Zawhna: Ka pu, mipa kum 77 hmang mek ka ni a, ni 17.4.2021 khan Covid vaccine 2nd dose ka la zo ve a. Ni 28.5.21 atang khan ka taksa hmun hrang hrangah ka vualin ka thak a, Cetirizine ka ei a, ka ei atanga darkar chanve zet vel atang chuan ka vual leh ka thakte chu a reh vek a, ka ngeih khawp mai. Mahse, ni 3/4 hnu velah a lo chhuak leh thin a, ka ei leh a, a ngai angin ka dam leh mai zel a. Ka damdawi ei, Cetirizine leh Levocetirizine hi ka ngeih ve ve a; mahse, ka mut a chhuak a, min tichau hle thin thung. Tun thleng hian a la dam/reh hlen loh avangin ei laia reh mai lo a, a reh hlen dan hi ka duh a, khawngaih takin he ka vual hi a reh hlenna min hrilh thei la ka lawm hle ang. Vawiin ni 26.9. 21 thleng hian ka vual a, damdawi hi ka la ei reng.

Chhanna: Covid vaccine hi a him thawkhat viau nia hriat a ni a, chuti chung chuan eng damdawi emaw, vaccine emaw pawh mai hian side effect eng emaw tak chu an nei deuh vek mai a. Mihring kan inan loh avangin kan dawnsawn dan pawh a inang lo fo. Chutiang chu a nih vangin Covid vaccine la zingah pawh hian eng emaw insawiselna nei zui an awm zeuh zeuh. Mahse, a tam zawkah chuan a rei lo va, heng side effect-te hi a reh leh mai thin bawk. Nangma insawiselna bikah hi chuan a hmain vun vual/thak i neih leh neih loh i sawi lo va, engpawh chu nise, allergic skin reaction chu a nih hmel ngei a, vaccine vanga lo awm hrim hrim nge nangmahah eng emaw huat i neih a rawn trigger tih erawh hriat chian a har mai thei.

Cetirizine leh Levocetirizine te hi allergy damdawi, antihistamines kan tih te an ni a, a bikin Cetirizine hian mut a tichhuak duh viau mai a, dangro te pawh a thlen fo thin. Heng damdawi hmanga i vun vual/thak a control theih chuan allergy chu a ni ber a; mahse, thil dang eng emaw vanga lo awm a nih theih vangin mumal deuha check-up i mamawh niin a lang. Tin, zunthlum nei i lo nih palh phei chuan vun harsatna hi a awm duh viau bawk. Damdawi dang ei lai i neih leh neih loh i sawi hran lo va, i kum ngaihtuah chuan eng damdawi emaw ber chu i ei ka’n ring deuh a. Tha berah chuan skin specialist hnenah lo inentir thei la, i harsatna hi an pui thei ngei ang che.