Chawimawina dawn nuam ti em em an awm a, phu loh thleng thlenga chawimawina dawng hreh lo, inbawlna thil pawh nise phur em em a dawng duh tur an awm bawk. Chutihlaiin, phu ngawih ngawih chawimawi hlawh si lo an awm a, phu hliah hliah chawimawi duh si lo pawh an awm tho. Hmingthan leh lansarh chak em em, mawi leh mawi lo pawh ngaihtuah lo a lar khel thinte hi an tam khawp mai bawk. Dik tak chuan mi tak tak inthup si, fak phu hliah hliah chawimawi hlawh si lo te avang hian kan chenna khawvel hi a nuam leh thin zawk a lo ni. Mi langsar, hausa leh lar, thiltithei tak tak ten chawimawi an hlawh fo lai hian mi rinawm leh huaisen, mi dangte tana inpe em em te hian hriat an hlawh lo fo thin a. Award chi hrang hrang dawng tam ringawt hi mi ngaihsanawm an ni kher lo, te han ti bawl bawl ta ila. Mi langsar lo, hriat hlawh lo, mahni phak tawk a rinawm tlat, mi dangte tana inhmang nasa, anmahni hre chiangtute nuna thusawi khawp a nun ropui nei hi khaw tin leh veng tinah an awm thin a. Chung mi ropuite avang chuan Mizo nih hi a nuam a, Zonunmawi hi a par leh thin a, Kristian nih man a awm thin. Readers’ Digest chhiar thinte chuan mahni mihringpuite tana mahni inphat a beitute chanchin an ziah thinna ‘Everyday Heroes’ hi kan chhiar fo awm e. Heng mite hi chu kan politician thenkhat, an thil tha tih leh an chet velna apiang ropui taka puanzar duhte nen an inang lo viau. Fak hlawh duh vanga intihuaisen leh intifel chawp an ni lo a, hmangaihna avangin mi dangte tan an inpe tawp mai a ni. CNN pawh hian ‘Hero of the year’ atan an thlang thin a, mi dangte tana inpe chawimawi phute hnenah an hlan thin. Nikum (2017) atana an chhawp chhuahte chungchang CNN-in a tarlan dan chu - An hnathawh leh an thawhrah hi chi hrang hrang a ni hlawm: A thenin fahrahte chenna tur an siamsak a, thenkhat chuan indona hmun a rilru kehchhia leh thinlung ngui vek tawhte an enkawl bawk a. Chutih rual chuan, an vai hian thiltum chiang em em an neih vek chu : an chhehvela miten nuna hmasawnna thlentir hi a ni. Chutiang mi zawn chhuah a, an phu tawk chawimawina hlan ve a, mi dangte fuih thar tura pho chhuah hi kan ram media-te hian ngaihtuah ve se a duhawm hle a ni. Mizo zingah hian kawng hrang hranga hriat hlawh mi lar an awm ve ta nual a. IT & media lama hmasawnna avang hian mi lar mak deuh deuh thlengin an lo la chhuak zel dawn ni pawhin a lang. Mahse, mi lar zawng zawng hi ngaihsan vek tlak an ni lo a, media-a kan hmuh thin mi langsar tak tak te hi an nun a lem viau thei tih hi hriat a tha. Thangtharte hian kan ngaihsan zawng kan thlan fimkhur a ngai ta viau, mi lar leh hriat hlawh, hausa leh thiltithei, politician langsar nazawng ai chuan mi dik leh rinawm, huaisen leh taima, mi dangte tana inpe te kan ngaihsan a hun tawh. Kan mi ngaihsante hian min hruai thui viau thin a, thangtharte ngaihsan zawng hi nakin a kan hnam nun hruaitu tur a la ni thei dawn. Mi tak tak leh tak tak lo thliar thiam a hun hle a ni. India Republic Day a lo hnai leh ta, kum danga an tih angin kumin pawh hian naupang huaisen 16-te National Bravery Award 2018 hlan an ni leh dawn a. Chung zingah chuan Mizo rawlthar a thianpa tui tla chhan a tumna lama chesual ve a, nunna chân ta F Lalchhandama pawh a tel nghe nghe. Ram pum huapa huaisen chawimawina dawng thei mi huaisen kan nei thin hi a lawmawm khawp mai. Hetianga huaisen chawimawina dawng thinte hian hriat hlawh zui se, mi dangte fuihtu ni zel se, media-in a siamchawp mi lar thenkhatte ai chuan kan hnam tan an hlu zawk si a. Kan veng leh khuaah hian mi dik, rinawm leh taima sawi kan hre theuh ang. Mi dangte ngaihsak leh buaipui peih em em, damlo kan peih tak te, mi retheite tanpui thin te, mi nunna chhanchhuak te, chhiattawk an awm changa lang ziah te, khawlai tifai peih em em te, mi harsate pui nasa tak mai te.. chutiang mite chuan chawimawi an phu hliah hliah a. Chawimawi tur dik chawimawi a, ngaihsan tur dik ngaihsan a hun ta.