A VA'N PAWI “A nau pian atang hian a u zia hi a danglam a, a khirh a, malchung a chuh a, a nau hi a sik ru hlawk zel mai..” tiin nu pakhat chuan min hrilh a. Unau inthikna (sibling rivalry) hian chhungkaw thenkhat chu a tibuai khawp. Naupan deuh laia inthik, an upat hnu deuh pawha inmil lo zual zui bikte pawh an awm zui thei a ni awm e. Ka fapa hi kum 7 zet kan mal khalh a, min tihlim a, amah pawh a hlim a. A kum sarih pumhlumna tur pian cham thlen hma deuhin chhang a nei ve ta a. Nau a nei tur chu a phur khawp mai a. Nau nei tura damdawi ina kan nupaa kan kal dawn pawhin harsatna engmah a siam lo. Nau a neih dawn avangin nuam a ti a, a hlim a, tha takin min thlah a. Nau atan chuan mipa a duh deuh a, mahse, hmeichhia pawh pawi a ti chuang lo a. Nau chu tluang takin kan nei a. Damdawi in atang chuan in lam kan va hrilh a. An hlim em em a, an rak chel chul a, an lam vel a ni awm e! Unau a nei ve a, u a’n ni ve tur chu nuam a ti a ni. Min buaipuitu a patea chu damdawi in atang chuan a haw phei a, ka fapa chuan a lo hmuak a. A patea hnenah chuan, phur em em hian, “Ka nau chu a hmeltha em?” a ti a. A patea chuan fiamthua amah chhaih pahin, “Hmeltha lutuk! Nang aiin a hmeltha daih,” a ti a. Chuta a dawt leha thil thleng chuan thil tam tak min zirtir ta a ni. A hlim hmel chu a inthlak a, rilru nat hmel em emin, “A va’n pawi,” a ti vawng vawng a ni awm e. Nau kan pai leh tirh atang khan hlauh ruk ka nei a. Amah kha kan mal khalh rei tawh si a, kan engkim a ni rei tawh si a, a lal tawh si a, amah aia ngaihsak ngai zawk nau a neih chuan a thik nasa ang tih ka hlau a. Chutia apatea an chhan takah phei chuan chu ka hlauh chu thlenna chance a sang ta viau mai tih ka hria a. A thawidam hna kan thawk zui a, u leh naute kan inhrilh bawk a, “A nau a hmeltha zawk tuman tih awih loh,” kan inti a. A patea’n a fiam sual tawh a, fiam sual leh kan tlin tawh lo ang. Hmeltha ber, duat ber, ngaihsak ber, lal ber ni thin kha luahlantu an awma a inhriat nasat vaih chuan kan buai dawn nasa si a. Amah ngaihsak lamah kan tang thar a. Harsatna em em kan nei zui zel ta lo hlauh a. Ka fapa hian min chhun a, a chhe lem lo a! Pu Hausiama duhdan, ‘kan nupuite chu keini aiin an hmeltha tur a ni’ tih angin kei ai chuan ka nupui chu a hmeltha zawk a, ka fanu hian chhun se a that tehlul nen kei bawk min chhun a, mahse a hmel a tha reuh a! Khawilo han vahchhuah chhungkua te hian, “A va hmeltha reuh ve,” tia fak duhtawk ta mai loa a bula awm ve reng a u pawi khawih zawng khera, “A u aiin a hmeltha a nih hi,” han ti fiam tel hram thin hmeichhe tawngduh hi kan tawng ta thin a. Kan ip zawr zawr thin. Unau inthik ka hmu zeuh zeuh thin. Min rawn rawn ve thin a. Inenkawlna kawngah chhungkuaa tanho a ngai a, a buaithlak ve nek thin. Unau inthikna ‘sibling rivalry’ hi a thlen lohna tura atir atanga inven lawk mai theih a ni ve a nia. Kan hlimpui fiamthu hi mi thenkhat tan chuan,“A va’n pawi,’ an tih vawng vawng theihna tur a lo ni palh thei a. An bula mi hek tel kher lo leh va nawk salh kher lo hian tuemaw hi kan fak mai thei tho bawk maw le!