Dr Hrekima Titi

An Thlirna Zawn Atangin

Dr. C. Lalhrekima - Aug 24, 2014

An Thlirna Zawn Atangin

Min rawn pantu tam tak, tu emaw chunga lungawi lo leh vui thinte sawi zin tak chu, “Min hrethiam lo,” tih hi a ni tlat. Hrethiamtu nei ta se, an dinhmun tawmpui thiam a, an thlirna zawn atanga thlirpui thiamtu nei ta se min rawn pan kher a tul fo lo mai thei. Hman deuh khan Civil Hospital-a damlo awm mek chu, “A buai deuh tlat,” tiin enpui turin min rawn ko ve a. Damlo na tak a ni bawk nen, mu reng chung khan inchung ceiling-ah chuan serthlum zuarte a han hmu pek a ni awm a! A natna avanga buai nge, ruihtheih thil tive thin nghei thut buai nge, a rilru a buai ve hrim hrim tihte han en a, a tul ang damdawite pawh han chawh turin ka chho a. A chanchin ziakna kan keu a, kan hnena an rawn refer ve nachhan chu, ‘tawng buai, thil hmusual’ tiin an lo ziak kalh mai a. Damlo chu ka’n kawm a, eng eng emaw ka zawt ka zawt a. A lo fel fu mai a. A tawng lah chu a buai der si lo! “Ka pu, inchung ceiling-ah khian serthlum zuarte i hmu em ni?” ka’n ti ta a. A ni khuma mu sa reng chuan tlemin a ring chu a’n dak eu zual deuh a, “Khi an zuar reng alawm!” a la ti tlat a. A bula ding chung chuan chung lam chu kan en ve a, ka hmu ve hauh lo mai le! “Khawi maw?” ka’n ti leh a, “Khi, an zawrh en tuar khi,” tiin a lu chunga ventilation chu a kawk a. Ka awm hniam a, a lu zawn vel atang chuan hmai zangthal meuhin a kawhna zawn chu ka’n en a. Serthlum eng tuar mai chu ka han hmu ve ta a! A lu chung zawn ventilation darthlaang inhawng deuhah chuan pawn lam inhnuaia serthlum zuarte thla chu a lo lang thei chiah chiah hi a lo ni a! Tlema tlemah mi a damdawi kan chawh hman lo chauh a ni! Mi thlirna zawn atanga thil thlir hauh lova ngaihdan siam mai hi a pawi thei. Kan dinna hmun atanga engkim mai hi tehfel ngawt chi ani lo. Mi dang thlirna zawn atangin thil hi thlir zir ve ila, kan hriatthiam loh thil tam takah hi chuan kan var hawk phah fo ang maw le! An lu bulah kun hniam ve ila, an mit zawn atangin en ve chhin ila, an pheikhawk bunin han kal ve chhin ila, “A lo nih reng tak hi maw le!” tih tur hi a tam viau awm asin! An dinhmun dik tak hrethiam chungin mi dang hi dawr thin ila chu kan hlim sawt hlawm ang maw le! Mi dinhmun hriatthiampui a, an ngaihdan tawmpui thiamna hi inlaichinna tha siam nan te, anmahni kan tanpui nan te, mi dang tana nun tangkai kan neih theih nante a pawimawh hle. Chutianga mi dang hrethiam tur erawh chuan ‘an pheikhawk inthawlh ve chhin’ a, an thlirna zawn atanga thlirpui an ngai thin. Drug addict te, KS te, kan fa te, kan nu leh pa te, kan nupui pasal te, kan pi leh pu te, kan thenawm khawveng te, kan kohhran hruaitu te, kan khawtlang hruaitute leh kan politician te, a, mi tin mai hi, an thlirna zawn atangin thlirpui ta ila, kan inhrethiam sawt ang a, kan inlaichinna kawngah hma kan sawn belh ang a, kan hlim zual ang a, kan inpui thui thei zawk ang maw le! Mi kan sawisel hma hian, kan dem hma hian, an lu bulah kun hniamin an thlirna zawn atangin thlir ve chhin phawt ila, hmasawnna tur a lang chiang zawk thin asin.
Share now