India leh MNF in inremna thuthlung an ziah kum, 1986 ah khan pawl khat kan zir tan a. Hemi kum thal lai hian Khawbung khawtlang chuan Samthang thlanmuala hla phuah thiam Patea ruhro an rawn phawrh a, a siruk lain an rawn thawk chhuak a ni. Kan sikul kha Thlanmual bul mai a awm ni a, Khawbung khaw hoin Patea thlan an lai a, a ruh ro an phawrh lai chu en kan chak a, kan zirtirtu te’n pawn chhuah an phal si lo, school bang awng atangin kan bih vat vat mai, khuarei an chang zo ta.

Khawchhak Tuipuiral, Burma ramri depa awm Samthang khua hi mizo irawm chhuaka Pathian fakna hla phuah hmasa bertu Patea lunghahna hmun a ni a; Kum 1950, March 21 ah kum 56 mi niin Patea hi Samthang khuaah a boral a, Samthang thlanmualah phum a ni. Patea hian, “Ka thih hunah chuan chhum a lo zing ang a, chutah chuan Pathianin min hruai ang” tiin a lo sawi lawk tawh thin a. Kum 1950 kum tir lamah chuan natna khirh takin a tlakbuak ta a, mut pangngai pawhin a mu thei meuh lo a, tapchhak bulah pupu ang deuhin puan an suih sak a, chu chu a bawh a, a thu mu mai thin a ni. 

Patea dam loh lai hian Samthang khaw thenawm Vangchhe khuaah chuan tawngtai dam thei Pu Tuankama a awm a. Patea nupui Pi Kaphnuni chuan Pu Tuankama ko tur chuan an tupa Kaisanga chu Vangchhe khuaah chuan a tir a. Kaisanga’n Vangchhe khua a thlen chuan Pu Tuankama te chu in pakhatah an lo zai khawm a. Kaisanga’n Pu Tuankama te zaikhawmna in a thlen chuan Pu Tuankama chuan a rawn pan a, a kut khinghnihin Kaisanga ke chu a khawih a, Kaisanga’n engmah a sawi hma hauhin Pu Tuankama zawk chuan, “Lo kal mah ila a sawt chuang lo ang. Naktipah Tuilehluang lam atangin chhum a lo zing ang a, Pathianin a hruai tawh dawn a ni” a ti ta mai a. Kaisanga chu beidawng takin a hawng leh ta a ni.

Chumi hnu lawk March ni 23, 1950 tukah chuan tukthuan ei hun lai velin Pu Tuankama sawi ang tak chuan chhum a lo zing a, Samthang khaw hmar lam Tuilehluang atang chuan chhum chhah tak mai hi a lo let phei but but a, ni chhuak eng mawi tak te chu a hliah zo ta a. Chutih lai chuan Patea chhung te chuan tukthuan an ei mek a, Patea bulah chuan tlangval Darkunga chu a thu ran mai a. Patea chuan, “En teh Kunga, min hruaitu tur Vantirhkoh an rawn thlawk thla delh delh mai, i hmu ve em?” a ti a, van lam a kawk a. Darkunga chuan, “Ka pate, ka hmu ve miah lo” a ti a. Patea chuan, “Khi an lo thleng ta. Ka kal tawh ang e” a ti a, chung lamah a ban a phar a, a kang awk a, a thlarau a thlah ta a. Chuveleh a nupui fanau te chaw ei lai chu an rawn tlan phei a, “Kapa, kal rih suh” an ti a, an tap a, mahse auh din tur a awm ta lo. ‘Thih lui kamah zaiin i hming ka fak ang’ titu Patea chuan a thih mek lai pawhin Pathian a fak a ni.  A tukah ropui takin Samthang thlanmualah vui liam a ni.

Kum 1991 ah Middle School kan kal tan a, pawl 5 kan nih kum a ni. Hemi kum hian Samthang khua chuan ‘Ramtang ram’ loah an nei a. Ramtang hi khua atanga a hlat deuh avangin zan riakin hna an thawk thin a, hei vanga ‘Ramtang’ tih hming pu ta hi a ni mai thei. Ramtang neih kum, buh tuh laiin zan khat chu hnathawka riak te chu ramhuaiin a tihthaih a, lungin a tawng chiam mai a. Tlai thim hlim atangin thingfak leh lungin a vawm tan a, torchlight in an en kual pawp pawp a, engmah an hmu si lo.  

Ram riak ho chu thlam pakhatah an tlan khawm a, zau danga riak te pawh an in au khawm zel a. Chutia thlam pakhata an awmkhawm lai chu a rawn vawm leh a, thlam dangah an in sawn a, thlam bul lawkah chuan lung lian tak tak a tla ri dawp dawp thin a. Thawm an hriat rualin pa huaisen deuh te chu an tlanchhuak a, thlam chhak lam leh a chhehvel te chu torchlight-in an chhun kual pawp pawp a, thlawhhma chu a filh rul a, hnim tih tham a la to loh avangin thui tak thlengin a hmuh theih a. Mahse engmah an hmu lo. Patling pui pui pawhin tap kawm an bel rawk rawk mai. A zana zanin ramriak te chu an hawng a, a sar hu lai chuan ti ti dang reng reng a leng lo.

Ramtang neih kum, ram riak ho ramhuaiin a tihthaih kum hian Samthang tlangval Laihmingthanga chuan Aizawlah a album hmasa ber ‘Hmangaih CFL/Ngaihlai Masang’ tih chu a lo tichhuak (release) ve mek bawk a. A zaithiamin a hmelin a zir bawk nen, Samthlang tlangval, tu khaw kha hriat loh khan kar loah Mizoram a deng chhuak ta a ni. Zoram pum dengchhuak khawpa a lar hnu hian fur hlo thlawh laiin Samthang khuaah a lo hawng a, a thawmhnaw te chu a nalhin a changkang em em tawh a; Jeans kekawr pawl a ha a, sneaker var a bun a, leather jacket hnuaiah T-Shirt var, a hmaah ‘Skid Row’ thlalak chuang ngei mai a ha a, camera a awrh tah mai bawk a. Chutianga inthuam chunga Samthang khawlaiah Pathian ni tlaia a han tualchai vel chu hmuhnawm kan ti ngei mai. A hun lai na na na chuan nula te enthlak leh tlangval te entawn a ni tak meuh a ni.

Chumi tum chuan YMA day lawmnaah zanah a zai dawn a. Khua a thim a, petromax eng hnuaiah a kaw nawtin YMA hall khat tlatin mipui kan pung khawm a. Tingtang (hollow guitar) a perh a, sound box lian ang reng tak, vawk chaw kuang tia lawngah chuan sound tract a play bawk a, mipui chuan kan nghakhlel tlang bawk a, lipui vuak ang maiin kan reh duk mai a ni. Chutah a aw fawn mawi tak mai chuan ruah tham loh hla, “Ka Lung a leng mang e” tih chu a han thlawh ta hlerh hlerh mai a, a va thiam teh reng em! Khang hun te kha khuarei ang chang zo ta. CFL-a hi vanduai thlak takin a dam rei ta lo a, kum 2012, September 9 khan kum 47 mi niin a boral a, Samthang thlanmualah vuiliam a ni. Khuarei an chang zo ta.