Nu leh pate u, kan fate taksa, rilru leh thlarau nun hi chik a ngai viau a nia aw! Keimahni avanga lo piang an nih kha! Thil dang chu sawi kai rih lo ila, an taksate hi en uluk ve fo a tha a nia!

Hmanah drugs inchiuna hnuhma chungchang ka titipui tawh. Tun tum chu an bâna inrin, inzaina hnuhma awm thei hi kan tute, kan fateah i chik teh ang u tiin kan sawm leh teh ang che u. Ser tam tak, te deuh leh hraw deuh pawh a ni thei. I fate bânah a awm em? Blade leh thil hriam danga anmahni an inzaina a ni thei.?Hmeichhiain an uar deuh. Mipa inzai ching pawh an awm ve.

Fashion a ni lo. Ramhuai thil pawh a ni lo. Setana biakna pawh a ni lo. Thisena inthawina lam a ni lo. Thil serious dang zawk a ni.

An rilru a hah vang a ni. Hrehawm tuar entirna a ni.

An rilru hah chhan te, an hrehawm tawrhte a inang lo ang. Ngaihven an ngai a, puih an ngai tihna a ni. Ngaihven tha vat ang che, a aia pawi thui a thlen hmain! Mi thiamte chuan suicide hmahruai a ni thei e an tih chu maw le! Mi thenkhat erawh thih duh vanga inzai an ni lem lo. Chhan hrang hrang a awm thei. A chhan chu engvang pawh ni se, ngaihthah chi a ni lo. An ipikin eng emawin a tihrehawm tihna a ni. Puitu an mamawh a, tanpuitu an au tih entirna a ni chawk.

Engti zawng emawa puih an ngai tihna a ni. Chhungkuaa chinfel mai theih a ni mai thei a, chhungkuaa in inpuih theih bak a awm chuan puitu dang zawng ang che u.

Thalaite u, hei hi kan chah ve thung ang che u. In rilru a hah a, hrehawm in tawrh a, in thaw a pik a, in tawt up up a, thih daih chak khawpa in nat khan in ban zai nghal ngawt suh u. Hruihrual pawh chuh hek suh u. Pathian au vat rawh u.

Hruaitu ropui Mosia thih châk pawhin Pathian a au a, thih a dil a, a kutah a innghat mai thung. Mosia thih châk hi a demawm lem loh e. A hna kha a khirh ve em a, a manganthlak ve em a ni! Mahse, entawn tur kan nei. Mosia thih daih châk khawpa mangang kha amahin a lo inzai thi pheng phung lo. Hruihrual pawh a chuh nghal lem lo. A rui lem lo. Amahin chet a la hranpa lo. Dawhthei takin chung lam aw a ngaichang mai a ni. Thih a dil khan Pathianin remti se chu a rawn ‘knock out’ nghal daih ang chu! Mahse, a remti lo a niang, a thihtir nghal lo tlat!

I rilru a hah a, i thaw a pik hle a, dam reng pawh i châk loh lai khan Pathian ngaichang ve rawh. I duh leh, zana i mut dawnah Pathian hnenah thih dil ve la, a tuka in harh leh luau erawh chuan Pathianin i dam tul a la ti tih pawm la, thih tum hranpa lo mai rawh.

Pathian hmanrua atan pui theitu tur che u zawng hreh lo bawk teh u. Pathian hi a ropui khawp a, agent a ngah a nia! In nu leh pa, in chhungte, in thiante, in ngaihzawngte, Pastor, Upa, thalai hruaitu, daktawr etc pan hreh lo ula. Thuruk vawnpui thei tur che u pui duhtu che u an awm teuh a nia!

Thawka phita inzai thi nghal sung mai te, hrehawm tawrh deuh apianga thih tum nghal zel mai hi sim teh ang u. Paula’n, “Min tichaktuah chuan engkim ka tithei a ni,” a tih theih chhan ‘tichaktu’ hi a la nung reng a nia! Kan thei ve tur a ni.