Ka hmelhriat tha tak maiin a fanu Class 12 pass ve avanga a lawmzia thu Facebook-a a tarlan chu ka hmu a. Lawmpuina thu tawi te, ‘congrats’ tih ringawt chu ziakin, ka va thawn ve a. Ka thawn zawh chiah chuan ka thuziak ‘congrats’ tih chu rawng senin a rawn inthlak a, ka phone hnuai lam atang chuan balloon lem a rawn invawrh chhuak ta chuai chuai mai a nih chu!

Facebook-ah hian eng eng emaw han ziah ve zauh ka ching a. Thu tha deuh ziak vea inhriat riau changte hi ka’n nei ve tlat pek a! Mahse, ziak tha ka intih ve tum pawhin ka thuziak hawrawp rawng hi amahin a inthlak sen ngai lo va, balloon pawh a rawn chhuak ve ngai lo reng reng nia!!

Thu tawi te, mi dang ka va lawmpuina thu ka ziah khan balloon ka hlawh tlat! Kha balloon rawn chhuak kha ka va lawmpuite khan lo hmu se, lawmpuina balloon ka va thawn a ni ang a, an lo hlimpui viau thei. Mahse an lo hmu ve em ka hre lo, an hmuh loh ka ring. Kei, a ziaktu hmuh tur khan a rawn chhuak tlat! Baloon kha keiman ka dawng tlat!

Ka hlimpui ta phian a. Naupang thil lawm takin balloon lo chhuak chu ka phurpui ta pek a. Fb ka hawn fuh ve tuma Class 12 rizal lo tlangaupui ho ka hmuh fuh apiang (ka zawng hranpa lo) chu ka thawn ta zel a. Balloon chu ka hlawh zel bawk a.

Mi ka va lawmpui chu ka hlimpui ta phian a nih chu! Chu chu a lo Pathian thu riau lehnghal. “Lawmte chu lawmpui ula,” tih kha Pathian thuah a awm kha.

Fb siamtuten hetia an siam chhan hi ka hre lo. Pathian thu nen inhmeh an tih vang pawh a ni lo ang. Congrats tih thu leh balloon han chhuah kha inremin an hria ang a, an ti ve satliah a ni mai mai ang.

Pathian thuin lawmte lawmpui tura min tih chhan hi ka hre fuh vak ngai lo, kei, Pathian thu atanga hlawkna tel tum fotu hian! Kei, mahni hmasial thin, mahni tana tha ngaihtuah ran thin hian mi va lawmpui hi ‘a Pathian thu e’ tih bak, ka hlawkpui dan tur ka hre ngai lo. Thih hnu piah lama Vanram kai ngei duh avanga Pathian tih hram hram thin tan hian mi lawmna va lawmpui kha eng nge a sawtna? Miin hlawhtlinna an chan khan sum leh paiah ka lo hlawk ve azeng pawh a ni si lo!

Mi kan va lawmpui hian keimahniah hlimna a lo thlen thei reng tih ka hre chhuak ta a nih chu! Mi dang er miah lova ka lo lawm ve tak tak theih zel chuan depression te hi a reh duh dawn riau nia!

Mahni malsawmna dawn tam tak chungah pawh lawm hleithei lo tan erawh chuan mi dang malsawmna dawn lawmpui chu har tak a ni ang. Mahse Pathian thu a ni si.

“Lawmte chu lawmpui ula, tapte chu tahpui rawh u,” tih thu a awm a nih kha. Tapte tahpui hi a har lo. Ka insum thei lo ve fo tawh. Kan tahpuite tan a tha ang. Kan tuarpui tih an hria ang a, tuarpuitu neih kha an thinlungin a ngeih ang. A hnem ang. An tan a tha ngei ang. Ka tan erawh a thatna a awm vak lo thei, Pathian thu zawm ka nihna mai lo chu.

Lawmte lawmpui hi thil har tak niin ka hria. An lawmna a len phei chuan thik titih te a awl hial. Miin rangkachak tlang lianpui chhar se, min sem ve chuan loh phei chuan lo lawmpui ve ngawt a harsa viau mai thei. Keiman lo chhar zawk ila aw, tiin kan indawm kun zawk mai thei. Va lawmpui chiam lo mah ila, anni chu an lawm tho ang.

Mahse lawmte kan lawmpui theih chuan, an tan ni lovin kan tan a tha ve thung. Pathian thu awih, nakina chan tha chang thei kan nih bakah, he leia kan nun chhunga kan rilru hian a lo ngeih alawm! Kan hlim tlat. Hlim hi a hlawk. Nun a nuam a, kan harhvang a, kan mu tui a, chaw ei a tui a, nun a hlawk a, kan lung thleng hian a ngeih a nih chu!

Lawm reng thei nun hi a changkang tlat! Mahni chunga thil thlengah lawm thiam ila. Mi chunga thil tha thleng lawmpui zel bawk ila. Lawm zel nun leh vanram hi a inhnaih kuar bik tlat a nih chu.

Mi ka va lawmpui avanga Balloon ka hlawh chhuak kha ka hlimpui tlat a, lawm zel theih nun hlawkna ka chhar phah ta hial a nih hi! Lawmte lawmpui ve rawh, balloon i hlawh ve mai ang.