Awma chu ka thianpa a ni. A chanchin hi ziah ka dîl a; a phal avangin a chungah làwm thû ka sawi hmasa e.

Awma chu mei zu mi a ni—nasa tak meizial zu mi. A cancer hman têp. Mei zû han tihah pawh ani chu zu tak a ni. Inbual pah paw’n zu zû a! A ni alâwm khûk loh lai a neih hi a inhmeh lo hial. A hming hi DC emaw ukil emaw remtihnaa thlâk tur ni ta se, ‘Awmkhurenga’ tiin a chhûngte paw’n an thlâksak duh hial ta ve ang. ‘Thianpa, kei chu kan nu nena nupa nun kan hman lai paw’n ka fâwp khu reng tho!’ zu ti a. Mahse, chu pa chuan mei chu a nghei!

Awma chuan zû a in ve lo—keini angin! Kan zu inhonaah a rawn tel ve fo. Mineral water hi a inchhawp ve mai a; a ‘hot’ ber berah a tang ziah. Hmâna, kan tleirâwl laia Capstan filter loh cheng 5-a bawm hnih, Zarkawt kawna Kimi Dâwra kan lei thin lai atanga mei zu tan tawh kha a ni a. Hetia, tûna chuap chhe tawh lutuk cigarette bâwma a chuan hnû thleng hian a zu reng a; mahse, vawiinah chuan a nghei tawh!

Tum khat chu a damlo a; a na vak mai. A chhan an hre hlei thei si lo a. ‘Ka chuap a nih ka hlau ber!’ a ti tawl a. Khuh bur bur chungin a fâwp zui reng a—a Capstan bawk chu. Daktawr thu a rawn thleng ta—biopsy lâk a ngai ta tlat! E he le!

Ama’n a ti alâwm: ‘Thianpa, khatia, ka cancer leh cancer loh test a ngai tih ka hriat khan ka ni ve nghulh mai! Mei hi ka nghei a ngai tih ka inhre chiang a. Mahse, chuti teh ngawta han nghei thut chu ka tuar dâwn tih ka inhre si a. Mahse, bi-opsy an lâk hma ngeiin, mipa ka nihna ang leh, ka fate pa ka nihna angin ka nghei ang ka ti a; ka nghei mai,’ a ti.

Vanneih asiamin a cancer leh si lo; mahse, Capstan chu a zu zui hek lo!

Thil reng reng hian addiction a keng vek a. Lian leh tê deuhah kan lo thliar ve mai mai a ni. Sahdah addict chu case tê deuh; zû chu case sâng fû … a ngheia hi, kan harsat vek fû. Mahse, tum phawt chuan engkim hi a nghei theih a ni. Eng pawh hi, sima nghei theih tûra siam vek a lo ni, tih Awma nun atang pawh hian a chiang hlein ka hria.