Nikum July thla a Assembly session-ah khan Land Revenue & Settlement Department minister-in lei man tihpun tum a nih thu leh tum khatah sang taka tihpun aiin, tlem tlema tihpun zin deuh turin sorkarin ruahhmanna a siam thu a sawi a. Leiman tih pun tumna chhan chu Revenue department-in kum khata pawisa a hmuh theih zat a tlem em vang a nih thu leh thil man sang zelah ram leilung hlutna a lo san ve zel avangin tihpun hi a hun tawh tih a sawi tel nghe nghe. Minister sawi ang hian dan thar The Mizoram (Land Revenue) Act 2013 hnuaiah chhiah chi hrang hrang - Leiman, Zoram Chhiah leh Building Tax tihpun a ni ta a. Mahse, a sawi loh danin vawi khatah nasa taka tihpun a ni thung a. Sum pawh kum hmasa 2013-14 aiin a lêt deuhthaw kumin hian hmu tura an inngaih thu tualchhung chanchinbuah kan lo hmu bawk. Vanglaini chanchinbuin a ziah dan chuan Aizawl district bikah hian kum 2013-14 khan Rs. 2,88,68,810 an hmu a, kuminah chuan nuai 510 vel hmuh an inbeisei a ni. Sorkar hian sum harsatna namen lo a tawk mek a, chief minister phei chuan a sen a kawk tawh ti hialin a sawi a nih kha. Chuvang chuan mipui mamawh bulpui pathum, a lo kan awm theih loh - buhfai, tui leh electric power-a sum sensote pawh hi sorkar tan phurrit a tling ta niin a lang a. Finance minister-in budget a pharh tum a hengte (User charge) hi a man tihsan a nih tur thu a sawi angin kumin hian tihpun a ni ta bawk. Mahse, mak deuh chu, chutiang khawpa sum harsatna an sawi lai chuan VIP-te hman tur car thar leina atan Cheng nuai 341 chuang an seng leh lawi a. Car thar lei lo hian kum tam tak an la lal thei tih hi kan chiang tlang viau si a. Buhfai (APL ration buhfai) man Kg khatah Rs 9.50 atanga Rs 15-a tihsan a nih hian VIP car thar dawngte a nghawng lem lo a, tui bill a let a tihpun pawh hi kan thlan lalte hian an tuar ve lo. Chutiang bawkin leiman tihpun pawh hi mi hausa te tan phurrit a tling lo bawk ang. Mahse, tu emaw tawngkam takin mi rethei leh pachhia, leirem rap thei lote tan chuan phurrit a tling tak meuh a ni. Tunhnai lawk a The Aizawl Post-in a tarlan dan chuan khawpuia mirethei tam lamah Mizoram hi India-ah pangana kan ni mek a, khawpui a cheng za zel a 37.9 hi mirethei an ni a. Kum 20 vel rora chhu tawh, eizawnna hlawk a nih lohzia hretu nu pakhatin, “Kan thiam ve tawk a ni a; tin, sumlu a ngai lo a, hetiang bak keini tan thawh tur a awm lo. Kan thawh loh te’n eng nge kan ei ang? RATION MAN A PUNG LEH NGHAL A, A HMA AIA KAN THAWHRIM LOH CHUAN KAN TLIN VE DAWN LO,” tia he chanchinbu a hrilh hian ngaihtuah a tithui khawp mai. Aizawl hi thil man tona hmun a ni a, ni tin mamawh, silhfen, chawhmeh thlengin a to tial tial a, mi rethei zawkte tan khawsak a harsat sawt hle a, hna nghet nei lo tan eizawnna a harsa tial tial bawk. Chutiang karah chuan mi rethei leh hausate hnena inang tlanga chhiah tihpun chiam te hi a chi ber em...tih te pawh a ngaihtuah theih rum rum. Mi thiamte sawi thin dan chuan mi tin huapa chhiah/leiman tihpun a nih hian a rethei apiangin an tuar na bik a, a punna bi (rate) a inang vek a nih phei chuan a mi harsa zawkte a nghawng na zual thin. Chuvangin, chhiah lak dan kalphung tha (principles/canons of taxation) an sawi zingah chuan mi hausa leh retheiten an pek theih tur zat (Ability to pay) ngaih pawimawhsak tur a ni. Chubakah, chiah/leiman tihsan dawn hian sum hmuh pun dan tur chhut chhuah ringawt piah lamah a nghawng turte uluk taka zir lawk a, a kaihhnawih theih tur thilte pawh chhut lawk tur a ni bawk. Chhiah thenkhat phei hi chu a petu hian a tuar lo a, mi dangin an tuar daih thei. Entirnan, building tax leh property tax hi sorkarin tisang ta vak se, in neituten an inluah man an tipung thuai anga, chhiah petu ni loin an inluahte khan chhiah phurrit chu an phur daih dawn a ni. Sorkarin sum harsatna a tawh lai phei chuan sum leng vel a tlem thin a, chutianga sum leng vel chang a eizawng - loneitu leh chawhmeh zuar te, kut hnathawk/inhlawhfaten harsatna an tawk lo thei lo a, sumdawng thlengin an tuar thin. Sorkarin sum harsatna a tawh avangin chhiah leh thil dang man a tipung ni awma an sawi pawh hi mipui tan hriatthiampui a har khawp mai. Sorkar thil pawimawh tak ni lem lo pu berten helicopter an hmang leh pawp mai thin te, hmalakna lian tham ni lem lo tlawh a khualliana an tang thinte, minister-ten sorkar lirthei an kawl thluah te leh kan VIP te inrenchem vak lo a an che vel han hmuh te hi chuan sum harsatna phuhrukna tura mi rethei zawkte han sawr fu hi a dik lo a ni. Inneihna hmang tura helicopter an la hmang ngam te hi chu a zahthlak lamah a kal. Kan ram hruaitute hian sum harsatna hi an vei tak tak lo a nih hmel. Kan ram hruaitute hi ram tana hnathawk tura thlan lal an ni a, engmah thawk tak tak loa mipui sum hmang mai mai tur an ni lo. State thenkhatah chuan an hruaituten hna an thawh tak tak avang leh sorkarin hmalakna hrang hrang a kalpui avangin cabinet meeting te hi kar tin an nei thin. Kan pute hi chuan nikum september hnu lamah khan cabinet meeting an nei leh tawh lo ni awm tak a ni, cabinet meeting rel ngai khawp hmalakna lian tham a awm loh vang ni maw. Tun hnai khan PRISM president Vanlalruata hian facebook group (My Prism group)-ah kum 2001-2002 atanga tun thleng a kan state budget a hnathawhna tur sum a tlem tial tial dan a tarlang a. Kum 2001-2002 khan budget-ah sorkar hnathawk hlawh leh sorkar inrelbawlna atan ni lo, hnathawhna tur liau liaua sum ruahman zat chu a pum pui atanga 36.10 (36.10%) a ni a, tuna kum kal mekah hian hnathawhna tur sum chu za zelah 10.97 (10.97%) chauh a ni. Chuti a nih chuan sorkar hnathawk hlawh leh sorkar inrelbawlna leh kan pute veivahna ilo velah hian budget pum pui atanga 90% lai a kal ral dawn tihna a ni a. Sum an ren lem lo zel a nih phei chuan hnathawhna tur a lawi hi a awm lo thei hial ang.