April thla kan lo chuang kai leh ta a, nimin khan simeikhu pakhat “April Fool’s Day Comet” an tih mai chuan mel maktaduai 13 a hnaiah lei hi a rawn thlawh pel a, hei hi kum za chhung khawvel a hnaih ber tum a ni nghe nghe a. He simeikhu hi Jupiter chhungkuaa mi a ni a, ni heltu zinga mi tho a nih avangin a khat tawkin lei hi a thlawh pel ve thin a ni. April thla hi pawisa kumthar a ni a, sorkar hmalakna thar pawh a awm nual thin. Pawisa kum a liam dawn hnai (A bikin March thla vel) hian budget sum hman zawh ngai a inchhek khawl tam thin avangin dawt bill leh phuahchawp sum hmanna a tam thin hle a. Tun hma atangin Sorkar kal danah hian pawisa kum tawp dawn hnai January atanga March thla chhung hian sum hman a tam zual thin hle a ni. Kan hriat angin nikum atang khan India economy-ah thil thleng leh inthlak danglam a awm nual a. Union budget pharh a ni a, nikum kum tawp lamah Rs 1000 leh Rs 500 note tihthih a ni a, February thla tirah union budget pharh a ni a, July thla atangin chhiah lak dan thar GST hman tum a ni bawk a. Chutiang karah chuan pawisa kumtharah hian thil thleng tur a awm nual dawn a ni. Pawisa kumtharah hian health insurance leh vehicle insurance tih man a to sawt dawn a. Kum hmasa aiin lirthei senso a tam dawn a, insurance agent-te commission ei tur a tam sawt dawn vangin health insurance pawh sen a tam sawt dawn bawk. Bank dawr thin tan tun hmaa awm ngai lo pawisa chawi a awm tawh dawn avangin fimkhur a ngai dawn. Private bank thenkhat - Axis te, HDFC te, ICICI bank te hi chuan March thla tir atang khan anmahni dawrtute hnena pawisa chawitir hi an lo ti tan tawh a. State Bank hian April thla atangin an chawitir ve dawn thung. SBI a savings account nei tan thla khat chhungin vawi thum chawi awm loin pawisa a dah luh theih a. Chumi bak dah lut tan vawi khatah Rs 50 leh service tax chawi belh a ngai tawh ang. Chubakah, bank a mobile phone hmanga pawisa thawnna Immediate Payment Service (IMPS) ah pawh Rs 1000 chung lamah chuan pawisa chawi a awm tawh dawn a. SBI account nei tan an account-ah pawisa a awm reng a ngai a, awmna khawpui len dan azirin pawisa hmun nghak (minimum balance) ngai zat erawh a inang lo a, pawisa awm sa tlem lutuk leh account khawi che khatte chuan an chawi tawh ang. Thla khat chhunga ATM atanga pawisa lak zat pawh bithliah a ni a, SBI account nei tan SBI ATM atangin vawi vawi nga aia tam lak chhuah chuan Rs 10 zel, bank dang ATM atanga vawi thum aia tam lak chhuah chuan Rs 20 zel chawi a ngai dawn a. SBI account-a Rs 25,000 nei tan ATM atanga lak chhuahin chawi a awm lo bawk ang. Pawisa kumthar atanga fimkhur ngai tak chu, sorkar laipui hian pawisa faia indawr chiam hi a phal tawh lo a. Thil leina a ni emaw pawisa fai Cheng nuai 2 aia tam in pek phal a ni tawh lo a, chutiang tilui man chhuah chu hrem theih an ni tawh. Sum hlawm lian deuhah chuan bank kal tlanga indawr zel tawh tur a nih chu. April thla hnu lama car siam chhuah man a to sawt dawn bawk a, chuvang chuan March thla ral hma khan mi tam tak chuan an lei a ni. Lirthei meikhu tihchhuah chungchangah dan thar a awm zel a, car model hrang hrangte an zawm ngei a ngai a. Hengte vang hian kumtharah hian car man a to sawt dawn a ni. A hma lama sawi tawh angin pawisa kum tawp dawn hnaiah phei chuan sum hman zawh dan tur an dap a, a then K-deposit-ah an dah a, dawt bill leh phuahchawp sum hmanna a tam a, eiruk pawh a hluar thin. Hei hi ‘rush of expenditure in the closing month of the financial year’ an ti a. Sorkar hi a lo inven lawk a, pawisa kum tawpa sum hman chiam pumpelh hi a tum tak tak a nih chuan engemaw chen chu thil a tih theih a. Tunah phei chuan pawisa kum tir atangin sum kan hmuh tur a hriat sa deuh vek tawh a, tun hma anga Delhi atanga lo kal tur lo ngaihchan a, lo sakuh ser nghah veng veng a, kum tawp lama an rawn pek chauh ang chi kha a tam tawh vak loin a rinawm. Sum lapse pawh hi sawi a ni ngai ta mang lo reng a ni. General Financial Rules 2005-ah chuan sorkar department hrang hrangten pawisa kum tawp dawn hnaia pawisa an hmang tam uchuak bik hi sum enkawl dan phung fel lohna a nih avangin pumpelh tur a ni, tiin a sawi nghe nghe a. Mahse, hei hi an zawm hlei thei lo kum tin thung. Kum 2009-2010 phei kha chuan Cheng vbc 70 chuang sorkarin sum a ti-lapse a nih kha.