Aizawl; Synod hnuaia Campus Ministry chuan documentary film, ‘Thalaite leh tunlai khawvel’ tih chu a siam mek a, a Original Sound Track music video pahnih chu Nilaini khan Moderator Rev. Lalzuithanga chuan Synod Office Devotion Room-ah a tlangzarh. Campus Ministry hian zirlaite dinhmun dik hriat chiana tanpuina kawnga hmasawnna a awm theih beiseiin film a siam mek a. He film atan hian zirlaite harsatna te, an hmathlir leh eizawnna lama harsatna awm thei te, anmahni hnen atang leh mi thiam, hetiang lam veitu thenkhatte kawmin, zirchian a ni a. He zirchianna hi film tawia siamin zirlaite bakah nu leh pa, sawrkar, khawtlang leh Kohhran hoten zirlai/thalaite harsatna kan sut kianpui theihna kawng a awm takin tiin, vantlang hmuh tura tihchhuah turin hmalak mek a ni.