Pa pakhatin an nupa chanchin min hrilh hi ngaihnawm ka ti tlat. “Kan nu hi arthial duh tak mai a ni tih hi ka lo hre ngai hauh lo a. Kum 6 kan inneihnaah ka hre ve chiah. Kei hi arthial leh a ril vel duh tak mai ka ni a. Ar kan talh apiangin ka nupui chuan a thial leh a rilphiar chu ka thlengah a dah ziah a, a duh ve lo a ni hi ka ti mai thin a.

“Zan khat chu ka puzawnin arpui tui lai min talhsak a, zanriah kan va eiho a. Pizawnin a fanu a hmangaihna leh duat châkna chu thup theih ni hek lo, ‘Hei hi a duh ber a nia,’ tih pahin a thial leh a rilphiar chu ka nupui thlengah chuan a dah ta mawlh mawlh mai a. Ka nupui lai lutuk chuan min sem ve mial mial bawk a.

“Zan lamah chuan ka zawt ta a. ‘Engati nge arthial leh a rilphiar vel i duh hle si a, i sawi ngai miah lo a?’ ka ti a. Ani chuan, ‘I duh ber a ni sia, hmuh i nuam alawm,’ a ti ta mai a. Hmangaihte an hlimna tur chuan a sa duh lai ber pawh chhungpuinu chuan a lo ngawihpui char char a nih chu,” a ti.

Nupa kara hmangaihna ropui tak lanchhuahna mawl tê, ril si, thawnthu ngaihnawm tak a ni e.

“Mim ang kan piang hmun ta si lo, chi leh kuang kan inhnaih hek lo. I chunnu leh ka zuapa lah, lai an innat kan hre hek lo. Engtin nge maw, nang mi hrang hian, ‘Duhlai’ tia min koh mai le?” tia mak ti taka Pu Vankhama’n a lo aupui nupa kara inhmangaihna hi a hi a mak reng a, a ril a, a thuk a, a pawimawh em em a ni.

Romeo & Juliet thawnthu mitthla chunga chhungte phal lo chung, hmangaihna hmachhuana inum dawr dawra innei tate chanchinte hi a ngaihnawm phian a. Hmangaihna dika an inhmangaih reng phei chuan thawnthu hlimawm takin a tawp zui thei fo. Chhungte zawng zawng induhtawn, anmahni pawh inhmangaih em ema innei inkarah hian hmangaihna dik a awm reng loh chuan thawnthu lungchhiathlak takah a chang leh lawi thei si.

“Inngaihzawn reite hi a tha e,” an ti a, Biak In hawng ngeia inneih an sawi mawi a. Kum tam tak inngaizawnga innei, hlim em ema damchhunga innei an awm laiin kum hnih khat bak innei ta chuang lo an awm fo a. Biak In hawng thlapa innei, zahawm tak leh hmuhnawm taka dam dun chhung zawnga hlim em em an awm laiin kar lova inthen leh ta mai mai an awm nawk bawk a. Kum li zet inngaizawng innei ta chuang lo te, thla thum lek inngaizawnga innei rei phian site an awm bawk.

Inngaihzawn rei te, inhriat chian te, chhungkaw rem tih tlan te, inneih dan te, inneihna hmun te hi a pawimawh viau. Chung zawng zawng ai chuan inhmangaihna a pawimawh zawk. Chu hmangaihna hrilhfiahna tha ber chu ‘inpekna’ a ni.

Hmangaihtu chuan ama nawmna aiin a hmangaih nawmna a ngai pawimawh a, a châk zawng aiin a duhlai duhzawng chu a dah lal zawk. A riltamna aiin a hmangaih puarna chu a pawimawh zawk a, a hmangaih hlimna chu a hlimna ber a ni thin. Arthial pawh ei châk ve hle mah se a pasal hlimna chu hmuhnawm a tih zawk tlat avangin a ei châk thu a sawi ngai lo a nih chu!

Chutiang hmangaihna chu nupa zawng zawng karah, a tawn tawnin awm se chhungkua hi kan hlim mai ang. Chhungkaw hlim hian khawtlang nuam, ram hmasawnna a hril daih a nia aw!