Doctor thiam rual titi ko tlanga ka dah phak ve tum khan an sawi uar ber chu, ‘Covid19 vaccine an siam chhuah a, kan zavaia kan him kim hma chu dam khawchhuak tura lo fimkhur zual leh a ngai’ tih kha a ni.

Dam tuma theihtawp chhuah phawt a tha a nih chu. A rethei thei hian dam kan mamawh a nia. Retheihna chhuanlama hlau hleithei lova insawi an awm thin an ti. Pui khat sawr (Kus Vala tawngkam ka hriatreng a ni, chhungkuaa thawk chhuaktu pakhat chauh awm, bawngpui pakhat hnute chauh sawra intungnung tihna a ni) ngat phei chuan retheihna chhuanlamin Covid19 leh min tihlum thei thil dang hi hlauh hle zawk tur a ni. Hnute sawr lai ber hi kan kulcho vaih chuan kan chhe der dawn asin.  Rethei zinga thawk thei lo awm hi a pawi bik.

Hnathawh chu a ngai alawm. A dik. Thawhna hmunah a fimkhur theih e. Doctor-ho kam liam ka chân ni khan, Dr. Dona chuan Covid19 kai a lo en ve thu an sawi a. Mahse, ‘Ani atang kha chuan ka kai lo ang, ka fimkhur,’ a ti hmiah. A confi tlat! Kan lo chet velna lamah Covid19 kai an awm thu kan hre hnuhnawh thei. “Ka kai lo ang, ka fimkhur,” ti ve thei tur khawpa khawsak theih a ni.

Covid19 nena len dun dan kan zir a ngai an ti fo. A dik e. Len dun tih vanga hmanlai anga awm tum rih kher a ngai lo.

Nupui pasal neih khap a ni lo. Mi tlem tê kal mai tur a ni. Sum a hek lo ting mai. Mi pahnih inkara hmangaihna hi inneih inkhawm an tam avanga pung tur pawh ni hlei lo, tlem rem rawm, tak zeta tih then hunlai a ni zawk. Sum ngah vak lo tan phei chuan timing lutuk!!

Mitthi vui leh ral khap a ni lo. Mitthi kan buaipui dan leh inral dan a danglam hret a ngai rih.  Mi thenkhatin kan Mizona a bo an hlauthawng a, kan inngaihsak lo hlen ang tih an hlau. Kum khat vel nunphung tihdanglam a ngaih avanga chhungril Mizona a bo nghal dawn chuan kan lo va ril awm lo em tih ka ngaihtuah! Nula phai awm, kum khat hnua lo haw, tawng rawn pai deuh leh chaicheh pawh rawn hre ta lo kan nuihzat ang vel kha kan ni fur dawn tihna a niang!

Pathian zarah dam phawt ila, muang leiah, mitthi lu menin kan la zai tlaivar leh ang a, vui niah a khawnawtin kan inthlahliam leh ang a, Mizo takin mitthi ral kan insulpel leh nuk nuk ang chu le! Kum khat kan tih theih loh avanga Mizona hloh inringte khan lo hloh lo hram teh u. Mizo dik tak chu khawiah pawh, engtik hunah pawh a Mizo mai thin a, a hun azirin a Mizona a lo lang mai thin.

Inkhawm loh rei avanga thlarau lama dâ kan awm a nih chuan kan lo va tak awm lo em! Chhungril nuna dikna leh takna awm si lo, rilru sual pu chunga insawmkhawm chawpa inkhawmpui ning Pathian (Isaiah bung 1) hian chhungril nun inenfiahna hun min pe a ni rih zawk lo maw? Chhungkuaa Amah la be ho thei lo kan la tam ang a, chumi hun chu min nghak phawtte hi a lo ni lo’ng maw?

Dam phawt ila, chhungkaw kima amah fak chak chung leh thinlung thianghlim zawkin Biak in ngeiah kan la inkhawm leh mup mup dawn nia! Biak ina inkhawm tur awm leh turin dam phawt ang u. Khuang ri avanga phur chawp ni lo, mi dang tihphur chawp ngai lova nghet taka Pathian tana eng chen pawh  mal din tlang ngam thak hi thlarau dan dik zawk tur a ni.

Mi thenkhat phei chuan TV-a thusawi ngaihthlak turte hi awm lo se an duh nia! A chhan a awm ve thung. Nakinah Biak ina inkhawm peih lo, TV thusawi chauh duhtawk an awm an hlau. Boruak ralmuan hnu pawha ringtu inpawlkhawmna hmun Biak in pan peih tawh lo kan awm a nih chuan, Covid19 hma pawh khan kan lo ngaihtuahawm sa reng tawh tihna a ni zawk ang.

Kan la inkhawm thei lo a nih chuan, dawhthei takin nghak ve mai teh ang u. Dem tur zawn a ngai lo ve. Kan hun tawnin a zir lo a ni mai. Babulon lui kama Zion ngaia chiau vawng vawng, mi rama Lalpa hla sa thei lova hrehawm ti em ema kun tlawk tlawkte kha hruai kirin an awm a, zalen takin duhtawkin Pathian an fak leh mai. An lo da hman lem lo ni ngei tur a ni. Pathian hian tha zawka a hriat hunah Covid19 ram atang hian min hruai chhuak  ang a, Biak inah ngei, a fak hla saa au tuar tuar turin min la hruai kir em em ang.

“Doctor khuang benah kan lâm mai mai alawm,” min tifiam an awm. Natna thil a nih miau avangin doctor khuang bena lâm hi tlawma lak chi a ni lem lo. Covid19 laka kan him nan ni 26.10. 2020 atanga kar hnih chhung, ‘dawhtheihna lantir loh hapta hnih’ chhung sawrkarin hman a tum. Kan him nan sawrkarin khuang a lo beng ring deuh emaw, a beng rang deuh emaw a nih pawhin, khuang ben mila lungawi taka lâm hi mipuiin kan tih ve mai tur a ni.

Mi hmanghria chuan thil tha lo chu a hmuhin a biru thin a; Mi mawl erawh chuan a tawn mai thin a, a tuar phah thin (Thufingte 2:3) tih Pathian thu kan hmu.

Mizo hi kan tlem si a. Ramri humhalh nan leh hnam chhan nan leh martar-a thi kan nih loh chuan thih loh tum hram a tha. A chhan a that chuan engkim hi tuar ngam tur a ni. Mawl avanga tuar erawh hi chu a dik lo ang.

Kan ral beih mek Covid19 lakah hian mi hmanghria nih a tul a, a tul rih a nih chuan bihruk rih mai tur a ni. He hri harsa hi mawl taka tawn mai loh hi kan tuar lohna tur pakhat a nih hmel e. Covid19 kai apiang hi mawl taka tawn luite an ni hauh lo. Mi dang tana an inpek avanga tuar an ni fur ang. Mahse, mawl tawn avanga tawrh hi a Pathian thu lo riau dawn!! Biru chunga dam khawchhuah tum hi dawihzep thil a ni lo a, mi hmanghria nihna a ni zawk e.