Dawrpui lane phei chhak tlang chu Civil Hospital te, Police Thana te, District jail te a ni, a piah tlang bawk chu Babu tlang hnai zawk kan ti mai. Khai aw.. He District jail-ah hian 1966 ram buai khan, office atangin sipaiin min rawn la a, ka tang ran mai. Jail Warder kha Mizo an nih thin avang khan an ring zo lo ni maw.. CRP khan min veng a, chhungten chaw min rawn pek hian tiffin carrier chhawng tam thei ang ber an rawn hmang a, a chung berah bawng chek, a rul lang luauin an rawn dah a, a dawtah chaw, a hnuai lamah kha chuan kuhva leh vaihlo zial. Khatia CRP-in an han hawn khan Bawng chek dum ngun mai kha an han hmuh khan DUT an tia, a hnuai lama thil phal loh, meizial leh kuhva an rawn thawn theih phah a tha zet a ni. He thil tih ruk dan hi U Thlengliana NCL (Non-criminal lunatic)-a tang vein min hrilh a nia, ka hlawkpui nasa.

Dawrpui pheia Mosulman mosque bula Azim khana te kan tih mai atanga chhim lam tlangdung phei zar zar chu Assam Rifles ram vek a ni phei ta a, Sipai lammual te, Canteen te, Thirdeng te Sipai hnuaiah vek an awm. Canteen sawi takah Canteen bangah chuan lamlian atanga hmuh theihin darthlalang MAK 3 a awm thin a. Tawina te, euna te leh kemna te an ni. Hming sawi lo mai ila, hmeichhe tleirawlho, puan la sin lo, kawr fual chauh ha, hnute umtir thianzain an kal pel a, phawk an chhuah ta a. Darthlalang lam hawi chuan an thutung a, min hrilh danin chung darthlalang makah chuan an zahmawh engtin nge a awm hmuh an duh a, thutungin an han hlim a ni awm a, a tawinaah chuan a bing em em a, a eunaah chuan a eu ual mai a, kemnaah chuan kem kum duk mai tiin min hrilh.

Lammual chhim lamah chuan Assam Rifles Quarter Guard a awm a, tun thlenga an la hman khi. A chhak tlang bahrik chu baza tlang te kan tihsak a, khatih lai khan tuna an band party ang hi an awm ka hre lo. Khuangpui, khuang lai, khuang te, baza leh tawtawrawt ni maiin ka hria. Scotch-ho uniform ang lampang hian an inchei bik a, an mawi teh thin asin. An bazaa ribbon an khaite pawh a hring mawi thin a nia.

Assam Rifles ram tawp kawng bulah chuan Loch Sap hriatrengna lung kawng bulah bawk phun a ni. A thlang mai chu Dak inpui (Head post office) a ni. Post Office tlang pawngah chuan Superintendent, Lushai Hill office leh a bulah Treasury (tangka in) a awm. Tin, dak in chhim lam kawng kamah chuan sapte office a awm bawk.

Chuta tanga chhim lam kawngkam (tlak lam) chu 1924-18 a France ram kala zuk boral tate hriatrengna te, 1939-45 World War II indonaa thite hriatrengna lung te a awm a, a dawtah chuan Sap thlanmual kan tih thin a awm, Sapvation sap Vethadasen, accident-a thite pawh kha phum a ni. A thlan pawh ka lai ve nghe nghe a, kha salvation sap kha a khawngaihthlak hle.