Aizawl hi Mizoram khawpui ber leh sorkar hmunpui a nih avanga Mizoram mipuite tana a pawimawh dan hi sawi tur a tam khawp ang. 'Ka sakawr pa tek pa tek, Aizawl kan thleng hman lo ang e," tih hi thingtlang naupang zawng zawngten inkhualtelem nan an hman thin a; mipa naupang tam berte duhthusam pawh Lammual ngei a inkhelh hi a ni thin. Chumai a ni lo, Zofate khawpui ber hi Israel fate rilrua Jerusalem a pawimawh tluk zetin khawvel hmun hrang hranga cheng chhinlung chhuakte rilru luahtu leh an lung tilengtu a ni bawk. He khawpui ropui tak hian engtik lai pawhin lang thei lamah nasa takin hma a sawn reng a, mahse, (hmuh theih leh) hmuh theih loh lamah harsatna namen lo a tawk thung si. Ram nitla seng lo a roreltu Kumpinu sorkarin 1890 atang khan Aizawl khawpui hi Zofate awpna hmunpui atan an hmang tan a. Chumi kum chu mei mit lo a Aizawl a awm tan kuma pawmin 1990 khan centenary pawh lawm a ni nghe nghe. Sapho hian khawpui ni turin an ruahman chiah lo a, mahse sipai hmunpui leh sorkar hmunpui a nih miau avangin mipuiin an bawh a, sorkar phal lo chung pem lut an awm zel a. Rei lo teah khawpui lian tak a lo ni ta hial a. Zirna hmunpui leh sumdawnna hmunpui a lo ni ta a, kohhran leh tlawmngai pawlte leh politics hmunpui a ni zui ta zel bawk a. Sapho haw hnuah pawh he khawpui bawk hi India-in Mizoram awpna hmunpui atan a hmang zui ta zel a ni. Mizo history a hmun pawimawh em em, sapho hun lai atanga puipunna hmun pawimawh ber la ni reng Aizawl Lammual pawh hi 1890 atang khan Mizote ta a ni ta lo a, min awptu hnam dangte thuneihna hmun a ni zui ta zel a ni. Aizawl hi tunhma chuan khawpui tenau 'town' a ni reng a, mahse kum 15 vel kal ta atang khan khawpui lian 'city' anga ngaih niin, inrelbawlna lamah pawh India ram khawpui lian (city) te kalphung ang zuiin July 2008 atang khan Aizawl Municipal Council din a ni a, kum 2010 November thla khan Municipal Council member inthlan hmasa ber neih a ni. Zep nak emaw, mipui thlan AMC hmasa ber hian mipui beisei a pha chiah lo deuh, sorkar lai inpaihthlak tum hnih a thleng hman a, politics ball a hmang an awm thin avangin an kal fuh tawk lo deuh ni pawhin a lang. AMC hian thuneihna chin an nei thui vak lo a, a nihna takah chuan state sorkar thu anga kal mai tura duan te pawh a ang zawk mah. Aizawl hmasawnna tur chuan tun aia sorkar lak atanga thuneihna sang zawk an neih pawh a tul mai thei a ni. Khawpui than chhoh danah hian ruahmanna fel tak a awm lem lo a, mumal lo takin he khawpui hi a thang chhe zel a ni ber. In sak danah te, bawlhhlawh leh tui chhe paih danah te, inkalpawhna leh kawng siam danah te mipui himna tura ruahmanna (Safety measures) ngaih pawimawh a ni ngai lo a. A chenga te hian harsatna an tawk mek a, an la tawk nasa tial tial dawn ni pawhin a lang. Kum 2005 khan Aizawl a insak dan buaipuitu tur Aizawl Development Authority (ADA) dinna tur dan siam a ni a, 2008 atang khan dan thar (Aizawl Development Authority Building Regulations) chu hman tan a ni bawk a. Mahse, he dan hi mipuiin an zo meuh lo niin a lang a, a hnu lamah phei chuan thuneitu lam pawhin an thlah dul zui ta mai reng a ni. Rambuai avangin mi tam tak khawpuiah an pem lut a, sorkar hmunpui a nih vang leh hmun dang aia sum leng vak a tam avangin mi tam takin an bawh a, zirna hmunpui a nih avangin khaw tin atangin thalai tam tak an fuankhawm reng bawk a. Chhiarpui hnuhnung bera a lan dan chuan Aizawlah hian mihring 1,091,014 an cheng mek a, chu chu Mizoram mipui za zela 27 vel zet a tling. A nihna takah chuan zirna vang leh thil dang vanga khawsate nen phei chuan engtik lai pawhin mihring nuai hnih atanga nuai thum hi chu an awm rengin a rinawm. India hmarchhakah hian Aizawl hi khawpui lian ber pawl leh mihring tamna ber pawl a ni a. State capital-ah phei chuan mihring tam lamah Guwahati, Imphal leh Agartala a pha lo a; Shillong te, Silchar te aiin mihring an tam zawk tihna a nih chu. Tlangram chhengchhe tak, kham leh hmun awi tak tak a awm avang hian khawpui chhungah hian chenna atana hmun him lo tak tak a tam hle a. Hmun zim leh chep taka in inzawm titih sak a tam hle a, hmun awl zau tak a awm lo a, ke a inkalpawhna leh lirthei tlanna kawng a zim hlawm hle bawk. Kan vannei a Pathian zarah chhiatna lian tham a la thleng lo hlauh a, engmaw changa vanduaina lo thleng - kangmei leh leimin ilo ah pawh kan hmunhma chep lutuk hian harsatna a thlen fo thin a ni. Vanduaina leh chhiatna rapthlak zawk a thleng ang tih a hlauhawm khawp mai, kan buai dan tur hi sawi mai aiin a nasa daih ang. Mizoram economy innghahna bul, sumdawnna leh zirna hmunpui, sorkar leh politics bu zawl, kohhran leh tlawmngai pawlte inbenbelna ni bawk, Mizo mipui hmun li a thena hmun khat aia tam chenna Aizawl khawpui hmabak hi vei tak te a vei a hun ta khawp mai. Mipui dinhmun inthlauhzia te, mi retheite dinhmun chhiatzia te, eizawnna tling hna a vanzia leh hnathawh tur mumal nei lo tamzia te, khawpui bawlhhlawh paihna leh a sawngbawl dan that tawk loh dan te, ei leh in, ni tin mamawh leh tui harsatna te leh a dang pawh sawi belh tur a tam ang. Mihring pung zel avang leh inrelbawlna that loh vangin harsatna kan tawk fo a, zu leh ruihtheih thil hluar zel vang te, khawtlang leh chhungkaw nun tlahniam zel vang te hian suahsualna a pung zel bawk. Hmuh theih lamah hian thang chak viauin, in ropui tak tak ding khir iah uaihin, lirthei chi hrang hrang pung zelin, thil changkang tak tak hmuh tur awm thar zel mah se he khawpui hian hmasawnna kawng dik a zawh thuai loh chuan khawpui tawp tak leh khawpui him lo tak a ni thuai dawnin a lang a. Chuvangin, ngaihtuahna kan sen zel theihna turin Aizawl hmasawnna tur chungchang hi kan sawi chhunzawm zel ang.