Hman lai hian nu pakhat hian fapa duhawm tak a nei a. A fapa mal neih chhun chu a thi ta hlauh mai a, a tuar em em a, a lungngai a, a lusun chu a na ngawih ngawih mai a. Mi thianghlim pakhat hnenah kalin, “Tawngtaiin emaw, i thiltihtheihna engemaw hmangin ka fapa ka neih let theih nan min pui teh?” a ti a.

Chu putar chuan thil theih loh tawp dil a nih thu hrilha hnawt bo mai lo leh, khawvel thil kalphung pangaite pawm tura lo zilh chiama lo counseling chiam ta lo chuan, “Kal la, lungngaihna la tawk miah lo in zawng chhuak la, chuta mi chu antam chi rawn la la, ilungngiahna tihreh nan kan hmang dawn nia,” a lo ti a.

Chu nu chu phur zetin a damdawi tur zawng tur chuan a kal chhuak ta a. In ropui tak pakhat hi a va pan a, kawngka an kik a. “Lungngaihna la tawk ve miah lo in ka zawng a, in ni mial em? Ka tan a pawimawh takzet a ni,” a va ti a.

An in leh lo han en chuan vanneihna in a bawm reng bik in ni mai awm hi a ni. A beisei pawh a sang hle. Mahse anni chuan, “I lo kalna hi a dik lo hlauh mai,” tiin tun hnai lawka vanduaina leh lungngaihna an tawh chanchin an lo hrilh ta teuh zawk a.

“He mite chhung hnem tur leh pui tur hian kei aia tha an awm bik lo ang, lungngaihna tawk ve hlim ka ni bawk si a,” tia inngaihtuah chungin a leng lut a, tanpui tur leh anmahni hnem tur chuan a thu muangchang ta a.

In dangah a kal leh a, lungngaihna la tawk miah lo in chu a zawng ta zel a.A kalna lam apiangah chuan thawnthu lungchhiatthlak tak leh vanduaina mak pui pui chanchin chu a hriat belh zel a ni mai a. A thlen chin apiangah lusun ve bawk hnem turin a thu khawmuang a, lungngaihna dang tawk mekte chu a titipui a, puih an ngaihnaah a pui zel a. A dawtah a kal leh a, chutiang chuan a ti zel a. Lungngaihna la tawk miah lo in chu a zawng hmu zo hek lo.

Antam chi thiltithei zawn zui nachang hre tawh lo khawpin midang tanpuiin a hmanhlel ta a. A hriat hauh lovin chu antamchi thiltithei zawn chuan a lungngaihna chu a lo tidam ta daih tih pawh a ngaihtuah chhuak chuang hek lo. Vanduaina hi kan chunga tla bik chauh emaw tih a awl viau thin. Lungngaihna hi kan tuar tam bik riaua inhriat changte pawh a awm fo.

Vanneihnain a duhsak loh bik, Pathian meuh pawhin a hawisan, a ngaihdam theih loh hial khawpa sual avanga hremna tawk mek nia inngaite pawh ka hmu tawh thin. Kan tawh chu inang vek lo mahse lungngaihna leh vanduaina hi chu in tinah a thleng theuh mai. A la thlen lohna inah pawh a la thleng dawn khawp.

Thihna hi mi tin ta a ni si a le! Hun harsa han tawh hian lungngaia indawm kun nilen maite hi a awl khawp. Thil theih loh pui pui ngaihtuah a, duthu sam a, chhan hleih theih loh beiseia tawngtai vak vak ringawtte pawh hi a awl phian ka ring.

Keini chauh kan ni bik lo tih ngaihtuah a, kan chunga thil thleng pawm chunga mi dang tanpui nana inpek zual sauh hi a hlawk zawk a, kan dam hma zawk bawk.Antam chi thiltithei hi nangmahah khan a awm sa e, zawng hla vak duh suh khai!