Ràl-chah dàwr Amazon-a thawk, bungraw sem thìn bialpa i nei em? Chance in nei khát viauin ka ring! Chuti a nih chuan a dintu leh a neitupa, a thil hralhna hlép atanga khawvêla pa hausa ber hial pawh lo ni tawh, Pu Jeff Bezos-a hi a buai loh ring suh! Mahse, lehkhabu chhiar âttchilh bur mi a ni tlat! A chhiar duhzáwng lah thawnthu a ni lehzêl a. ‘Non-fiction (phuah chawp loh) ai chuan thawnthu (novel) atang hian hringnun zirlai ka zir tam zâwk,’ a tih lehzêl chu!

‘Ka hna thawh lai kalsanin ka lehkhabu chhiarte ngaihtuah zui nán dárkár 10-te fianrialah hun ka hmang thìn. Chutah chuan hringnun zirlai tam tak ka zir thar thìn. Ka tih sual insiam thatna tùr te leh hma thar lâk dàn tùrte ka ngaihtuah chhuak thìn,’ Amazon hotupa chuan a ti. A nih, nang ve thung le?

‘Elon Musk hian ni khatah lehkhabu chhiar nán dárkár riat hun a hmang thìn,’ a ti—a pa Errol Musk ngeiin! Kum kaw mi a nihin Encyclopedia Britannica bu pum a chhiar chhuak tawh! ‘A thiante an party hut hut lai paw’n ani chu library-ah amah chauha lehkhabu a chhiar melh melh lai i hmu ang,’ a pa chuan a ti bawk. Vawiina India pawisaa Rs 15,45,04,26,948 neitu hian, phone hman tùlna chu a ngah khawp ang le; mahse, keini angin lehkha chhiar thulh phah nán phone a bih ngut ngut ve lo a nih ka ring!

Mi hausa tawntáw Warren Buffet pawh hian ni tin darkár nga atanga darkár ruk chhúng, chanchinbu chi hrang hrang panga tal chhiar nán hun a insiam ziah thìn. Nang ve? ‘Ka buai!’ i ti a ni maithei. ZALEN pawh, a chhiar chu sawi loh, a keu pawh keu hman lo i inti em ni? American pachal, sumdàwnna lama ‘mi lawk’ leh Berkshire Hathaway company neitupa, Buffet aia i buai chiam chu ka ring chiah lo asin!

Google hotupa ber (CEO), India chhùl chhuak, Sundar Pichai khu, tûk tin dár 6.30 leh dár 7 inkárah thoin thingpui leh artui kan (omlette) inchhawp chungin, mathei loin lehkha a chhiar ziah thìn. Amah ang thoa Indian American Cancer daktawr, Siddhartha Mukherjee-a lehkhabu ziah, “The Gene: An Intimate History” chu a lehkhabu ngainat ber a ni.

i-phone i nei pha lo a nih pawhin Apple CEO chu Tim Cook a ni tih hi chu hre ve tho la… Cook hian lehkhabu a chhiar nasa a ni satliah lo a, Apple company-a hna thawkte chu, rinawm taka an hna thawk tùrin a chah thìn a ni ’ngawt lo a, lehkhabu chhiar tam tùrin a chah ngun ber. Jr. George Stalk-a lehkhabu ziah “Competing Against Time” phei chu a hnuaia hna thawkte chhiar theuh tùrin a fuih vek a, a copy pawh a sem nasa thìn hle.

Ram khat Prime Minister chin hi chu an hman viau ka ring lo! Kan PM, Tv. Narendra Modi pawh hian phone-a games khelhna hun a ngah viau lo ang! Buai êm êm chungin lehkhabu chhiar a thulh ngai chuang lo. 2019-a “Mann Ki Baat” radio programme tih chhuah a nih hmasak ber tum khán, keini a khua leh tuite chu Google tuipuia kan pil hlen loh nán lehkhabu chhiar uar tùrin, uar takin min fuih a nih kha. US President hlui, Harry S. Truman-a’n, “Lehkha chhiar thìn zawng zawng hi hruaitu an ni lo; mahse, hruaitu zawng zawng hi chu lehkha chhiar thìn an ni,” tia a lo sawi ti diktu zínga mi chu kan Pu Modi-a ngei hi a ni e.

Barak Obama nèna an inkawm tum khán, ‘Thianpa Barak, keini chu e, min thlahtu kan pi leh púte kha thu leh hlaa mi hausa, mi ril leh mi fing an ni a; an hnên atangin zir lai tam tak ka zir thei bîk asin!’ tiin, intithei fé-in US President a lo tawng khum siah siah tawh asin! 

Keini Facebook buaipuiho ai hian a neitupa Mark Zuckerberg-a hi a buai zâwk ngei ang. Mahse, lehkhabu chhiar a thlahthlam chuang lo. Kum 2015 khán Facebook CEO hian a Facebook account-ah vêk kár tin lehkhabu pakhat tal a chhiar chhuah ziah tùr thu a lo intiam tawh a nih kha. Hei hi hnam hrang hrang zia leh chanchin te, rinna lama an dinhmun te leh technology lama an dinhmun hriat belh nána a tih a ni.

“Harry Potter” film a chan lai khán a la naupang viau a; tûnah chuan Hermione Granger-i lema chang thìn Emma Watson pawh kum 33 a tling ve têp tawh mai. Lehkhabu a chhiar nasa a ni satliah mai lo a, mi dangte lehkhabu chhiar uar tùra fuih thìntu mi langsàr tak a ni a; social media leh interview-naah, amah ngai sángtute chu lehkhabu chhiar tam tùrin a fuih nasa thìn hle. 

Lem a chan bâkah UN Women Goodwill Ambassador a ni bawk a; gender equality lam buaipuitu páwl pakhat, “HeForShe” an tihah hma latu (promoter) a ni bawk. Heti chung hian lehkhabu a chhiar hman tho! UN tána a thawhna péng pakhatah hmeichhe tán bîk book club, “Our Shared Shelf” chu kum 2016 khân a lo din tawh bawk. Film chan piah lamah Kohhran thalai páwl lamah… awh! páwl hrang hrang, lian tak takah inhmanna a ngah si; buai ve viau tùr chu a ni; mahse, lehkhabu a chhiar hman tho!

Sawi tùr an tam—kan sawi vek séng lo. Kum tina lehkhabu 50 tal chhiar chhuak ziah thìn Bill Gates te, Yahoo CEO Marissa Mayer te, PepsiCo CEO Indra Nooyi te, Oprah Winfrey te, celebrities zíngah pawh Academy award dawng tawh Halle Berry leh Reese Witherspoon te leh mi dang dang, ‘lehkha chhiar nunpui’ mi lãr an la kuh tul. A fing leh a hlawhtling apiangin lehkhabu an chhiar nasa. A nih, keini ve thung hi le?

Hêng mite hming ka’n sawi chhuah chiam kherna chhan chu,‘Ka buai!’ tih hi lehkha chhiar loh chhuanlam a tling lo, tih a taka lantírtu an nih vàng a ni! Kan sawi tâkte khi an buai loh ring suh la, a buai buai-ate hian lehkha an lo ‘chhiar hman tho’ tih zirlai zir thar tum zâwk rawh.

Lengzem chanchinbu March 2023-ah chuan hetiang hian a inziak a (kai tawi mai ila): ‘Kum 2000 khan, thlawhna tumhmuna innghah khâwmna hmuna laptop phawrh chin khan ngaih san an hlawh a. 2020-ah chuan tablet leh kindle vêl hmanga thil chhiarte kha ngaih san an ni leh. A hnuah WhatsApp khawih kan tam ber ang a … Hripui léng zualpui a reh hnu hian, mak deuh maiin kindle leh tablet-a mi ni loin, tumhmuna thlawhna nghah paha lehkhabu chhiar hi kan awm leh tan ta…’ tiin. 

A nih leh, keini ve hi le?