Sorkar hi mipui sum kawltu a ni a, chief minister leh minister-te hi mipui sum enkawl leh hmanna a mawhphurtu lu ber an ni. Sorkar sum bawma pawisa hi ram hruaitute leh sorkar hnathawkten an nawmsakna tur leh an sahmim tihpuarna tur ringawta an hman a rem lo a, mipui hamthatna tur leh ram hmasawnna tura hman tur a ni. Mahse, zep nak emaw, dik lo taka sum hman hi a tam thin hle a, thuneitu lu ber berte an hausa thur thur a, mipui mimir an rethei tial tial thung a, ram hmasawnna a kal hlei thei lo a, kawngpui tha te kan nei thei lo a, lo neitute an ding chhuak thei lo a, mi retheiten lei rem an rap hleithei lo a nih hi. Sorkarin sum a hman dan endik a, an hmalakna hrang hrang chiangtu tura din The Comptroller and Auditor General (CAG) of India hi awm hlauh lo phei se chu kan chhe tawh viau anga, tu mit mei mah veng loin, a dika dawk pawh thlu loin thuneitu lu ber berte hian sorkar sum bawma mi (Mipui sum) hi an tham bawrh bawrh lo ang tih a sawi theih miah loh. India danpui hnuaia din CAG hnapui ber chu sorkar laipui leh state sorkarte sum hmuh leh hman dan endik (audit of govt. accounts) hi a ni a, sorkar department hrang hrangte (sorkar atanga pawisa dawng pawl hrang hrang thlengin) an audit thei a ni. A tawi zawngin sawi ta ila, CAG hian sorkarin sum a hman dan hrang hrang uluk leh chik takin an endik thin a, thil dik lo langsar an hmuhchhuahte an tarlan thin avangin sorkar tan mualphona a ni thin. Mizoramah pawh Accountant General office-a awm a, kumtin audit report state assembly session-ah pharh thin a ni a. Tunlaiin chief minister leh finance minister hian CAG Report sawiselna leh beihna tawngkam an nei zauh zauh a. Kar kal ta ngawt pawh khan chief minister hian vawi hnih lai CAG report chungchang a sawi a, nilaini khan MPCC Executive Committee meeting-ah Lottery a thil dik lo CAG report-a lo lang chungchang, “NLUP ang bawkin CAG report dik loh vangin thil dik lo awm angin a lang a ni,” a ti a. Zirtawpni khan Bhavan-ah, “CAG hi dik lo thei lo an ni bik lo. An report hi Luka ziak ang bur a ni lo. An dâwt chian zia chu, NLUP-ah baseline survey neih a ni lo, an ti a, YMA thawhpuiah sáwmin survey tih vek a ni,” a ti bawk. Thil inhrilh sual palh emaw hriat thelh palh a awm a ni maithei, CAG audit report-ah hian NLUP-ah baseline survey neih a nih thu chiang taka tarlan a ni zawk a, YMA kal tlanga khaw 813 a NLUP dawng thei tur survey a nih thu pawh tarlan a ni zawk. Mahse, CAG report-a thil fel lo tarlan zawk chu beneficiary thlan dan zawk hi a ni. NLUP hi kum 7 dawn lai chu sorkar hmalakna pui ber (Flagship programme) a ni a, mahse, mipui nawlpui hmuh danah pawh thil dik lo tam tak awm ngeiin a lang a. Sum tam tak awmze nei loin a luang ral a, kut hnathawkte leh lo neitute zingah dinchhuah phah an awm meuh ang em? Dik tak chuan rorel lai party bak hi chuan an fak lo deuh vekin a lang. Uluk tak leh chik taka CAG-in NLUP an zir chianna lo chhuaka thil fel lo langte pawh kha a mak hran lo, mipui nawlpui rin dan leh hmun dan a rawn nem nghet mai niin a lang zawk. He report-ah hian NLUP kalpui meka thil dik lo leh fel lo tam tak tarlan a ni a. A dawngtu turte hi Village Level NLUP Committee-in an thlan tur a nih laia Apex Body-in an thlang mai te, beneficiary-te hnena pawisa an pek tlai avanga harsatna an tawh te, financial year tawp dawna NLUP sum hman bang civil deposit-a dah thin te CAG report-ah hian tarlan a ni a. A thil tum - buha intodelh, tlangram lo neih tihtawp, ramngaw siam, etc., a la hlawhtlin lohziate pawh tarlan a ni bawk. Hengte hi sorkar leh rorel lai party tan chuan a na viau anga, a zir chiangtu CAG an bei mai kha a awm viau reng a ni. Mizoram State Lotteries chungchang CAG zirchianna (Performance Audit) pawh hi sorkar tan a mualpho thlak a, insawi fiah kual vel a ngai tam viau reng a ni. Kum 2010-11 atanga 2014-15 chhunga Mizoram State Lotteries department-in Lotteries an kalpui dan endiknaah hian puan hnuai thil te, tute emaw sum siamna tenawm tak ni ngeia lang laihlan a ni a. Report hi ngun taka chhiar chuan a mawhphurtu leh a titute hi an hriat nghal ruau ruau leh nghal. Tender an chhuah dan leh kalpui dan (Tendering process) felfai lo te, sorkar chan ngei tura lang sum hloh (Presumptive loss) nasat zia te, dan leh hrai pal zutna te leh thil felhlel hrang hrang  tarlan a ni a. Eiruk leh hlemhletna dang laka fihlima inngai sorkar tan chuan CAG-in an mawngkhak a hlim lang ta mai hi a thinrim thlak viau ngei ang. Politician-te hi an fing em a, thu leh hla hmanga mipui ngaihdan hruai kawi hi an thiam tak zet a. CAG audit report meuh pawh rintlak loh hul hualah an chhuah thei a nia. Pui tak an ni. Chutihlaiin, A.G office lam hian politics hmanruaa an report hman mai mai an duh loh vang ni maw, chief minister leh minister meuhte pawhin puh chhe viau mahse chhan an tum lo a. Chanchinbu mite pawhin an zawt chiang lem lo bawk. Mahse, India ramah hian sorkar sum auditor rintlak ber chu an la ni reng. Sorkar an audit hian uluk namen loin an uluk a, an report lo chhuak hi court-ah pawh khin buai theih loh a nih avangin tihsual an hlauh tur zia a hriat awm e. Sorkar lama mawhphurtute pawh an kawm a, zawhna an zawt a, an hriat duh an zawt a, thil fel lo an hmuhchhuahte pawh sawifiahna hun an pe a. Chutiang zawng zawng hnua sawifiah ngaihna awm tawh lo chin chu an report-ah a lo lang ta a. Chu pawh chu ngun takin an ennawn leh a, chumi hnuah Comptroller and Auditor General of India hnenah an thawn a, ani'n a pawmpui hnuah Assembly session-ah pharh a ni chauh a ni. Mahse, mihring ve tho an nih avangin chung zawng zawng hnuah pawh chuan tihsual zeuh tawk chu a awm thei tho a ni. Chutihlaiin, NLUP leh Lotteries chungchangah hi chuan tihsual an neih pawhin pawi tham a nih hmel loh. CAG Report hi a nihna takah chuan sorkar tan a ngeiawm thin a, an tihsual leh dik lo taka thil tihrukte chiang taka tarlanna a nih vang hian thuneihna chelh mek ram hruaitute hian an sawisel nasa thin reng a ni. Report thenkhat sawi kai laih, sorkar nghawr nghing khawp a lian, parliament/state assembly a chaiho laih laih tham pawh a awm fo tawh reng a ni. UPA sorkar laia 2G Scam an tih mai, 2G Spectrum Licence pek leh a titu thlan dana thil dik lo tarlanna, sorkar laipuiin Cheng vbc 1700 chuang a chan phahna te kha CAG Audit report atanga lo chhuak a ni a. UPA sorkar chawhnu lam bawka eirukna thil lian tham 'Coalgate' an tih mai pawh kha a ni bawk a. Bihar chief minister hlui Lalu Prasad-a'n thubuai lian tak a neihna 'Fodder scam' an tih pawh kha CAG report atanga lo chhuak tho a ni. Kan sorkar pawh hian a term tawp lam a hman mek lai hian CAG Report a thil dik lo tarlante hi mipuiin thudik kan hriat theihna turin huai takin hmala ngam se. Lottery scam phei hi chu chhui an ngam tak tak a nih chuan CBI chhuitir ngei ngei chi a nih hmel, vai ram khawpui thenkhata chhui zui ngai te a ni dawn a. NLUP chungchangah pawh hian sorkar insawifiahna thenkhat kha a lo chhuak tawh a, mahse mipui an hmin tak tak lo niin a lang. Heng bakah hian CAG Report hi Assembly PAC hian a bawhzui ngam ang em tih hi kan lo thlir tur a ni a. Tunhma khan MLA thekhatin TA/DA dik lo taka an lak thu (MLA Dawt Bill tih mai kha) chanchinbua chhuak kha SOSA hmalaknain MLA rual awmna committee-in a chhui chiang a. Tumah thiam loh chang an awm lo a; mahse, a puhtu chanchinbu lah chu an hrem hlei lo a. Ram hruaitute hi thudik tan, thil tha duh, huai taka hmala ngam anga mipuiin kan hmuh zel theihnan CAG Report pawh hi an bawhzui ngei turah ngai ila.