Piang nawn leh miah tawh lo tûr leh vawi khat chauh thi tûra piang vek mihringte hi, kan dam chhûng rei loteah hian hnung tawlh loa hma sâwn tuma kal zir vek kan ni a. ‘Ka hlawhtling ta; hei bâk hlen tûr ka nei tawh chuang lo e!’ intih tik nî lah, thlâna zalh kan nih hma chuan kan thleng ngai dâwn lo a nih hmêl si a. Nun hi zir lai a nih miau avangin kan dam chhûng hi chuan zirlai kan nih a ngai reng dâwn a nih hi.

Kan dam chhûng, zirlai kan nih lai hian, hma kan sâwn theihna tûra min dâltu tam tak zînga lian ber fo chu—benga kan hriat thin ‘thâwm bengchheng’ tak tak hi an ni thin. Thâwm bengchheng ka tiha chu: ‘I thei ve lo ang; i tlin ngai lo ang! I tih ve atân chuan a sâng lam hret a ni!’ tih te, ‘ “Mi pawn an tih theih chuan ka ti ve thei ang,” an tih vâng ngawta i tih ve chî a ni kher lo!’ tih rîte hi, hlawhtlinna kan zawhnaa kawnga thâwm bengchheng berte an ni fo.

Sap thawnthu, naupan laia ka chhiar kha ka la hre reng mai. Utawk rual zînga pahnih, khuarkhurûma tlâte chanchin kha: An thiante nên an inzui diah diah laiin anni pahnih chu khuarkhurûmah an tla palh hlauh mai a. An tlâkna chu a thûk êm êm mai lehnghal. An thiante chuan khur ko tlâng atang chuan an zu bih thap a. ‘In tlâkna chu a va thûk ve le… inhai chhuahna chi ziazâng a nih lo kha… Pui tûr che u-in tu mah kan rawn chhuk thei dêr si lo a,’ tiin khawngaihna ai maha diriamna rilru nên an au el hlawm a. Mahse, chûng utawk pahnihte chu khuarkhurûm atanga zuan chhuah tumin theih tâwp chhuahin an zuang an zuang reng tho a. Ko tlâng atanga anmahni thlîrtuten beidawnsan mai tûra an tih hnu chuan pakhat zâwk chuan an thiante thu sawi chu awihin a chawlhsan ta mai a; a hnuah a chau lutuk chu a thi zui ta hial! Pakhat zâwk erawh chuan beidawng ve duh miah loin a la zuang lui târh târh reng tho a. A tâwpa tâwpah, mak tak maiin ko tlangah chuan a zuang chhuak ta hlawl mai a ni.

A thiante chuan, ‘ “I rawn zuang chhuak thei lo ang; i thi ve mai ang, chawlhsan mai rawh,” kan tih kan tih che kha i hre lo em ni?’ tia an zawh chuan, chu utawk dam khaw chhuak chuan a thiante hnênah chuan bengngawng a nih thu a hrilh ta a. An lo auh vak vaknate chu, zuang chhuak ngei tûra amah lo au phûra beidawng loa tang tâng tâng tûra an fuihna emaw a tih thute a hrilh bawk a.

Miten, kan zir laiah emaw kan thil tih leh kan hna thawhah emaw, theih tâwp chhuaha kan beih ve tâng tâng laia, kan theih tak tak an rin loh thu min hrilh hun lai tak hi, bengchhêt ang maia beng kan chhut ngawn luih hun a ni ve tlat thin. Theih tâwp chhuaha kan thawh chhuah ve chhun chhun te; kan zir ve tâng tâng te; kan thu ziah leh kan hla phuah ve ang ang te, tuten emaw min lo sawi sêlsaka min lo auh el thinnna thâwmte hi, rilru ti hnualtua hmang loin min fuihtuah hmang thiam thin ila, hringnun zir laiah hian, kan fail reng bîk miah lo ang le!