AAP hruai Delhi sorkar chuan inthlan laia an intiam angin delhi khawpui a ‘free wi-fi’ (a thlawna internet hman theihna) pek tumin hma an la tan ta a. An ruahman ang chuan a bul tanna atan kum khat chhungin college zawng zawng (Government & private college) ah a free wi-fi pek a ni anga, chumi hnuah mipui nawlpui hman theih turin thingtlang lam leh mihring chenna hmun hrang hrangah pek leh a ni ang. Sorkar laipui prime minister Modi-a kaihhruai pawh hian an thupui ber pakhat ‘digital India’ tihhlawhtlinna pakhat atan kum thum chhungin India ram khawpui lian leh te deuh 2,500 ah free wi-fi pek an tum thu kum tir lam khan an lo puang tawh a, hemi atan hian Cheng vbc 7,000 zet ruahman a ni nghe nghe. Pachhunga University College hian kum 2008 atang khan college campus chhungah zirlaiten a thlawna internet an hmanna tur Free WiFi Zone an lo siam tawh a. Mizoram zirna hmun a free wi-fi pe hmasa ber an ni a, India hmarchhak pum puiah pawh a hmasa ber an nih loh pawhin a hmasa ber pawl chu an ni ngei ang, tunah hian college campus chhung hmun rukah free wi-fi an pe mek a, an zirlaiten an hman sual lohna turin an mobile phone number an chhinchhiah sak vek a. Heng hmunah te hian zirlaite an bawr laih laih reng a, an tangkaipui hle bawk. Nu leh pa leh kum upa zawkte tan chuan internet leh thalaite inzawm ngheh tak zia hi hriatthiam a har viau maithei a. A bikin khawpuia cheng thalaite nunphungah hian internet hi a bet tlat a, an inawm tleina ber a ni tih pawhin a sawi theih awm e. Khawvel hmun dang ang bawkin kum hnih khat vel kal ta lawk atang khan cellular phone changkang chi smartphone kan uar thut a (cellphone pangngai ang chi kha company lam pawhin an siam chhuak zui ta meuh lo a), chutiang smartphone chu internet nena inzawm tlat a ni a. Thalaite lawm tur chi online game, social media, online shopping, etc., a theih vek bawk si a. Tichuan, internet mamawhna a lo sang ta em em mai a ni. Lehlamah chuan social media hi thalaite bik chauhin an lawm a ni tawh lo a, tunlai chuan nu leh pate hlei hlei hian WhatsApp/facebook hi an tuipui tawh zawk. Tunlai khawvel hmasawnna hi facebook/twitter milin a kal tih hial theih khawpin sumdawnna thilah te, infiamna lamah te, media lamah te hian facebook an hmang tangkai vek a; sorkar department hrang hrang, pawl hrang hrang te, tlawmngai pawl te, mi ropui ber ber te thleng hian facebook nena inthlunzawm vek an ni a. Kohhran lam leh rawngbawlna lamah te pawh an hmang tangkai vek tawh. Chuvangin, intihtunlaina atan mai ni loin, internet hmang thei chin tan chuan social media hman ve hi tih makmawh a ni zawk ta hialin a lang. Delhi khawpuia free wi-fi an pek turah pawh hian internet hman (website browsing) bakah social media website (facebook/twitter) te, e-mail leh whatsapp te hi a thlawna hman theih tura ruahman a ni nghe nghe a. Mipui nawlpui hman tura a thlawn a wi-fi pek hi khualzin hipna atan a that an ring bawk a ni. Aizawl khawpuiah pawh hian hotel/restaurant leh dawr thenkhat chuan anmahni dawrtute tan free wi-fi an pe ve tawh a, dawrtu pawh an hip phah viauin a lang. Zirna in thenkhatah pawh zirlaite leh zirtirtute hman turin a thlawnin pe an awm bawk. Hmun thenkhatah hian thlawna wi-fi hman theihna a awm zauh zauh bawk a, chungah chuan chhun zanin thalai an bawr laih laih reng thin a. Mi thenkhatin social media hman sual chungchang te hi an vei viau lai hian ngaihtuahna zau zawk kan put a ngai khawpin a lang. Sawi tawh angin smartphone hmanga inawmtlei thin thangtharte nunah hian online game khelhho te, thlalak leh thuziak leh mamawh dang inpek tawn te hi a bet tel tlat tawh a. An tleina zawng apiang hi an chhiatpui vek kher lo a, internet hman ho theihna hmun, thianzaho a an inkawmhlimna hmun bik an neih phawt chuan zu leh ruihhlo lama kal pawh an tlem phah hial zawk maithei a ni. Aizawl hi khawpui lian a ni lo a, hmun awl pawh awm lo khawpin chenna in a bit tha a, mihring cheng tam zat atanga chhut leh in tam lam atanga chhut chuan a zau lo viau bawk. Chuvangin, sorkar hian khawpui chhung hmun eng emaw zatah hian free wi-fi han pe thei ta se, intawllenna leh len khawthawnna hmun dang nei si lo thalaite tan hian a lawmawm viauin a rinawm. Sorkar laipuiin ‘digital India’ a buaipui mek lai hian inthlan dawn a 'thalaite khawvel thar' tih auhlaa hmangtute hian, smart city nih tum mek Aizawl khawpuia cheng thalai changkang takte tuihalna phuhru tur hian hmalak a hun khawp mai. Tunlai zirna kalphung hi multi-media nen a inkawp tlat a ni tawh a, school naupangte pawhin an project atan internet an mamawh tawh a nih hi. Zirna sang - college leh university ah phei chuan computer leh internet hman ngei ngei a ngai tawh. Zirlaiten an study material lakkhawmna atan te, an project atan te an mamawh em avang hian Mizoram a college zawng zawngah hian a thlawna internet an hman theihna tura ruahmanna siam ni ta se an tangkaipui khawp ang. Thingtlang khaw lamte hian an mamawh hlei hleiin a rinawm. Chuvangin, thuneitute tan pawh ngaihtuahna thar sen a tha khawp mai.