Zawhna: Ka pu, khawngaih takin ka zawhna hi min lo chhan theih chuan ka lawm em em ang. Kum 20 chuang kalta atang khan Candidiasis avangin ka buai a, Doctor te rawnin theihtawpin damdawi hmangin ka inenkawl a, an ziaawm deuh a, a zual leh thin a. Tunah hian ka serh hmawr leh kap leh vun velah infection ka nei a, a dam hlei thei lo. Candidiasis hi a tihdam theih loh emni le? Tihdam theih loh ni ta se eng chen nge a inenkawl theih ang le? Candidiasis chanchin tawite min hrilh theih chuan ka lawm hle  ang.

Chhanna: Candidiasis hi natna thlen thei hrik chi khat Fungus kan tih zinga mi a ni a, Fungus chi hrang tam tak a awm a, a tam zawk chu natna thlen kher lo an ni. Heng fungus thenkhat hi kan taksa ah hian an awm ve reng a, hrisel tha pangngai ah chuan a hranpa takin natna an thlen kher lo a ni. Mahse an awmna environment in a zir viau chuan (entirnan dâm leh biru deuh, kap, zak, kaiza etc ah te, tin, hygiene tha tawk lo leh enkawl fai tawk loh hmunah te) an inthlah pung a, harsatna an thlen mai thin thung a ni.

Candidiasis hi kan tarlan tak angin nei duh bik an awm a, a bik takin taksa chak lo immune system chak lo – HIV+ te, cancer chemotherapy a enkawl lai te, transplant patient (kal, thin thlak) te leh natna benvawn steroid hmanga enkawl reng ngai ah te a awm duh hle a. 

Chu bakah chuan zunthlum (Diabetes) control tha lo te ah a awm duh hle bawk a ni. Taksa hygiene hniam, in tifai khat ah te a awm duh a, thlan chhuak nasa, intifai tha tawk si lo ah te a awm duh bawk. Hmeichhe lamah hian an serh chhung leh pawn velah hetiang infection hi a awm duh hle mai a, mithiamte sawi dan phei chuan hmeichhe puitling ¾ hian an damchhungin hetiang infection hi an nei ngei thin an ti hial a ni. A then chu sex hman atanga inkaichhawng te pawh an awm bawk.

Mipa ah pawh hian a awm ve fo mai a, a bikin kekawrte ro chiang lo hak te hian a awm duh hle. I rawn sawi ang hian serh hmawr ah te, kap leh til bul bawr velah te a darh bawk thin a ni. Doctor te rawn chungin i theih angin i inenkawl tawh chunga a la reh tha thei lo anih chuan kan tarlan tak natna engemaw dang te hi i nei ani mai lo maw? A bikin zunthlum i neih leh neih loh te pawh lo in check leh thei la a tha hle mai. Tin, HIV test tih pawh a pawimawh viau ang. Candidiasis natna hi tihdam theih chu a ni ngei mai a, mahse kan sawi tak angin taksa immune system a chak loh chuan a dam tawh emaw tih tawh hnuah pawh a rawn chhuak leh fo thei a ni.