Dr Hrekima Titi

Chhawng Thuma Thlitfim

Dr. C. Lalhrekima - Sep 28, 2014

Chhawng Thuma Thlitfim

He thawnthu tawi tha zet mai hi Durtlang Hospital-a mit daktawr Tetei’n whatsapp-a a rawn thawn a ni. A bulthum dang ka hre lo. A tha reuh em a, titipui ka chak tlat. Khai aw.. Mi pakhat hian mi ril Socrates-a hnenah chuan, “I thianpa chungchanga ka thu hriat hi i hre duh em?” tiin a zawt a. Socrates-a chuan, “Ngawi lawk teh, min hrilh hmain fiahna paltlang lawk phawt teh se. I thu min hrilh tur hian Chhawng thuma thlitfim a dawl em tih en ang aw.” “Chhawng thuma thlitfim a?” “Ni e, ka thianpa chungchang min hrilh hma hian i thil min hrilh tur hi thlitfim phawt a tha ang. Thlitfimna hmanraw pakhatna chu ‘Thutak a nih leh nih loh’ a ni. I thil min hrilh tur hi thutak a ni chiang bal tih i hria em? Chupa chuan, “Hre lo, tlangkam titi ka hriat ve mai phei chu a ni..” Socrates-a chuan, “A nih tak chu. Thutak a nih leh nih loh i hre lo phawt maw? Thlitfimna hmanraw pahnihna chu , ‘A that leh that loh’ a ni ve thung. Ka thianpa chungchang min hrilh tur hi thil tha lam a ni em?” Chupa chuan, “Ni lo, chu lam lo zawng chu a ni mah zawk..” Socrates-a chuan, “Chu, ka thianpa chungchang chanchin tha lo lam min hrilh i duh a, mahse thudik a ni nge ni lo i hre lo lehnghal. Engpawhnise, thlitfim chhawng thumna a la awm cheu. A tangkaina lam a ni ve thung. Ka thianpa chungchanga i thu min hrilh tur hi ka tan a tangkai dawn em?” a ti a. “Tangkai lem lo ang” Socrates-a chuan, “Chuti chu, i thu min hrilh tur chu thutak a nih loh a, a tha lam a nih bawk si loh a, a tangkai dawn bawk si loh chuan, engvangin nge min hrilh kher ang?” a ti ta a. Mi chanchin eng eng emaw sawi tur hi kan hre khawp mai. Kan bulah pawh mi hian eng eng emaw an sawi fo. Kan inrel neuh neuh fo mai zawng a nih hi. Thiandun titi mai mai nia kan ngaihte hian thiandun ramri a kan chang a awm a, khual thuthang leh ar pan chuk an sawi ang maiin a thu kal zel chu a hraw tawlh tawlh duh fo. Titi mai mai hian mi rilru a kuaiher nasa thei hle bawk si. Tu emaw titi kan hriat atang ringawtin tu emaw chu kan hmu dik lo thei a, ngaihtuahdan dik lo kan neih phah thei a, rilru tha lo takin mi kan thlir phah thei. Tuemaw chu kan lo ralkhat ngei ve ringawt thei a, kan lo dem ve ngawih ngawih thei tlat. Kan chanchin hriatte hi a dik nge dik lo pawh hre chuang lo hian kan thehdarh ve zel a, chanchin tha lo lam hi kan sawi chak zawng a ni fo a, tangkaina awm miah lote hi kan phulpui hlut zel mai si. Thlitfimna hmanrua hmang miah loin kan ngaithla a, a sawitu tur lahin thlitfim sa kher kan sawi bawk si lo. Thlitfim loh thu leng vel hian min va tibuai nasa thin em! Socrates-a ‘chhawng thuma thlifimna’ hmang hian kan thusawi tur hi thlifim hmasa thin ila, thlitfim sa hlir hi kan ngaihthlak duh zawng ni ta vek bawk se a nuam awm mang e! Thudik a nih si loh a, chanchin tha lam a nih bawk si loh a, a tangkai bawk si loh chuan engah nge kan inhrilh kual vak vak kher tak reng ang le??
Share now