‘Hlauhawm tak leh mak taka siam’ kan nihna hi a ropui asin! Ka hrethiam phak hauh lo naa zu chungchangah hian mak taka siam kan nihna sermon ka dawng thar tlat! &&&&&& Ruihtheih thil azawnga common ber mai zu hi OD (overdose a thih daih sawi nan kan hmang ang) theih a ni tih pawh kan hre lo! OD kan tlem em alawm! Rui chatthla nikhaw hre lo pawh hi an lo harh leh lul zel! Zu hi in ta teuh ila, thisenah zu a tam lutuk chuan a OD ve theih asin! Kan thisenah hian 0.05% zu awm ta se, kan zakthei lo tawk vel a! 0.1% awm ta se, kan che nawi tan a, ke a phet deuh tan! 0.4 - 0.5 % a awm chuan kan chatthla thin. Chu aia tam a awm zel chuan thawk leh lungphu a buai tawh a, thaw thei lo lungphu chawlin a OD der theih asin! Mahse engatinge kan chatthla hi kan harh leh lul zel a, ‘thih daih duh khawpa zu in’ pawh an OD mai si loh? A chhan hi a ril asin! Zu kan in hian kan in zawng zawng zaa sawm vel hi pumpui atangin thisenah a inhip lut a, zaa 90 chu rilfang atangin a lut thung. Rilfanga lut thla a tam hle chuan thihpui mai theih tur hi a ni ve a. Chintawk nei loa in vak duh kan tam ropui si! Chutiang a thlen loh nan chuan siamtu hian a venna tur a ruahman sa vek zu nia! Zu kan in teuh hian pumpuiah hnang a lo insiam a, chu chuan pumpui atanga rilfang a luh pheina tur kua kha a hnawh a, rilfanga zu lut phei tur kha a dang ta a, rilfangah phei thei loin pumpuiah a a tling ta lung thin. Pumpui atang hi chuan thisenah a inhip lut tam thei lo a. Rilfangah thleng phei vek se chuan, tawp chin awm loin thisenah a lut char char dawn a, thisenah zu a tam lutuk dawn a, thawk tibuai khawpa thisenah zu a tam chuan kan OD mai dawn a ni. Chu chu ‘min vengtu’ (tu tih nge i hria em?) a lo awm a nih chu! Pumpuia zu tling lung ringawt chu thisenah a lut hleithei lo a, thisenah zu a tam thei lo. Chumai bakah chutia pumpuia zu tling ta lung chuan pumpui kha a tihrehawm a, a insangmar ta a, puma awm chu ka lamah nawr chhuakin min luak chhuahtir ta vak thin bawk. Pumpuia zu awm teuh chu a ngai ngaiin kan luakchhuak ta teuh thin. Zu in nghenga kan luak bawrh bawrh chhan kha OD lohna tur a lo ni reng mai! Ruih chhum hmawk pawhin a tukah kan harh leh lul thin a nih kha! Thi mai thei kan thih hrih loh chhan hi ‘vengtu min venna’ vang a nih chu! ‘Tihborala ka awm lo hi Lalpa zahngaihna a lo ni’ tihte hi zu in chungchangah te hian a fiah riau! Zu aia amah Pathiana hlimna tluantling zawk kan la hmuh theih nan hun remchang min la siamsak tihte hi kan chatthla harh hlimte hian han harhchhuahpui hlauh ila aw! Thlarau lam thil aia science ring zawk tan pawh Pathian hmangaihna scientific zia hi hriat tur. Thilmak hi sawi Pathian thu loh hram tum, science hmanga hrilhfiah theih a nih avanga Pathian hnathawh sawi nep nana hman tum an awm thin. Pathianin science hmangin a hmangaihna a chettir a ni mai! Zu avanga OD a thi mai tur kha siamtu hmangaihnain scientific takin min la veng a nih chu! Scientific taka a ven sen loh hun nghak kher duh suh! ‘Zu a OD theih loh, in teuh a pawi lo’ tihna a ni hauh lo! Ven sen loh chin a awm a, zu OD in a thih theih khawp mai! Chatthla luak hak ringawt pawhin a thih theih! I zu rui chatthla i harh khan inngaihtuah harh ve em em tawh teh! I vannei satliah a ni lo, khawngaihtu khawngaihna vang chauh a lo nih reng chu! Harh hlen ve tawh em em teh!