Sap thlanmual dawt chhim lam thlang mual chu Bawrhsap bangla (tunah Governor bangla) a ni, compound zau nuam tak, felfai taka enkawl a nih avangin rala khatah pawh hmuh a nuam hle. Chu bangla kawt thla, lamlian sirah chuan zawl zim tê a awm a, chu chu Ai hmun a ni thin an ti a, chu zawm zim tê chu he kan khawpuiin AIZAWL hming a put phahna hmun hi zuk nia! Khi a sirah lung pawh an phun khi.

Bawrhsap bangla kawt lamlian thlangah chuan tuikhuah 2 a zawnin a awm a, Bawrhsap tuikhuah chhakta zawk/thlangta zawk tiin kan sawi ber. A chhakta zawk chu a tawp a, tui chenna tlak a ni lo, Vai Pathian ban 10 nei hi Durga Puja hian an paih thin a, tleirawl lai chuan kan zui ve a, an paih veleh kan lut ve a, kan hnuk chhuak a, an lukhum, puan, tih angreng kan inchuh thin! Tuikhuah thlangta zawk chu a thuk deuh a, nut pawh a nu nep deuh zawk a, tui chen kan hrat hle thin.

Bawrhsap bangla piah lamlian chhakta zawk leh thlang zawk inkarah chuan Circuit Bangla tha tak a awm bawk, sawrkhar hnathawk khianzinho thlenna ni maw ka ti mai. Chu Circuit Bangla chhak lamlian chhak zawk kawngkamah chuan Tlaizawng kung 10/15 vel hi an phun a, a par lai chuan a mawi takmeuh thin, sava te te - Kireuh, tlaiberh, tik tik, chetchet tih angreng hian a par zy an tlan nasa thei (U Vankhaman a phuah chhuan kha chu Assam Rifles Qr. Guard bula chhe zet saw a ni an ti daih thung!) Bawrhsap bangla gate chhim kawtchhuah bul atang chuan tlang (Tuikhuah tlang) lam panin lamlian tê deuh zawk a chho ta a, chu Tuikhuahtlang tui khuah chu Chowkider, Gorkhali pakhatin a veng a, lawnglêng a nei bawk a, a thian fai thin. Tuipu quarters bulah chuan Supera kan ti mai a, PWD, SDO quarters a awm bawk.

Bawrhsap bangla chhim lam lamlian kha chhunzawm leh ta ila, Tlaizawng tlar chhim lam lamlian sir zar zarah khan a awih em avangin khup chen emaw hian lung an rem a, mual hnihah, a chhim lam zawk tawpah chuan Naih Sabinga lung an phun a (a chhiah tawh avangin, tunlai hian Aizawl Mihlun group-in siam that tumin pawisa an thawhkhawm mek a, nuai chuang an ngah tawh niin ka hria). Chu Sabinga lung atang chuan chhukin lamlian hnuai zawk kal pel ila, Vai Hmeichhe Veng a lo awm a, hetah hian Gorkhali dawrkai tlem an awm a. A ralah Vai hmeichhe damdawi in leh a chhak tlang chu Sipai nupuiho awmna a ni (Family lane). Tuikhuahtlang thutah (Aizawl South) Sikulpui (Middle English School) leh Sikul sen (Vai sikul) a awm bawk. Sikul kawn thlen hma kawng leh kawng inkarah Primary sikul a awm a, a kawmthlangah Subedar pension Khuptuaha kan tih mai (PP John) a awm a, a til hi a khup thlenga uai fual khawpin zuk puka le! Khuptuaha te huan mawng chu sikulpui huan a ni. Manual work ni-a sikul naupang hnathawhna, Serthlum kung 30 emaw lai a awm thin.