Insawisel mawl leh ngawt thin aiin infakna hian mi a siam tha awlsam zawk fo tih ka sawi ve tawh thin. Lawmte lawmpui aia tapte tahpui a awl zawk fo ang deuh hian fak tlak fak mai ai hian sawisel mai hi a awl zawk a ni ngei ang. Insawisel leh mai thin ai hian infak mai hi a tha zawk. Infak hun dik leh infak dan tur dik phei chu a lawmawm leh zual.

Tleirawl a lo kal a. Kum 19 chauh a ni. Mahse fa a nei tawh. An nufa chuan a nu bulah an khawsa a. A lo chetsual tawh avangin a inthlahrung a. Chuvang chuan theihtawpin taimak a chhuah a. A nu lakah pawh mark hmuh that tumin nilengin in chhung tul zawng zawng a lo ti ve a. A fa enkawl pah ngai nen, a hah thin hle.

A nu lo haw chu a lawm a rin tehlul nen, tlai tin hian sawisel tur a rawn hmu ziah tho nia! Vawi khat mah lawmthu hrilhin a fak ngai lo. Mahse mi zingah chuan, “An nufa hi awm lo se chuan kan buai khop ang, an tangkai a nia,” tiin a lo va fak leh tho si. Mahse he tleirawl rilru hi a na tawh tho tho.

Chutia an nufa laka a lawm tho si a, mi zinga a lo fak duh tho si chuan, a fanu hnenah ngei khan lawmthu hrilhin han fak zauh zauh se tha tur a nia! Chu chuan a fanu a tihlim dawn asin maw le! Ka pi, i fanu hnena lawmthu han sawia han fak chu a har viau emaw ni le? I fak chuan a inchhuang ang tih i hlau maw? A theihtawp a chhuah chung pawha i sawisel reng avang hian hlutna reng nei lo niin a inhria a, thih hial duhin min rawn pan asin! Lo inkhaiin lo thi ta se, “A chhan pawh kan hre lo, an nufa hian an tangkai lutuk asin,” tiin tap chungin a ruang chungah i sawi leh daih awm si!

Rev. C. Rosiama sawi ka hriatreng chu, “Rawngbawltu ina ka len laiin a fapa a lo tlan haw a, ‘Ka pa, kan rizal a chhuak a, pakhatna ka ni,’ tiin hlim zetin a pa chu a rawn hrilh a. A pa chuan, ‘I thiante chu an va thiam awm lo hlawm ve,’ a lo ti pek a nih chu! A pawi hi ka ti lutuk a,” a ti. Khati khera i lo chhang kha a pawi khawp tak asin, ka pu. Naupang chu a hrilhhai dawn em mai. Naupang hrilhhai, rilru vakvai hi a pawi thui thei teh a nia aw!

He rawngbawltupa hian mi dang awm laiin a fapa hi chhuang anga lan a hlau pawh a ni thei. Hlauh loh tur zawk hlau kan tam a nia. A fapa hrilhhai leh fakna dawn hun tura fakna dawng lo rilru na tur nghawng kal zel tur kha a hlauhawm zawk asin!

Kan fate hi anmahni hmai chhanah, an hriat laiin, fak an phu phawt chuan fak tur a ni. “Ka fuih alawm,” tia fuihna anga kan ngaih hi sawiselna angin an dawngsawng fo. Fakna tur a awm phawt chuan an hnenah, anmahni bulah ngei, mi dang awm lai pawhin, mi hriat ngeiah pawh fak mai tur a ni. Chu chuan naupang rilru a chawikang zawk. A tha tlat.

Tu fa mah hi chhe hlawm tawp an lo awm lo. Drug addict tam tak hian fakna tur nungchang leh thil tha tih an nei ve fo. Drugs an ti chung pawha hnathawk taima tlatte an awm. In chhung bungrua hralh hauh lo leh ru hauh lova mahni thawh chhuah ngeia rui ve tlatte an awm! Zu ngawl vei pawh sande sikul kai kim an awm aw! Pa sual tam tak, nupui fanau hrawka vuak ching an awm laia an ruih viau tum pawha chhungkaw tibuai hauh lo, tihlim zawk mahte zuk awm ve a! An sualna lai ngawt sawi reng aiin an thatna hi hmuhsak a, fak ve an phu tho. An chanchin ka’n zawh chian fe hnuah, an hmaichhanah, “Zu leh drugs i ti tih loh hi chu pa tha tak i nih si hi maw le,” tia kan fak tel zauh hian an hmel a eng tlat fo!

Thenawmpa te, thenawmnu te, khawtlang leh kohhran tana mi tangkai tlat te, mahni hna thawk tha te, vantlang tana tangkai mi dang tam takte hi an bulah fak hreh loh tur. An hriat loh laia ral atanga fak aiin a tha zawk. Hmun dangah pawh fak tho ila, an bulah ngei pawh kan fak ang chu, fak tlak chu. “Inpawifak” hi thil mawi lo leh tha lo niin kan ngai. Fak tlak lo chung dawta inbawl paha infakder hi chu a tha hauh lo reng a. Fak tlak hi chu an hmai chhanah, titak hmai pua fak hi a tha ngai e.

Infak hun dik hian mi a tiphur a, hmasawn zawngin min nawr kal vek thei tih hriain fak tlak leh chawimawi tlak hi chu an bulah, an hmai chhanah infakin in chawimawi teh ang u. Fakna dawn hi nuam kan ti vek, tu nge nuam ti lo awm le?