January 14, 2011 khan sorkar hmalakna pui ber NLUP chu chief minister-in ropui takin Vanapa Hall-ah a hawng a, district khawpui dangah pawh a hawnna hun hman a ni bawk a. Kan la hria anga chumi tum chuan chief minister-in kumtin January 14 hi 'Kut Hnathawktute Ni' atan hman a nih tur thu a puang a nih kha. NLUP hian a tum ber chu thingtlang lo neih tihtawp a, leilung a innghat eizawnna tha zawk leh changtlung zawk siam te, mipui nawlpui dinhmun chawikan a, chumi ruala leilung, nungchate leh ramngaw (environment) venhim a, tuihna tihpun a hman tangkai bakah leilung hausakna hai chhuah te hi a ni. Chutianga ruahmanna tha tak chu Planning Commission-in July,2010 khan a pawmpui a. A tira ruahmanna ang chuan NLUP hmang tangkai tur hi chhungkaw 1,20,000 an ni a, Cheng vaibelchhe 2873.13 sen tur niin, kum 5 chhung awh tura tih a ni bawk. Mahse, kum nga a vei hnuah pawh hmalakna hi chhunzawm zel a la ni. A tir lamah khan NLUP hi beiseina sang tak nena kalpui a ni a, chief minister phei chuan kum 10 chhungin Mizoramah mirethei (BPL family) an awm tawh dawn loh thu leh tlangram lo neih hi bansan hlen a nih tur thu a lo sawi a. Mizoram economy (GSDP) pawh hi thang awk awk tura beisei a ni a, kum nga kalpui hnuah chuan economy thanna pawh 16% zet a tlin an beisei a nih kha. Mahse, kum nga hnu 2015-16 a Mizoram economy thanna chu 9.18% a ni thung. Zep thu a cheng lo a tir atangin NLUP hi politics khelhna hmanrua, inthlana tlinna tura an vauchher ber a ni a. A tir atangin beisei a pha lo a, an kalpui tak tak hnuah pawh an sawi ang hlawhtlinna hmuh tur a awm lo a, thil fel lo leh dik lo hmuh tur a awm reng bawk, a hlawhchham tih hi mi tam ber ngaihdan a ni. Assembly session-a tlangzarh CAG audit report-ah khan NLUP a thil fel lo tam tak tarlan a ni a. NLUP dawngtute (beneficiaries) thlan danah tih dik loh lian tak a awm thu tarlan a ni a. NLUP Manual-ah a dawngtu tur uluk taka thlan tur a ni a, survey neih atangin Village Level NLUP Committee (VLNC) hian an thlang tur a ni a. Mahse, a dawngtu tur thlannaah hian VLNC te hi inrawltir an ni lo a, manual kalhin NLUP Apex Board (chief minister kaihhruai, thuneitu sang ber)-in an thlang a, Apex Board hian an thlan dan phung tarlan tur an nei lo nghe nghe. Hei vang hi aniang thingtlang lamah chuan NLUP dawngtu hi party pakhat mi leh sa an tam bik em em a, party induhsakna thil anga sawi a kai chhan ni. CAG report vang hian hmun dangah chuan thubuai lian tak tak a awm phah a, India ram pum huap eirukna/hlemhletna lian tham (2G scam ang te) pawh a lo awm phah tawh a. Tun tuma CAG-in NLUP a thil dik lo tam tak an tarlan pawh hian boruak a siam chho ve maithei a ni. Manual kalhin beneficiary thlan a ni a, dawng thei lo tur dawng an tam hle a, CAG mi leh saten district thenkhat a beneficiary engemaw zat an kawm chiannaah dawng thei lo tur 1400 in an dawng tih an hmu a. Ram pum huap phei chuan party induhsakna leh poltics thil vanga dik lo taka dawngtu tur thlan an tam ngawt ang. An thlan dan a dik loh avangin complaint lut pawh 1389 lai a lut nghe nghe. NLUP sum hmuh leh hman dan chungchangah hian felhlel leh sawi mam chawp a awm nual a. A tirah prime minister special package atanga dawn tur angin an sawi a. Kum 2008 MLA inthlan dawn a khatih laia prime minister Manmohan Singh rawn campaign khan hei hi a sawi niin an tarlang a, mahse a thusawi ziaka an semah kha chuan a tel lo ngei mai a. Engpawhnise, state budget pawn lam atanga NLUP sum hi hmuh tur angin an sawi reng a. Mahse, Mizoram budget pawisa ngei a hmang a, state annual plan-ah an rawn telh thin a nih kha. Sorkar laipuiin NLUP atana pawisa a pek tur Cheng vbc 2873.13 atang hian kum nga chhungin (October 2010 leh September 2014 inkar) Cheng vbc 1526.14 a rawn pe tawh a. A bâng a la awm nual na a, kum kal ta 2015-16 chhung khan NLUP sum rawn pek a ni lo a. Pawisa an rawn pek tawh atang hian Cheng vbc 1518.03 chu hman ral tawh anga ziak a ni a, a takah chuan heti zat hi an hmang lo hrim hrim. Sum la hman loh tam tak hi K.Deposit/Civil Deposit a dah a ni nghe nghe. A dawngtuten (beneficiaries) a hmasa berah Rs 20,000 aia tlem lo dawng tur an nih laia chu aia tlem daih an dawn te, pawisa sem dan leh kalpui dan (implementation) ah thil felhlel thenkhatte CAG report-ah hian tarlan a ni bawk. NLUP Implementing Board (NIB) pawhin kum 2013 a pawisa an sem dan mumal lo hi an pawm thlap nghe nghe, a mumal loh avang hian hmalakna pawh a that loh phah a ni. NLUP hnuaiah hian sumdawng pawl leh mimal 30 hnenah pung awm loa loan Cheng vbc 6.46 pek a ni a, an inremnaah chuan March 2012 leh September 2017 inkara rul zo vek tur an ni a, an rul zo thei lo a nih chuan sorkarah an dahkham LSC an pe tur a ni a. March 2016 thleng khan Cheng Maktaduai 9.4 chauh rulh a la ni a, Cheng vbc 5.02 rulh loh a la awm. NIB lam bawk hi an che fel lo leh pek a, loan rulhna tur saving bank account pawh an lo nei lo a. Kum hnih liam hnu pawh a cheng khat mah la rul lo te pawh an awm a, loan la zingah hian sorkar hotu lawk fate telna sumdawng pawlte pawh an tel nawk nghe nghe. Loan latu zingah hian an sumdawnnaa harsatna tawka insawi te an awm a, state sorkar hian loan latute sum hman dan a enpui lo a, a rul tha lo te chunga hmalakna a awm lo bawk. Rulh tha lo viau mahse sorkarin a ngai pawimawh tawk lo hle a ni. NLUP pawisa enkawl danah thil fel lo a awm nual tih CAG report-ah tarlan a ni a. A hun a sem theih loh te, hmanna lama harsatna awm te, civil deposits/K Deposit a dah te leh a dangte hi kalphung pangngai kalh a tih a tam hle a. Sum enkawlna lam a chhia tih chu chu thuhran nise, state sorkar hian NLUP a sum hman dan chiah hi tarlan a la tarlang lo, CAG report hian a ti a ni. Implementing Board (NIB) hian mamawhna hmanhmawh thlak awm si lo a pawisa lak chhuah an ching a, thla tin hian pawisa mawng phah tur a tlem phah thin a. Hetianga mamawh vang ni lo a pawisa lak chhuah fo hi thil fel lo tak a ni a, a hman dan a fel lo ngeiin a rinawm bawk. NLUP hi kan hriat angin kum 2008-a congress party an sorkar atangin development programme lian ber anga ngaih a ni a. A sum hi a tam tham a, thil fel lo tam tak a awm ngeiin a lang a, party lamin insawi theihna atan leh inchirhthehna atan an hmang nasa hle bawk. Sorkar lamin a sum hman dan leh NLUP hnuaia hmalakna hrang hrang an vil tha tawk lo bawk a, a hlawhchham chhan pawh hi mipui lam ni loin thuneitute hi an ni zawk ang. CAG in sum hman dan leh hmalakna te a zir chianna atang hian cheng vaibelchhe sang hnih zariat chuanga a lo thlawna a luang ral a tam lutuk hi kan hnam tan a pawi thei ngeiin a rinawm. Political party-te pawh hian rinawmna tel lo a sum tam tak hmanna tur hi mipuiah zuar chiam tawh lo se a tha ngawt ang.