Mizo Tlawmngaihna a thi tan tawh tih leh a dai tawh ti a, an sawi fo thin hi i hre tawh em? Mi thenkhat chuan kan hnam hi a chhe tawh, kan rilru put hmang leh sukkthlek enin zuai lam kan pan tial tial an ti chawk a, thil thenkhatah chuan a dikna chen a awm mahna. Sual leh diklo a langsar a, mi pakhatin thil tisual ta se, a suala te vangin a fel a ten an tuar chang a awm a, a fel zawkte nen lam thil dang ngaihtuah tawh lovin kan in pawng dem vak a, sual ta vek leh chhe vek tur angin kan in ngai ta thin.

Hetiang chiah hian mi inpe tak tak leh thil tha ti duh tlat, dikna leh rinawmna, tlawmngaihna sahuai thing vawn tlat  mihringte avangin kan zavai hian kan thang mawi mêk bawk. Thil reng reng kan thlir dan hi kan thlak thiam a ngai a, a tawng chak chak te, ngaihdan sawi lo pawm hmak mai te, engah mah hmaa mi lo dem chiam mai te, ngaihtuahna hmasa leh hnuhnung zawk pawh nei thei lo khawpa mi sawi apiang awih mai zel kan nih chuan mi sam leh mi tih nuam tak kan nih ringawt tihna a ni a, kan in zir a ngai hle tihna a ni.

Social Media a kan hmuh zawng zawng te, kan thu hriat zawng zawng te khaikhawm leh finfiah lem lo va, a pang leh lam pawh ngaihtuah lek hman lo hi kan tam khawp mai. Hemi a nih vang hian thil reng reng kan thliar thiam a ngai a, a chhan kan hriat hi kan tih tur a ni.

Mahni awm hmun atanga ngaihdan tlangau pui phawng phawng 'Phone Pasaltha' kan tam ta lutuk hi a veiawm a, a taka che chhuak ngai lo lo hi an nih duh viau leh nghal. An sawi thin - a taka chet chhuah hi thil har tak a ni. Sawi ringawt chu a awl, a taka tih hi kan harsat tlâng chu a ni. Inkhel pawh hi a entu tan chuan sawi a awl a, a takah erawh a har zia an sawi fo thin. Mahni awmhmun atanga a thim zawng leh a chhe zawng hlir ngaihtuah mi hi awm ve a ni a, Pu Lalnunpuia Hrahsel in a lo sawi tawh angin Social Media hi Sawisel Media ah kan hmang ta mai emaw tih tur a ni.

Mizo Tlawm­ngaihna tla hniam tawh leh chhe tawh tia kan sawi fo chu a la tlakhniam loh zia chhiatna karah a takin a rawn lang chhuak a, a chunga kan sawi tâk ang chiah khian thil tha titu mi inpe te avangin kan thang mawi a, chhiatna karah Mizo tlangval ten a takin tlawmngaihna an lantir hmuh kha a va nuam tak em! 

Mizo Mipa tlawmngai tak tak mahni in lum kalsan a, tanpui ngaite tana pen chhuak tlangval thawh hreh neilo mi eng emaw zat an awm. Tanpui ngaite tanpui tum tlat, midangte tana inpe eng emaw zat an awm tih hriat ringawt leh hmuh ringawt pawh khan thla hi a muang veng veng thei zuk nia! In mamawh tawnna khawvel a cheng kan ni miau si a, kei ngei pawh hian midang ka la mamawh dâwn a, midangte buaipui ngaiin ka la awm dâwn, tu a te mai pawh hi in mamawh tawn vek kan ni. Chung hun lo thleng tur chu kan hre lo, mitthla leh suangtuahna ah hnam dang an lang mawlh lo, midangte tana inpe thin, a sur a sa hnuaia che chhuak thin phut let neilo tlawmngaihna vawng nung tu Mizo Tlangval te ngei a ni ka rilru luahtu ngei chu!

Tunhnai chhiatna thleng kan hmu in kan hre vek a, chhiatna thleng karah lawmna min thlen tu Mizo tlangval tlawmngai rualte che vêl hmuh kha a va nuam em! Inkalpawhna tam tak a pin avangin damlo, Mitthi te zawn an ngai a, tunhma a kan tih thin angin hlânga in zawn a ngai hial. Kawng mumal lo, leimin kara che chhuak tlangval tlawmngai te kha fak an phu ngawih ngawih a ni. Mizo nih hi a nuam a, chhiat tawh ni hian a nuam zual bîk emaw tih mai tur a ni. Kan in pui tawn liam liamna te, kan in tuamhlawmna te, kan in ngaihsakna leh adt, thil kan tih khawm let let hian a chhunga chen a ti nuam a, hnam dang kan ngai bîk lo.

He hnam a ka piang hi ka lawm a, a tul huna hnam tana pen chhuak thin Tlawmngaihna vawng nungtu Mizo hnam a kan piang hi lawm nachang i hria ang u. Mizo Kristian a kan piang ringawt te hi lawmthu sawina tham a tling. Hnam dang kan awt bîk lo, Zonun Zemawi hi a vul zel theih nân nang leh kei hi kan pawimawh a,  Mizo hnam tan eng nge ka tih ve theih tih rilru hi put i tum zel ang u.