“Fimkhur ula, awhna reng reng lakah chuan inveng rawh u, sum ngah hi mihring dam chhan a ni love,”- Luka 12: 15

He Lal Isua thuchah hi  Kristiante kristian nun innghahna lai mu a ni. Sermon then khat nung mang hlei lo, awmze fum fe pawh nei lo ai chuan a tha zawk hle a ni. Zirtirna tlang lâwn tam tak ai pawhin he thu tawite hi a tha zawk êm êm bawk a ni.

He thusawitu hian fimkhur rawh u tiin bul a tan a, chu an fimkhurna tur chu awhna lakah a ni. Sum ngah hi atchilh loh tur a ni bur mai.

Awhna tih thu hi thil tha lo sawina a ni a. Awhna rilru  put hi a hah thlâk a,Awhna tel lova awm hi a thawven thlâk  bawk. Awhna rilru pu lo hian nun tum ila, chu chu a pawimawh  ber a ni.

Thuneihna hman sualte, eirukna leh hlemhlenate hi awhna sual avanga lo awm vek a ni a. Midangte thil neih awh tlatte hi sual lian tak chu a ni. Midang thil kan lo va it tlat chuan kan chan tâwkah kan lungawi lo hle tihna a ni a. Mi vanduai tak kan ni ang. Chuvangin mahni nihna ah te, mahni chanvoahte hian lungawi hmak mai ila. Chu chu hringnun kalkawng dik chu a ni.

He thil tha lo ber mai ‘AWHNA’ hi a huat thla la êm êm mai. Hringnun suattu pawh kan ti thei ang. Awhna chuan châkna a siam a, châkna chuan sual a hring nge nge  thin a ni. Ruih hlo ngaih te, zu ngawl vei te hi he awhna fa hrin tha lo tak hi a ni. A hun lova mahni nunna hial pawh lâk duhna a thlen thin.      Thang zawng zawng zingah awhna thanga awh hi a hlauhawm ber mai. Lal Isua pawhin he thanga awk hauh lo tur hian min duh a ni.

Chhungkua a chhiat chuan ramin a chhiatpui thin a ni. Minis­ter leh MLA zing a,an hlawh a lungawi thei lo te chuan sum lak luhna tur an zawng a, kawng an dap a, a rukin contract hna an thawk a. Midang, ngam tlakte hmingin hna an thawk a, mawi lo tak leh dik lo bak sakin sum an la lut thin a. An lungkham ber chu sum tam tak neih a ni. Hengho hnen atang hian thil tha reng hmuh tur a awm lo. A tawpa chhiatna a ni thin. A lemin ram an hmangaih a, a derin ram rawng an bawl thin. Ram tana thatna tur ai chuan an chhungkaw din chhuahna chu an thupui ber  a ni. Minister hausa, MLA sum ngah, Politician leh Officer kut tling lova hausate hi ramin a mamawh lo a nih hi! Ram mipui nghahfak chu sum awt lo, Minister, MLA leh Politician te an ni. Chu chu mipuiin an thlir mek a ni. Chân huam minister, rinawmna thupui bera nei thin mite hi Mizoram mamawh ber chu a ni.

Tangka rosum awh that lohzia chu hetiang hian sawi dawn tai la, a fiah thei mai ang em? Hna thawktu chuan a hlawh chu lawm takin la mai se, a bak beisei suh se. Inhlawhfa pawhin hun bi tuk chhung atana a thawh hlawh a lak tur chu la se, a bak hmuh beisei suh se. Miin a hlawh a chuang liam neih a tum chuan chu chu sual a ni a. itna leh awhna hi sual a ni. He awhna thanga mi a awh chuan thil tha a hmu dawn lo a ni. Sum ngainat luat avangin mi tha leh fak hlawh tak tak te pawh an  tluin an lo mualpho tawh thin a. Ding chhuak tur awm lo khawpin an mualpho nasa thei em em a ni.

Bible Thianghlim a kan hmuh angin Tangka sum ngainat hi sual tinreng bul a ni a. Ngaihtuahna mitdel khawpa miin sum ringawt a ngaihtuah chuan, a tirah hlim viau mahse a tawpah chuan chhiatna thlentu a ni thin. Mihring dam chhan a ni hek lo. 

Sum duh avanga Politics khel hoten chuan ram  an ti chhe mek a. Mipui an hruai khaw lo mek a ni. Rei lote tak chhunga hausak tum hi boralna a ni. Amah chauhvin a tuar lova, amah chauhvin a chhiatpui hek lo. A tuartu chu amah leh a chhungte an ni. Ram mipui mamawh chu sum awt lo, sum ngaina lo, sum it lo hruaitu a ni a. Khawtlangin chutiang mi chu a zawng reng a. Ramin chutiang mi chu a mamawh a.Chutiangin sum tlemte leh tam tak hnawl ngam Pastor te, Kohhran chu a ni.

Hmasawnnain sum awhna a thlen tur a ni lova, rilru phir si te chan chu ral thumna a ni. Tha leh tula i hriat kha ral thûmna ni suh se. Sawrkar hna i thawk a, I hlawhah lungawiin chumi mil chuan inrel bawl mai rawh. I hlawh lak zat hre reng chungin i chhungkua enkawl rawh. 

Eng nge i damchhan, engvanga tun thlenga nung dama awm nge i nih? I nupui sum âtchilh avanga in tuarna a thleng em? I pasal a 'corrupt' luat tuk avanga in chhungkaw tuarna kha han chhut teh. He rilru tenawm tak ‘AWHNA THINLUNG’ hi i paih hun hun ah i dam ang. In chhungkua in dam ang a, Kohhran pawh chutiang zelin a nung dawn a ni. Khawtlang a dam ang a, i ram a dam ang. Chu ram chu Mizoram hi a ni.