Thianpa Ramtea hian, “Hmeichhia chu, an nu te mizia atangin an mizia tur tlangpui a hriat theih ber. Nupui tha tak an ni dawn em tih pawh an nu te mizia atang bawkin hriat a awl ber,” a ti roh a, a hming pum hi C Lalramliana a ni na vang vang a, a thusawi erawh a dik ang reng fu mai. Hmeichhia hian a tha lamin emaw, a chhe lam pawha an chhun ber chu an mahni hringtu, an nu hi a ni tlat mai. Thenawm nu chhun ta daih hi an vang khawp mai. Pathian thu pawhin, “Fanuin a nu a chhun,” a tih mai kha maw.

Tlangval pakhat pawhin nupui a nei dawn a, chu a ngaihzawng, nupui atana a duh tak mai chu a pa hnenah a hrilh ta a. A pa chu a ngawi vang vang a, nakinah chuan, “A fel ang, a nu a fel em mai” a ti a nih chu. Hmeichhe fel, zaidam, khawsak tha, pasal te zah thiam tak te hian an mahni ang bawk fanu an nei chawk thin. Hei vang tak hian kan pi leh pute pawh kha nupui pasal zawn kawngah an fimkhur em em a, an thlahtute, an chhui hlat theih ber thlengin an chhui ngat ngat thin. Chhungkuaa kan ze tha lo hi kan thlahtu, pi leh pu atanga kan chhawm zel a ni duh khawp mai.

Mize tha lam inchhun a awlsam ang bawkin ze tha lo lam pawh hi inchhun zel a awl khawp mai. Kan sei lenna chhungkaw boruak hian kan mizia tur pawh a hril ber bawk. Chhungkua atanga kan mizia intuh nghet tawh hi puitlin hnuah pawh kan thlah tawh mang lo. Hei vang tak hian sei lenna chhungkaw boruak hi a pawimawh em em reng a ni. Nu khawsak tha, nu zaidam, nu hlim thei tak uapna hnuaiah chuan naupang pawh an hlim nge nge a, an thla a muang bawk a, an inhmangaih a, an puitlin thlengin an inngaihsak a, an inpawh nge nge bawk. 

Thufingin, “Sikul hnai ber chu nu te mal chung hi a ni,” a ti a, pa an pawimawh lo tihna ni lovin, a chhe lamin emaw, a tha lam pawha naupang mize siamtu ber chu nute hi an ni tlat a ni.  Mikhualnaah pawh pa ber chu ngawi reng mah se, nu berin tha taka min lo dawn sawn a, mi lo biak sawt sawt chuan kan tlang nel nghal thuai mai a ni. Pa berin min lo be lum lam viau mahse, nu ber a ngawih ngal mai chuan kan thla a ngam lo ru riau thin. 

Nu te hi an va pawimawhin, an va hlu em! ‘Nu tha chuan zirtirtu za a hen a ni’ an lo ti hial thin reng a ni. Heti taka an pawimawh chung hian an pawimawhna hre lo, fa te nungchang chhertu ber an ni tih pawh in hre lo hi an awm leh thin. Nu an hrat, chhun zana ang reng mai bulah chuan thla a ngam lo va, nupa nun a nuam thei lo va, chhungkaw nun a hlim thei lo a, naupang rilru thlengin nghawng pawi tak a nei thin. 

Chhungkaw pakhat ka hria a, an nu chu an hrat zet mai a ni a, a ang a, a phun reng a, a fate, naupang tete chu a sawisel reng a, an khawsak pawh a awl ai lutuk lo. An pa chu pa ngawichawi tak a ni a, chhunah nilengin hna a thawk a, tlaiah a lo hawng a, a tuka a zawrh leh tur bungrua hi bag khatin a rawn ak haw par par thin. Chuti chung chuan chu nu dawntawii pui roh chuan a fate hriatah a pasal chu a sawisel a, a rel a, a ang reng mai bawk a. An fate pawh an in kiltawih a, an zakzum em em a, an mitmeng a dul reih a, an hlim lo tih a hriat ngawih ngawih bawk. Chumi hnu chuan an chhungkaw chanchin chu ka hre zui ta lo vang vang a, thangkhat lian hnuah kan laichin nu pakhat, an thenawma awm thin chu an chanchin ka zawt a, chuta min chhanna chuan ka rilru a tina khawp mai, “An fapa upa zawk kha a inawkhlum a, a naupang zawk pawhin ruihhlo a khawih nasa khawp mai,” a ti a. Chu nu atna leh sualna chuan a nghawng na mang tak e maw! ‘Hmeichhe fing chuan chhungkua a din a, a a erawh chuan anmahni kut ngeiin an thiat thin’ tih Bible thufingte hi a dik hle a ni.

Nu khawsak tha, nu fel, nu zaidam, pasal te zah thiam chuan an chhungkua chu vanram tlafualah a chan tir a. Nu sual, nu an hrat, pasal te rel ching, fate sawisel reng mai leh an khum phiar phiar thin chuan an chhungkua chu hremhmun pateah a chantir thin. Solomona-a khan nupui 700 leh hmei 300 a nei a, hmeichhe mizia pawh a hre chiang viau ang a, hmeichhe tha leh hmeichhe sual inkar hlat zia pawh a hre chiang thawkhat hle bawk ang. A nupui za zual zingah khan an hmang tak te pawh an lo awm ve a ni mai thei. Chutianga hmeichhe inhauh hmang takte nena inzau taka awm ai chuan in chung chip kila awm a tha zawk a ti tawp mai. A chang leh, ‘Nupui an thinna chu englai pawha ruah far reng ang a ni’ (Thufingte 19:13) a ti bawk a. Kar khat lek khua a chen pawhin hrehawm kan ti a, englai pawha ruah far reng hnuaia awm chu hrehawm tak tur a ni. Chutiang chhungkuaa seilian chu naupang vanduai tak an ni bawk. Chutih laiin hmeichhe tha erawh nasa takin a fak thung a, chutiang hmeichhia chu, ‘Lalpa lak a mi’ a ti a, ‘A pasal tan lallukhum a ni’ a ti tawp mai a ni.