Thukhawchang

Aizawl Civil Hospital Ram Chungchang

Lalthlamuana Ralte - Sep 21, 2014

Aizawl Civil Hospital Ram Chungchang

Mizoram a mipui vantlang (Civilian) damlo enkawlna hmasa ber, Aizawl Civil Hospital hi 1894 khan Zosapten an din a. Kumpinu hnuaia awm lai kha a ni a, chung lai chuan sorkar babuten puakphur (Kuli) an chhawr thin a, he damdawi in pawh hi a tirah chuan 'Coolie Dispensary' (Puakphurte inentirna hmun) tih a ni nghe nghe a. Chung lai chuan damlo enna leh damdawi semna hmun mai a ni a. Mahse, hun a lo kal zel a, damdawi in tak tak lo ni tain 1906 khan khum 20 lai a awm ve ta hial a ni. Aizawl Civil Hospital hi khawpui laili a awm a nih bakah sorkar damdawi in a nih avang hian private hospital dang aiin inenkawlna senso a lo tlem zawk a, doctor thiam rual awm khawmna a lo nih bawk avang hian damdawi in dang zawng zawng aiin vawiin thleng hian mipuiin an bawh nasa bik a ni. Mizoram a damdawi in hlun ber leh tangkai ber ti a chhal ngam a ni hial ang. He damdawi in hi mipui tana din a nih angin harsatna a tawk a nih chuan a neitu mipuiten ngaihdan an sawi hi a thiang a, thuneitute pawhin veng bil aiin Mizoram mipui hi an zahin an ngai pawimawh zawk turah ka ngai. Tuna kan buaina ber Dawrpui khawtlang tana damdawi in ram zau tak sahthlak chungchangah pawh hian mipui ngaihdan la ngam khawpin sorkar hi huaisen se la chuan hetiang thleng thleng a buai hi a ngai lo tur a nia. Chutihlaiin, he damdawi in ram chhuhsak kher hi chu ni danga mimal leh khawtlang hnena sorkarin department ram a pek thin ang ngawt kha a ni lo tih erawh hriat a tha, a chhan chu mihring nunna nghawng pha tur thil, mi tam tak thih leh dam hril thei tur a ni tlat a ni, ngun taka ngaihtuah chuan thutlukna huaisar tak siam ngawt chi a ni lo ang. Tunhma lam, staff quarters an sak hma khan 'Pipu Tlang' tih a ni thin a, len khawthawnna hmun nuam tak a ni nghe nghe a. Mahse, Aizawlah mihring an lo pung zel a, damdawi in pawh a changtlung chho zel a. Chuvang chuan damdawi in ep tlang bawk, nula tlangval len khawthawnna hmun pawh chu mamawhna vangin damdawi in ram chhunga rin luh a ni ta a ni. Tunhnai a helai ram inchuhpuina boruak hi kum 2006 a mihring chenna atana him tawh lo staff quarters thiah a nih hnu atang khan a intan ve nghal mai ni awm tak a ni. Building thiah a nih hnu khan a thar sakna tur sum chungchangah thil fel lo deuh a awm ni awm tak a ni, sak that lohin a awm ta reng a. Ram ruak ta huai mai chu Dawrpui khawtlangin tunhmaa an ram a nih changchawiin neih tumin hma an la zui ta a, April 7,2007 a Dawrpui vantlang inkhawm chuan 'Dawrpui Multipurpose Centre Demand Committee' an din ta hial a ni. Hemi hnu hian an hmalakna hriat tur a awm ta fo a, zan lama kawngpui dan te, punkhawm te an huaihawt thin a nih kha. Mi tam tak chuan vawiin thleng a Civil Hospital ram sahthlak chungchanga political party hrang hrangte an ngawi duk reng hi mak an ti viau a, kan politician-te hi sorkar ngawr ngawt chaka tuihal, an tlinna tur a nih phawt chuan inphal zau tak an nih vang a ni maithei. Kum 2008 MLA inthlan dawn a MPF, Dawrpui Local Forum-in an bial chhunga MLA candidate-te tana common platform a buatsaih tum khan candidate-te chhan tur zawhna an siam a. Party tin candidate-te leh an president-ten Dawrpui Multipurpose Centre hi tha an tih thu leh tihhlawhtlin ngei an intiamna tawngka leh ziakin an pe vek a ni. He thil thleng hian ngaihtuah a tithui duh khawp mai. Tichuan inthlan zawha sorkar thar lo piang khan vote zawn laia a intiam angin hma a la zui ta a, 2011 October thla khan Dawrpui multipurpose lungphum phum a ni a; Sorkar (Directorate of Land Revenue & Settlement) chuan Aizawl Civil Hospital ram (DPL Pass 339 of 1983) chu hmun hnihah thenin 2.85 Bighas chu Local Council Dawrpui Multipurpose Centre atan sahthlak a ni ta a. Hemi chungchang hi January10,2013 a Revenue department thuchhuahah tarlan a ni nghe nghe. Damdawi in ram zau tak veng bil tana pek a nih takah hian mipui phun thawm a ring ta hle mai a, he damdawi ina neitu chan chang ber Mizoram Government Doctors' Association leh Mizoram Government Nursing Service Association te chuan sorkar hmalakna an duh loh thu an chhuah a, thil dang bakah staff quarters a awm loh chuan damloten harsatna an tawh a hlauhawm thu an tarlang a ni. Dawrpui khawtlang hian Multipurpose centre hi mipui hman tangkai tur tho a nih thu uar takin an sawi thin a - car engemaw zat dahna tur te, park te, mitthi ruang dahna in te, auditorium te, infiamna hmun (Basketball court) te siam a nih tur thu an sawi a. Chutihlai vel chuan hengte ai hian mihring hriselna leh damlo enkawlna hi a pawimawh daih zawk ni a ngaiin Pi Vanramchhuangi (Human rights activist) leh a thurualpui pawl thenkhat (PRISM, SOSA, MZP) ten sorkar chu a thiltih sut leh turin an nawr ve leh ta a. CM hnena memorandum theh luh bakah media lama an puangzar a, signature campaign an bei bawk a. An hmalaknain awmzia neih lem loh avangin June 11,2013 khan Gauhati High Court-ah Pi Vanramchhuangi hian PIL a theh lut ta nge nge a ni. August 22,2014 khan High Court thutlukna (Judgement & Order) a lo chhuak ta a. Chutah chuan Mizoram sorkar hmalakna thenkhat felhlel deuh lai te tarlan a ni a. A chunga sawi ang khian Aizawl Civil Hospital ram zau tak Dawrpui veng tan sahthlak a nih thu hi January 10,2013 ah tarlan a ni a. Chutihlaiin, sorkarin helai ram sahthlak a remtihna inziahna lehkha hi February 26,2013 a mi a ni thung. Sorkarin thutlukna a siam hmain ram hi an lo pe daih tawh tihna a nih chu. Court thutluknaa a inziah danin sorkar hmalak dan hian Danpui Article 166 in a phut ang a hlen chhuak lo bawk. High Court thutluknaah chuan Chief Secretary hian committee a din anga, chu chuan Aizawl Civil Hospital ramah hian doctor leh staff te quarters sakna daih ram awl a la awm leh awm loh an ngaihtuahin, an endik ang a, nakina damdawi in tihlen belh zelna tur pawh an ngaihtuah tel bawk ang. He thutlukna siam atanga thla hnih ral hma ngaihtuah fel tur a ni nghe nghe. Chu committee chuan Mizoram Government Doctors' Association leh Mizoram Government Nursing Staff Association aiawh te thu leh hla pawh an ngaithla tur a ni bawk a. Tunkar tawp lam khan he committee hi din a ni nghe nghe. He committee pawimawh tak hian quarters sakna tur leh damdawi in than zelna tur chauh an ngaihtuah a, Doctor leh Nurse-te thu a ngaithlak bawk chuan PIL theh luttute leh damdawi in a thawkte leh mipui tan chuan court thutlukna beiseiawm tak a lo chhuak mai dawnin a ngaih theih awm e.
Share now