Tun thla hi vaiho kutpui pawimawh ‘diwali’ leh an puja thla a ni a, kum dang ang bawkin vai sumdawngten an thil zawrh an titlawm nasa hle a, mamawh tinreng phai lam atanga chaw lut kan ni bawk si a, internet hmanga hmanga awlsam taka chah theih a lo ni leh zel a, a tih chi ang reng khawp mai. Vaiho ang lo takin Mizoramah chuan kan hunpui Krismas leh Kumthar bazaar laiin sumdawngten thawmhnaw man an tito uchuak em em thung a, kum a thar chiaha an titlawm leh vak thin lawi si. Chutiang chu kumtin dan a ni a, ngaihtuah chian chuan a zia lo khawp mai. Mizoram sum leh pai (economy) innghahna pui ber hi sorkar sum hman (Govt spending) hi a mai a. Contractor/supplier ten bill an lak te, NLUP sem te, zirlaiten scholarship an lak te, sorkar hnathawkten hlawh an lak te, ni za inhlawhna a awm chang hian sum leng vak a tam a, sumdawngte pawhin chu chu an lo chang thin a ni. Krismas bazaar hun laia sorkarin sum harsatna a tawh chuan mipui nawlpui a nghawng a, sumdawngte mai bakah kohhran thlengin a nghawng thin. Chuvang chuan tunhma pawh khan sum harsatna karah pawh sorkarin hnathawkte hlawh pek hram hram a tum thin a ni. Chutiang vela economy derthawng, sorkara atanga sum leng vaka innghat mai chu kan ni a. Kan mamawh tam ber hi state pawn atanga kan lakluh a nih leh zel avangin Mizoram chhungah sum a tang rei thei lo a, rei lo te chhungin a luang chhuak leh duak leh thin. Krismas leh kumthar vuakvetah hian sum kan hmang nasa zual a, ni dang aiin sum leng vak pawh a tam viau. Chutih hun lai chu sumdawngte pawhin an chuh a, thawmhnaw man an chhiar to ta vak ni berin a lang. Reilo te chhunga hlep teuh leh hlawk vak duhna vang a ni ber awm e. Hetiang hunpui thlen lai hian ram danga an tih dan angin thawmhnaw leh bungraw man te hi tlawm ta sela chuan mipui tan a zia viauin a rinawm. Ngaihtuah chian chuan mitinin silhfen leh thil dang atana sum kan hman uar lai taka a man a to uchuak thin hi a tuar nasa bertu chu a retheih thei an ni, rethei leh hausa kar pawh a zau phah bawk. Sumdawngte hian chhut chiang se, an thil zawrh hi a man pangngai emaw a aia tlawmin emaw zuar ta se an hralh hnem anga, a hlawk zawkin a rinawm. Chuvang chu a ni ngei ang hetiang hun, hunpui chuha thil an lei tam lai hian vairamah pawh an tihtlawm thin. Hlawk vak duhna te, rei lo te chhunga hlep chiam duhna te hi a hnuah a tlo lo fo thin. Dik tak chuan kan rama sum leng vak atanga chhut hian sumdawng leh sumdawng lote pawh hi (kut tling lo a sum an la lut a nih ngawt loh chuan) rei lo te chhunga hausak thut hi a har viauin a rinawm. Chutianga hausa thut chu kan zingah hian an awm leh thin a, mahse, an sum hnar bakah kut tling lo a deh chhuah an nei telin mipuiin kan ring ru tlat thin a nih hi. Krismas bazaar chungchang sawi takah chuan hetih hun laia hmun hrang hrang atanga Aizawl fuankhawmte leh Aizawla lo cheng sate hi Mizoram mipui zatve chuang fe kan tling thinin a rinawm a. Bazaarpui pakhat leh a penhleh tlemte hian mipui nuai nga chuang bazaarna hi a dawl zo meuh lo a nih hi. Kan bazaarpui ber phei hi chu a hmunhma a rem tawk lo a, mipui chet velna tur a zau tawk lo khawp mai bawk a. Tawng thu chhe loah rikrum thil eng emaw thleng palh ta se kan buai dan tur hi chhut thui ngam chi pawh a ni lo. Millenium Centre hi awm lo phei se la chuan bazaar vel tawt dan tur hi sawiin a siak lo. Hman deuha Aizawl hi a mi cheng zat (population) atanga chhutin khawpui lian (City) a tling tawh an tih rual khan town bus pawh city bus tia thlak nghal a nih kha. Khawpui inrelbawlna/sorkar (Municipal corporation) hial kan nei tawh bawk. Chutihlaiin, mihring nuaih li vel chenna ni chung sia bazaar lian pakhat chauh a awm hi a inhmeh vak lo. Bazaarpui ber lah hi ruahmanna mumal awm miah lo a ni a, chawhmeh/thlai zawrhna te, thawmhnaw zawrhna te, sa zawrhna te, secondhand zawrhna te, thingpui dawr te hi a inluhthelh a, a inpawlhsawp kual nuaih mai a nih hi. Smart city kan tuipui viau lai hian kan bazaar vel hi a smart lo khawp mai. Khawpui hmasawnna tura hmalatute leh ruahmanna hrang hrang buaipuitute hian bazaar dang lian tak, changkang tak ngaihtuah tel se. Khawpui laili a engkim dah khawm duhna te pawh hi paih bo a hun tawh khawp mai. Khawpui fem deuhah te hian bazaar lian tak te hi awm ta se, khawpui zauhna atan pawh a tha viau ang. Ram awl a vang tawh a, hmunhma tha tak bazaar lian tak dawl zo tur pawh a vang tawh viau maithei. Falkland vela hmunawl awm thinte lah mi hausate an invalh zo leh tawh si a. Khawpui than zel dan ngaihtuah hian a lailia inekbeng chiam hi a him lo tial tial dawn a. Chuvangin bazaar hmun tur pahnih/pathum vel ruahman lawk a hun khawp mai.