Aizawla chengten a vawi hnihna atan khawpui enkawltu turte kan lo thlang zo leh ta a. Inthlan hi mipui kutthlakna a nih avangin a hlu a, a bikin political party tan phei chuan inthlan aia pawimawh zawk a awm lo. Tunkar kalta khan khan Aizawl North-3 MLA bye-election vote chhiar a ni a, hneh takin INC candidate Pu Lalthanzara thlan tlin a ni a, vote tla zawng zawng zatve aia tam (56.57%) a hmu a. Bye-election hun tur leh vote chhiar hun tur election commission-in a puan hnuah Mizoram state election commission-in municipal corporation inthlan hun tur hi an puang ve leh a nih kha. Chuvangin, hetia inthlan hun inhnaih chilh taka an ruahman leh bye-election result puan sarhu municipal corporation inthlan a awm leh nghal mai te hi sorkar lai party duhsakna ang hiala ngaih theih pawh a ni. Engpawh nise, AMC inthlan tluang taka zawh fel a ni a. Sawi leh sel theih eng eng emaw neuh neuh chu a awm ang a, sorkarin sum harsatna a tawh mek avangin duh anga felfai tawk lo sawi tur pawh a awm nual awm e. Inthlan buatsaihtute sawi dan chuan he inthlanna atan hian sorkarin Cheng nuai 60 chiah a pe thei a, a buaipuitute tan chuan a beitham mah mahin a rinawm. Inthlang ram kan nih avang mipui aiawh hruaitu tur inthlan hrim hrim hi a pawimawh vek a, political party tan phei chuan a pawimawh leh zual a ni. A bik takin Aizawl mipuite tan AMC inthlan hi a pawimawh hle a, thlan tharte hi kum nga chhunga khawpui inawpna leh hmasawnna tura thuneitute an ni dawn a. A hmaa mi anga political party kaihbu mai mai an ni tawh lo turah ngai ila, thlan tharte hian nihna leh therhlo vanga party uire san chingte hi mipuiin an ngainep tih te hre tlang ta se. Inthlan result kha ngun taka chhut chuan Aizawl mipui suk thlek leh rilru put hmang thui tak a hmuh theih awm e. Politics-ah neutral a awm theih tak tak loh, party tan zawng bik kan nei ru vek, tiin an sawi thin. Mahse, tun hnai chho a MLA, MP, LC leh AMC inthlanah hi chuan Aizawl mipui tam ber hian party rilru pu loin vote an thlak thin tih a chiang a, a bikin local council leh municipal corporation inthlanah hi chuan bial chhung a zim deuh bawk a mimal (candidate) an pawimawh hle a, party tinte pawhin hei hi an hria a, mi hmingtha deuh, chhungkaw hung deuh, khawtlanga mi langsar deuh an sawm lut fo reng a ni. Chutiang chu tun AMC candidate zingah pawh khan an awm nual a, a then chu an tling nghe nghe a nih kha. Aizawl North-3 MLA inthlanah khan candidate pakhat khan ‘mipui court’ tih kha a sawi fo a, khata a sawi tum ni a lang chu inthlanna hi mipuiin mi dik leh dik lo, mi tha leh tha lo an thlanna a ni a, mipuiin an thlan tlin hi chu dan bawhchhiaa puhna lakah a fihlim, a tihna a nih hmel. Mahse, chutiang chu a ni thei ngawt lo ang. Mizoram inthlan awm tawhah rorel lai party candidate an la chak zel a, chuvangin, rorel lai party mi, minister ni leh nghal mai tur chiang sa thlan tlin a nih khan an puhna zawng zawngah mipuiin an thiam vek tihna a ni hauh lo ang. Engpawh nise, MLA bye-election result puan hnu lawk a Aizawl khaw mipuiin tanrual pui nei lo ber, eptu party MNF AMC a rorel tura an thlang tling daih hi politics inlumlet thlirtu leh inthlan boruak tuipuitu tan chuan a tuiawm viauin ang. Inthlan hi kil thum atanga inbeihna angin a sawi theih a, MNF party an mal din a, MPC leh congress party an tangdun a, NDA hmingpuin ZNP leh BJP an tangdun bawk. Tangrual pakhat zawk NDA atang hian inhnukdawk pathum an awm a, titi lengah leh social media lama an sawi dan chuan inhnukdawkte hian tangrual pakhat zawk hi an pui a ni awm e. Mahse, heng party dang zawng zawng tanrualna ni a sawi ward pathumah hian MNF candidate an tling vek a, ruling party a inhmang ve pakhat sawi ang deuhin inthlanah chuan ‘Tanrual hi chak lohna a ni’ e. Aizawl a inthlanah hian tling tur sawi lawk a har tial tialin a lang. Tunhma angin inthlan campaign thawm ri luih luih leh flag tar tih vel a awm tawh ngai lo a. MPF din tak hnu atang phei chuan boruak dai duk hnuaiah vote thlak a ni thin tawh a, thawm nei miah lo a inthlang na na na chu a tling zawk tura rin an tla leh nawlh a, rin loh lamin seat an hmu leh teuh thin a nih hi. Tun tumah pawh hian MNF party hian ward 11 an la a, congress leh MPC tang dunin ward 8 an la bawk a, ZNP leh BJP tangdun erawh an tla vek thung, hetianga lo ring lawk dik chat hi an vang viau maithei a ni. Congress party atang hian hmeichhia 5 leh mipa 2 an tling a, MPC atangin mipa pakhat a tling. MNF party atanga tling zingah hian hmeichhia pakhat a tel a, a bak zawng chu mipa an ni hlawm. November 2010-a AMC hmasa ber inthlanah khan ZNP leh congress party an tangdun a, MNF leh MPC an tangdun thung a, independent-a ding leh BJP leh NCP atanga ding tlema zawng an awm bawk a nih kha. Kumin AMC inthlanah hian MNF hian an bial hlui hum zawh tak loh pahnih (Ward I & VIII) an nei a, congress party-in an chang ve ve a. Congress party thung chuan MNF lakah an chakna sa bial thum an chan thung (Ward X, XII & XIX). 2010 khan MPC in ward 4 an la a, ZNP pawhin ward 5 an la bawk. Mahse, politics thli chhia a tleh chhen a, sorkar an inthlak zak zak a, a tawp lamah phei chuan party te zawk ZNP leh MPC phei chuan an councillor-te hi chan a lawi an nei tawh lo hial a nih kha. Tun inthlanah hian political party-te chhe pui puia an inbeih a, an inchirhtheh luai luai lai hian Aizawl mipuite vote thlak danah kawngro a su vak lo tih a lang awm e. MLA bye-election neih zawh hlim hlawlna Aizawl North-3 bial mipuite pawhin AMC ah chuan an vote thlak dan a dang leh daih a, ward pahnih a awm a, MNF pakhat leh congress pakhat an tling. A pumpuiah mi tam tak rin aia MNF an chet that chhan hi eng ber nge niang? Thawhpui nei lo awm chhun an nihna hi an hlawkpui a ni thei a, tanrualna leh thawhhona a that tak tak loh phei chuan party tandun hi chhiatpui theih tak a ni. Kan hriat angin kum 2013 kum tawpah MLA inthlanah Aizawlah congress an che tha hle a, a kum leh 2014 kum tir maiah MP (LS) inthlan a awm leh a, mipui hawi lam a inthlak leh daih a, bial tinah congress party candidate an chak lo vek a. Kumin kum tirah local council inthlan a awm leh a, congress party leh MNF an inbei tawk hle a nih kha. Kum tawp lamah inthlan hautak zet mai AMC inthlan a awm leh ta a, Aizawl mipuiin MNF sorkar turin an thlang tling leh ta a ni. Heng zawng zawng han chhut hian, sorkarna chang mekte aia eptu lam mipuiin an thlan zawk chhan lian tak pakhat chu sorkar lai ninna (anti-incumbency factor) vang a tih theih ang. Aizawl veng tinah hian party ruhkawl hi za zela 5 pawh an awm tling kher lo anga, mi tam ber hi chuan tha ni a an hriat an vote mai mai thin niin a lang a. Chuvangin, Aizawl voter-te hi neutral rilru pu tak tak an ni hlawm ti pawhin a sawi theih ang. Heng zawng zawng ngaihtuah hian AMC inthlan result hi a mak vak lo e.