Tun tum chu Aizawl tihina huap ka hriat dan ka’n sawi teh ang. Ka sawi duh hi chu kum 1940 vel thuartham kha a ni ber ang. Aizawl tihna chhan tak chu khi, Larsap in khawthlang lampang, a compound chhung lamlian sira AIZAWL LUNG phunna bul zawl te reuh te khi Ai hmun a nih avanga AIZAWL tih a ni an ti. Tuna ka sawi tum chin chu Chandmari atanga Kulikawn thleng veng hrang hrang hi a ni ber ang.

Chandmari tihna chhan khi Assam Rifles hi silai kah zirna hmun a ni a, Laipuitlang thut kawng thlang deuhah khian an themthiam tur Chand (thla) chu an dah a, tuna bazar chawhmeh zawrhna hi an kahna hla ber ni tain ka hria. A kar karah yard 200, yrd 500 te kahna hmun an siam thliah a. Chanmari kawn kan tihah khian an thawmhnaw vel dahna in pakhat a awm a, chu bak cu in a awm ka hre lo. Kawng chhak lam chu thingpui huan kan ti mai a, an sih tak awm kei chuan ka hmu ve lo. Laipuitlang thut, silai mu luhna chu, sual duh vangin an kher a, an kap zel bawk si a, tum khat phei chu naupang pahnih (unau?) a chim hnan a, an boral ve vein ka hria.

Zarkawt: Zarkawt tih kha kawnah khian sava rual an liam thin avangin kilen an zar thin a, sava tam tak an tang thin an ti. Khilai, a kawn velah chuan in a awm ka hre meuh lo. Pu Buchhawna leh Sainghinga te mai lo chu. A chhak tlang khi Babutlang tih a ni, vai babuho quarters a awm thin.

Dawrpui Veng: Dawrpui Presbyterian Biak In atanga chhim lam phei Mosulman biak in thleng hian khawchhak lam zar zara dawrkai an tlar phei a, a then chuan dar an kai pawh ka hre lo. Vankhama te, Pu Saikaia te angte khan dawr an hawn awm pawh ka hmu lo. Lalhema kha chu thlalatu a ni berin ka hria. Chutih lai chuan thlalatu kha an tlem em em a, inneih leh puipun nikhuaa koh an hlawh hle ta ve ang.

Chutih hun lai chuan tuna Bazar kan tih leh Zion Street kan tih tak hi Sakawrpu lane tih a ni. Assam Rifles zin veivak khan sabengtung (mule) an thuam phur tur an vulh teuh va, chung sabengtungho vel dahna chu a ni ber. Inrinni hi bazar ni (dawrpui kai ni) a ni a. Keini, chhim lam zawng zawng pawh kan kai thin. Chung Pu Lalhema te ho kawt... chhak lam chu dawrte (stall) ruak bang pawh nei lo a tlar phei diat a, khawimaw lai lai chu bang neiin, mihring cheng loin stall-ah an hmang. Hmanlaiin Inrinni chauh hi chawhmeh bazar ni a ni. A hnu deuhah Aizawl South, tuna dawrkai veng kan tihah hian Nilai bazar tiin Nilainiin chawhmeh an zuar ve. Tuna police lane-ah hian Mirawng (Kabui Naga) hmun phiatho an awm a, Mirawng Veng tih a ni thin.