Nikum atang tawhin kan buai tawh, tûnah pawh kan la buai mup mup reng tho—hripui lêng vâng hian. Nikum kum tâwp lam leh kumin kum tîr lamah thâw kan han la ve zawk a; mahse, ‘a thawh hnihna’ an tih chuan min han nuai ta sak a; nunna a heh hle. He thu ziah lai thleng hian kan ramah mi 100 dâwnin nunna an chân ta reng mai!

Kâmding lo tân chuan ei zawnna a buai lehzual. A bîkin ni tina inhlawh chawpte tân a harsa tak zet. Sumdâwngte paw’n an thil zawrh lai an dah hmuar zo a; an chaw bêl ve ber, hralh tûra branded pheikhawk an tlar thutte pawh an khir erh uarh zo ta. Mistiri te paw’n, an â-ra leh chhêni tui êk mai tûr an vên a ngai tan ta a, passenger-te fare tling khâwma in luah man pe thin leh fate sikul fee chawi thin tân phei chuan khaw hawi a tawi tup ta mai. Chow artui chhip chhuan leh sanpiau te, chicken biryani leh sawhchiar hmanga chhûngkaw châwm thin tân phei chuan, inhawn nî a her chhuak thei si lo! Chuti maia sumdâwnna dang melha, sum dawnna tûr dang ngaihtuah ngawt theih a ni bawk si lo. Ni khat inhralhna hlêp, a sînga sîng, a nuaia nuai hmu chhuak thin sumdâwnna lian kalpui thinte tân paw’n, maian tel khat man a to zo ta! Second hand dâwr leh designer’s wear zawrhna dâwr te chu kan inang ta pát ta mai a nih hi! Beauty Parlour atang mawi chhuaha pàr thar vuh lah thil harsa a ni vek tawh! Kan pangngai ta lo! Kan pangngai lohna hi kan pangngai chhohpui a ngai ta a ni tawh zâwk mah âwm e!

Hetia kan Aizâwl khawpuiin harsatna kan tawh mêk lai, chawhmeh leina man nei zo êm êmte paw’n chawhmeh lei tûr an hmuh zawh loh lai hian Zokhaw lama kan unauten an thlai thar chhuah liau liau, sum tam tak man tûr chu a thlâwnin min rawn pe ta thin a. Phût lêt nei miah loa hetianga an luan chhuahna leh an inpêkna ropui tak hi fak loa ngawih bopui atân chuan kei chuan pamhmai ka ti tak zet a ni.

Chuang tûr mipui ber chhuah khapa taxi leh bus tlântîr ang maia pawisa nei paw’n chawhmeh lei tûr an hmuh zawh loh lai hian kan unaute luan chhuahna ang hi, mi ramah chîng ve awm tak ang maw? A khai! An awmin ka ring lo! Vaiho phei chu… an zia-in ‘a chhawm’ lo; ‘A support ve lo!’ tiin sawi ta ila, kan hre thiam zâwk mah âwm e a! Zokhaw lama thlai thartute thil tih hi a Mizo êm êm a, a Mizo hliah hliah a ni.

‘He rilru, Mizo nuna awm bawk kha, nangmahniah awm  rawh se. Anni zawngin…’ tih lam hawia sermon zuk thlâk chiam chi pawh a ni lo ang, an thiam chuang lo ang—vaiho khu chuan!

‘Sem sem dam dam, ei bil thi thi’ nihna dik tak hi, kan tu leh fa, Mizo tawnga tawng peih tawh mang lote hnêna tuh harsa kan ti tan viau a nih paw’n … hei le, a takin kan unauten, an chawhmeh thar chhuah hmangin entîrna min rawn pe e. He bâka chianga hrilh fiah hi a harsa tawh ang. La hre thiam duh lo fâ emaw, a hlutzia la hmu thiam duh lo lui Mizo thlah kan awm a nih chuan, chu mî chu Mizo-a a piang hi inchhîr rawh se!

Heta kan lo khul … pawh ni loa a thlâwn liau liaua a dawna kan lo dawn min petute hi mi hausa leh mi awm thei an ni hauh lo ang. Mi tam takin an eizawn vena ber, an thlai thar chu, hri lêng kâra inkhârkhipa awmte tân, a thlâwnin min rawn pe a nih hi! Ngaihtuah chian hian, a lâwmawm dân hian hnuk a ti ulh thei hial asin! Peih rêng vâng pawh ni loa nun khaw chhuaha intun din nâna an hman ve ber chu, ruah sûr leh vangvat kârah ‘mi dang tân’ tiin, khaw hrang hrangin an rawn theh chhuak ta thin a nia! An thil tih hi a tê lo a, a thlâwna an thil tih ‘rate’ hi a hniam thei lo—thinlung atanga thil ti an ni tlat a! Pathian mitah phei chuan hmuhnawm ropui a va’n tling dâwn êm!

Tin, Zokhaw lama awm, lo leh huan nei ve lo, sawrkar hna thawkte leh VC hial te, khaw thenawma awmte thleng thleng paw’n, hêng thlai tharte hi an lo leisak ve leh chhâwng thin. Chûng an thlai thar leite chu pum hmawm mai bîk loin Aizâwl lama thawn tûrah an thawh ve leh thin a nih chu! Hêng thu hriatte hi a va’n nuam tak êm! An sem tûr vêng pawh duh duh thlang mai loin kan mamawh dân te zir hmasa-in tanpuina hi min rawn pe thin a ni, tih te; khaw thenkhat chuan ‘fair’ takin, an thlai thar semna tûr vêng hi an pawt thin… tih thâwm hriatte hian, rilru uap cherh churh a vai kiang a, thâwk lâk a tih nawm phah thin.

A lo dawngtu vêngte paw’n chawhmeh min petute hi kut ruaka hâwtîr mai tum loin, an theih ang ang, lâwmthu sawi nân – sum fai leh ‘vai chawhmeh’ (dal, alu, purûn, chini, adt.) an pe lêt ve leh thin a. Hêng te hi hriat a nuamin a ngaihnawm tak zet a, a  va han ‘Mizo’ hliah hliah tak êm aw…

Harsatna tak tak kan tawh hian mi dang kan mamawhna a lang chhuak thin a. Chumi hunah chuan Mizo tlâwmngaihna leh mi dangte tanpui duhna rilru hian pár a chhuang thin. ‘Sem sem dam dam, ei bil thi thi’ tih rilru kan putna te hi a a mawi êm êm a, a Mizo hliah hliah a ni.