A ziaktu chu tu nge?

Miten thu tha tak tak an ziak a. Tha ti deuha chhiar ve mai thin àwm a nih laiin keini chu a ziaktu-ah kan lo buai ta thìn a. Kan thenawm nu mâkpa thawhpui nu putea thu sawi awihin kan lo ei lo ve êm êm a, a thu ziah hrim hrim chhiar kan tum lo ve ringawt zêl! Kan va’n khawlh hlawm tak!

Kan khaw style hi kan zavãi style!: Kan khuaah chuan thenawm pa thu sawi aiin hriat ngai lëm loh, tù a nih pawh tláng hriat loh thu sawi chu a awihawm zâwk tlat zêl a, a tlangtla zâwk ziah thìn. Khawmthlangpa Pu Khùala te ang duang lehkhabu ziah vè chuan lawmpuina aiin véng chengker lama hmeithai zu zuar ina a chhìar pawh la chhìarsak lo kal khâwmte fiamthu item a ti tam zâwk daih—kan khuaah chuan! Lehkhabu phêk tam fé mai ziak tùra a hun hman dàn te, ziah tùr ngaihtuaha a thluak chàwl hman loa a hman nasatzia te, a thawh rimna leh a hahna zawng zawng hriatpui miah loin, ‘A ve ringawt thìn a!’ kan tihsak ringawt zêl—kan khuaah chuan!

Hmàn ní deuh khán kan khuaah Aizáwl pa pakhat, Evan. hi kan kohhrana ni hnih leh zan thum Crusade nei tùrin a lo kal a. Mahse, kan tuipui ta viau mai a. Kohhranin camping buatsaih làw làw an rél ta chúk chúk a. Hei, tûn kár hian a chhãwng lìna kan nei leh mék. ‘A first batch-ho pawh an lût nawn leh vek maw le!’ tih chu intih theih nán tak kan la hmang zui. Kan khaw pa, Evan. vè tho chu rawih kan tum chuang dèr si lo. Ani kan Evan. pawh hi, tum khat Aizáwl véng lian tak pakhat, Biak in pawh paruk lai nei véngin an ruai dáwn a. Chü thãwm chu, a feh chhuaha hmâ-in kan kohhran nuho tìti tui ber an ni nghâl pang a. A rawngbàwlna tùr véng, an ngaih sàn êm êm thin pawh chu, kan khaw Evan. ruaitu kohhran mai ni lo, a véng mipui chawpin an ngaisáng lo dial mai!

Kan khaw chìn dàn, kan rilru, kan style ang hi mi dang paw’n an lo chíng ve tho mai. A! Hmãnah pawh an khuaah Isua meuh pawh a hnawng ve tawh tho a nih kha màw lè.

Naute piang hlim kan han en a; tha tê têa hmel tha kan tih thü sawi ve mai àwm hi, ‘A siamtute a chhùn lo hlauh a…’ te kan han ti kher thìn a. Hetia tih chíngte hi, ‘Hmel tha biuh beuh’ tih aia ‘hmel tha ving veng’ tih duh zâwk an ni hlawm tho thìn si a! Chaw ei khâwm ní-khuain ei rawng kan han báwl vè a. ‘I siam thiam mang e,’ min han tih vè mai àwm, ‘…i thaibawih ka ring!’ min han ti tel kher thìn te hi chu, kan nihna tak tak emaw intia hàw hnua mahni in luh dáwn a, ‘Nû-i, in awm em?’ tih deuh kher cháng pawh neih palh awl a ni thei tlat!

Kei chu … ka peih lo!: TV hi ni ila, ka ning ngawt ang—min phun khum nasa hlawm dâwn mai sia(h)! Zai han chhuak se, a satu zai thiam leh thiam loh lam aiin a satu ruih thin thü te, a incheina leh a music video vêlah in lo buai ang a; sâp pa zai ve thung se, in fak leh dum dum thung si ang a. Tû emawin Pathian fakna hla sà se, eng kohhran mi nge a nih tih leh a làwina kohhrana a chanvo chelh lamah in lo buai daih thìn ang a. A hla sak khân in thlarau nun chu a khawih har ve thìn ngawt hian a nia ka rin thin ni—TV chu ni ta ila.

Tûnlaiah ngat phei chuan TV nih aiin BSNL te, Airtel te, Jio leh service provider dang dang nih hi ka peih lo zâwk ang. Awlsamna kan thlensak leh kan speed chak laia fak hlawh hauh lo; kan speed muan ve zeuh cháng leh balance zawh cháng chauha hriat hlawh kha ka ni dáwn a—àn hlã nèn mâw—ka peih lo!

Mizo ziak mite kan thlìr dàn: Miin chanchinbû-ah thü an ziak a; thenkhatin lehkhabu te an ti chhuak hial a. A thupui aiin ‘A ziaktu chu tu nge?’ tiin a ziaktu hming kan han en hmasa tê tê a. A ziaktu azirin kan chhiarin kan chhiar duh lo fo. A thu ken leh a thu laimu chhui aiin a ziaktu nun hlui chhui nuam kan ti zâwk a. An ziah that leh ziah that loh lam te, an tawngkam chheh màwi leh chheh sual lam aiin ‘a ziaktu cowboy lai thawnthu’ ngaihnawm kan ti zâwk fo mai.

Mualpho inhuamin mahni han insawi lût ta zêl ila, chapo thûa min ngaihsak a nih paw’n a pawi lo e. A neitute âtso vàng leh min duhsak vàng liau liauin chanchinbu pahnihah lehkha ka’n thãi kár tin ve thìn a. Lehkhabu ka ti chhuak ve nual ta bawk. Eng lam nge ka ziah te aia, ‘Hmãna a scooter petrol zawh tuma a thunna tùr Pu PL-a pawisa a pûk pawh a la rùl lo!’ ti ang záwnga min sawi peihtu zât hi tû leh fâ nei ila ka ti ngawt mai! A belha han belh chian chî rual loh hi ka ni ve hrim hrim bawk nèn; a biha bih ngat phei chu … min bih chiangtu ka tawng ang tih mawlh hi a nia ka hlauh thin ni. Fel lo ni tin thìn hi, ‘Fela pa’ ka ni mauh bawk si (Lucas Lalremruatfela pa alâwm ka nih le a!)! Chuti chung chuan tuang ti chhah luiin lehkha ziah ka chàwl duh hauh bawk si lo. ‘Tû emawin, engtin emaw min sawi leh dáwn khawp; hmuhsitawmna ka insiam belh dáwn chiang; miten min hriat tam poh leh ka mualphona a tam dáwn…’ tih rilrû pu sâ ràn lo phei ila chuan lehkha hi ziah ve mai mai ngam chî pawh niin ka hre lo hial a ni.

Eng pawh ni se…: Mí hmáa thu sawitu leh mi chhiar tùr ziaktu te, hla satu leh thil titute hian, mi dang aia kan nun kan uluk a ngai bîk hle mai, tih hi phat rual a ni lo. Chutih rual chuan a mimir paw’n, mi thil tih kan teh dàn hi a fel vek bîk em, tih pawh kan inbih chian a ngai ve tho lo maw?

A ziaktu, a sawitu, a satu, a thawktu, a réltute thil tih (ziah, sawi, sak, thil tih leh rèl) lam aia amah, a titu zâwk kan dah pawimawh fona chhan hi, chapona, îtsîknaa khat, rilru te tak të, thliarkár rilru kan put vàng a nihna chen a awm em? He rilru, thliarkár mitea awm bawk kha, keimahnia a awm vè chhúng hi chuan, he hnam tlem të, inngaisáng tawn tham lek hi kan indãwmkãng zo lo ang tih ka hlau thìn mang e.

DOWNLOAD OUR APP

Read latest news on your phone

A ziaktu chu tu nge?

Latest News & Chhiar Hlawh