician te hian vision ti hlawhtling tura hruaitu nih tum aiin tlin hrim hrim te, MLA nih hrim hrim te, Minister nih hrim hrim te, Chief Minister nih hrim hrim te hi an khel ta mai em ni? ‘Manifesto te chu kan in ziah mawi siak mai mai’ tih te, ‘Kum sawm ka CM chhung kha inzir nan ka hmang’ tih te hi a zan kal tawngkam deuh lo maw? Heng hi an rilru a nih pawhin mipui hmaah chuan sawi chhuak kher lo se a tha zawk tur. Kan ram hruaitute hian dik tak leh huaisen takin rorel se, thil tha ti se, an rorelna hnuaiah ram ralmuang se, intodelhna kawng zawh ila, inthlan leh hunah an campaign buai ngai miah loin kan thlang tling zel mai tur. ‘Ka chawl tawh ang e’ an tih pawhin mipui zawk hian, “La ni hram rawh khai” ti zawk ila, an chawl tur pawh uai bet hram hram ila, kan ram chu a va nuam dawn em!