Dr Hrekima Titi

‘Aih’ ti mah se

Dr. C. Lalhrekima - Jul 01, 2014

‘Aih’ ti mah se

Mahni inrintawkna a zirchhuah dan chu Henry Ward Beecher-a chuan a theihnghilh tawh ngai lo. Sikul naupang a nih laiin tum khat chu an pawlah an zirlai chhamchhuak turin an zirtirtupa chuan a ko chhuak a. Eng emaw chen a sawi hnu chuan an zirtirtupa chuan lu thing chungin, “Aih,” a lo ti a. Henry-a chuan a bul atangin a sawi tha leh a, an zirtirtupa chuan a hma aia vin mahin, “Aih,” a lo ti leh a. Zak em emin Henry chu a thu ta a. An zirtirtu chuan naupang pakhat a ko chhuak leh a, a sawi tir ve leh a. A sawi dawn tan tih chuan an hotupa chuan, ‘Aih,’ a lo ti leh a. Mahse chu naupang chuan a sawi chhunzawm zel a, a sawi zo ta a. An hotupa chuan, “I titha hle mai,” a ti ta a. Henry chu a lungawi lo viau mai a, an hotupa hnenah chuan, “A sawi ang chiah khan alawm ka sawi a,” tiin an zirtirtupa bulah chuan a va phun deuh a. An hotupa chuan, “In zirlai hi hriat satliah a tawk lo va, in chian a ngai a ni. ‘Aih’ ka lo tih avanga i tawp zel chuan i chiang tawk lo tihna a ni. Mi zawng zawng hian, “ Aih,a dik lo,” lo ti mahse, “A dik alawm” tia tangin i dikzia i tilang thin tur a ni,” a lo ti a.   Mahni inrintawk hi a har fu mai. Mahse kan nihnaah te, kan thil tihah te, kan theih chinahte kan chian chuan mi dang zawng hian min tihbahlah tum mahse kan dikna kan tihlan zel a tul thin. Khawvel hian kawng hrang hrangin min tihnual thei.. “Aih, i thei lo vang” “Aih, i naupang lutuk,” “Aih, i upa tawh em mai,” “Aih, i dik lo,” “Aih, i nep em mai,” “Aih, i thiam lo em mai,” “Aih, i zirna pawhin a phak lo,” “Aih, i chawrchhuahnain a zir lo,” tiin kawng hrang hrangin nangmah tihnual thei i tawk fo dawn. Mahse i tumah i chian a, i theihna zawng zawng nen i thawh chuan i tithei tih inhria la. Khawvel hnenah hian i thiamna te, i theihna te, i diknate i lantir a tul fo ang. Khawvelah hian nangmah fuiha nawr phurtute an awm thin ang a, tihnuala tibeidawngtu thil pawh i tawng fo ang. Min nawr phurtu leh min ngaihsaktu an awm hian thil tih a nuam a, a chakte pawh kan chak duh bik. Mahse tuman min phurpui loh lai te, min tihnualtu an awm laite, min itsiktu an awm lai te, min dan beh tum an awm laite hian kan chak tak tak leh tak tak loh a lang zawk dawn. Fuih chawp ngai reng nih hi a pawi lem lo. Infuihna leh infakna hian min tiphur tur a ni. Fuih chiam pawha hmasawn tum hauh lo nih ai chuan fuihpawrh theih, fuih phur theih nih hi a tha tho tho. Fuihpawrh chawp ngai lo, mahni dikna leh theih china chiang, daltu leh dotu an awm chung pawha theih tawpa bei thin nih hi erawh a ropui zawk. Mi hian an fuih reng dawn lo thung che. Hlawhtling lo mah la pawi ti lo an tam. I hmasawn duh lem lo, hnuaichhiah tum che leh i thiam lohna leh i nepna tihlan hreh lo an ther fur dawn. Miin, “Aih,i dik lo, i thiam lo, i nep, i tlin lo ang,” tiin tihhnual che lo tum thin mahse, “Ka dik alawm, ka tlin ve mai ang, ka tithei ve mai ang,” tia mahni inringtawk chunga i theihna lanchhuahtir hi i tihtur a ni fo ang. I tanna erawh thil dikah ni thung se la.
Share now