Tun hnaia titi luahtu ber pakhat chu chhim tawp lam, Burma ramri a India sipai inchhek chungchang hi a ni awm e. Thuthang a tam a, rin dan mak deuh deuh pawh a leng nual mai. Burma hel pawl Arakanese Army leh Burma sipai an inkap nasa a, ramri hnaih a nih avangin Assam Rifles an inchhek khawm pawh hi thil nih dan tur tak pawh niin a lang a, BSF lam pawh an inralring ngeiin a rinawm. Chutihlaiin, sipai tak tak (Assam Regiment) pawh an inchhek khawm ve a sawi an awm a. Tak tak a nih chuan thil inmun thuk zawk a awm pawh a ni thei.
India ram venhimna kalphungah hian tualchhung buaina leh ram mipui venhimna lam hi ministry of home affairs kutah a awm a. Sipai tak tak (Military) hi chu ministry of defence hnuaia awm an ni thung. Ministry of home affairs (MHA) hnuaiah hian paramilitary forces, a tul huna army pui thei tur Assam Rifles leh Indian Coast Guard an awm nghe nghe.

ssam Rifles hi India hmarchhak biala ram chhung venhimna thawktu an ni a, helho beih leh ramri venhim hi an hna pawimawh tak a ni bawk. Ministry of home affairs hnuaia Central Armed Police Forces hrang hrang zinga Border Security Force (BSF) hi Pakistan, Bangladesh leh Burma ramri vengtu an ni a. Mizoramah pawh an awm a nih hi
Tunlaia Burma ramri hnaia Assam Rifles (29 AR) te an inchhawp chiam mai hi Burma sipai leh helho inbeihna vang a ni thei a. Arakanese Army hi hel pawl lian tak an nih avangin hmarchhak hel pawl dangte nena inpawh tha tak leh inzawmna nei an nih phei chuan India sorkar tan ramri vengtu dah hi tihmakmawh a ni ang a, Burma ram chhunga inbeihna avang hian raltlan pawh an awm thei bawk a, heng avang hian assam rifles leh BSF an dah hi a awm viau. Mahse, ministry of defence hnuaia awm Assam Regiment (sipai) te an tel ve a nih chuan thil a dang daih thei.
Assam Rifles rawn inchhawp ta chiam mai hian mi tam tak a tichiai a, ngaihdan mak tak tak a piang a, Mizoram sorkar hian a hriatpui lo a, sorkar laipui atangin hriattirna engmah an dawn loh thu home minister leh chief secretary te pawhin an sawi. State sorkar hriattir lawk lo a lo kal thut an nih avang hian Lawngtlai SP in Assam Rifles te hi nunchan zirhona (joint excercise) nei an nih thu a sawi pawh kha a awm viau. Mahse, sipaiin nunchan zirna an neih dawn chuan mipui thlabar lohna tur leh an himna turin a hmain an sawi lawk thin a. Mizoram sorakar pawh hian a hre lawk tur chu a ni.
Nilaini khan Vathuampuiah sipaite hian mipui an kokhawm a, ram hnuai a kal lo turin an ti a. A thlawna inentirna (free clinic) an hawng a, mipui lakah that an chhuah a, an kara harsatna a awm lohna tur an dap viau tih a lang a. Chutihlaiin, ramri hnaia chengte nunphung tihkhaihlak chin erawh an nei a, ram hnuai a kal lo turin in tih ngawt pawh hi thingtlang pa tan chuan a buaithlak ngawt ang. Hetia rei lo te chhunga an rawn inchhawp rup rup a, an rawn inkulh rup mai pawh hi khaw mite tan chuan a nuam chiah lo ang. Checkgate te an siam a, lirthei tlan vel an chhinchhiah zel bawk si a, an nunphung an tichep sawt a, nunau tan phei chuan hlauhthawnna a awm duh viau maithei a ni. Heng avang hian political party pakhat (PRISM) chuan thuchhuah an siam nghe nghe a nih kha.
Chutiang karah chuan thil dang a lo awm leh a, Thawhlehni (February 19) khan union home ministry-in thupek an siam a. Praveen Kumar Srivastava, Addl. Secy(P) hminga siam a ni a order (F. No. 12011/1/3378784/2017/PF-VI) ah chuan India hmarchhak a heng state panga - Assam, Arunachal Pradesh, Manipur, Nagaland leh Mizoram a ramri hrul district-ah te hian Assam Rifles te thuneihna sang tak, rambuai laia an thuneihna ang kha pek an ni a - police leh thuneitute phalna (warrant) nei kher lo pawha an duh duh an man a, an dap theihna tur thuneihna an nei. Home ministry-in thupek a chhuah ngawt chhan hi hriat a ni lo a; mahse, state dangah nghawng nei lo mah se Mizoram chhim lama Assam Rifles inchhek khawm nen a inzawm ngei ang tih erawh rinhlelh rual a ni lo.
Home ministry-in Assam Rifles-te thuneihna a pek hi Ningani (February 21) khan kan hre chauh hlawm. He thupek hi helho awmna ram buaia an pek thin a ni a, CrPC hmangin Assam rifles a lubawk chin thuneihna hi pek an ni. He thupek a dan an tlawhchhan te hi the Assam Rifles Act 2006 te, the Passport Act 1967 te, the Foreigners Act,1946 te a ni daih nghe nghe. Mizoram lamah chuan he thupek hi ngaihven teh chiam an awm lem lo a, political party zingah PRISM hian he thil thleng hrim hrim chu an ngaihven viau a, anni bak hi party leh pawl dangte pawhin thawm an neih hriat a la ni lo. Home ministry thupek hi ngun zawka chhut chuan (hmarchhak state dang huamtir mahse) Mizoram bak nghawng tur a neiin a lang lo a, chhim lam ramri hnaiha chengte tana harsatna thlen thei tur thupek a nih hmel.
Citizenship (Amendment) Bill ang khan tlai khaw hnuah kan tana pawi thei tur thupek a lo ni tih hi kan hre leh chauh ang tih a hlauhawm. Chutiang zawnga kan sorkar leh party leh pawl dangten ngaihtuahna an sen loh laiin zirtawpni khan Assam-ah chuan dodalna thawm a lian hle a. Assembly session-ah eptu lamin rorel lai tikhaihlakin an sawi chhuak a, na taka an dodal avangin an thawm a lian lo thei lo a. Chuvang chuan home ministry pawhin Assam Rifles te thuneihna an pekna thupek hi an titawp rih a. Mahse, tihnun leh theih reng a ni.
Sawi tawh angin Mizoram atangin sorkar emaw party leh pawl emaw hming a he thupek dodalna hi a la awm lo a, an tihnun leh chuan a tuartu tur kan ni dawnin a lang a, zirlai pawlte tal hi an chet ve vat a hun khawp mai. Rambuai lai hreawmna ber chu sipai inluling lutuk kha a ni a. Rambuai loh laia an inlulin theihna tur thupek chhuah hi a tul kher lo ang, sorkar laipui hian hmarchhaka chengte tihbuai hi a sim a hun ta hle mai.
Rambuai laia India sipai leh Assam Rifles an rawn sapatal theihna dan The Armed Forces (Special Powers) Act lah kha Mizoramah hian tihtawp/hlih a la ni lo lehnghal. He dan hi hmarchhak bial a helho beihna atana hman tura parliament dan siam a ni a, a anpui hi Jammu & Kashmir-a hman tur siam a ni bawk. He dan (AFSPA) hi rambuai lai khan India sipaiten an hmang sual nasa hle a, mipui tawrhna rapthlak tak tak a thleng a nih kha. Rambuai tawh loh hnu hian a thi zui mai a ngai an awm a, mahse, tihtawpna thupek chhuah a nih loh chuan engtik hunah pawh kaihthawh leh theih niin a lang a. Chuvang chuan kan thenawm Manipur-ah chuan nasa takin an lo dodal a, hlip turin sorkar laipui pawh an nawr nasa thin.
Nikum khan sorkar laipuiin AFSPA hi Meghalaya state pumpuiah leh Arunachal Pradesh hmun thenkhatah hlih a nih thu an puang a, Tripura-ah pawh hlih a lo ni tawh. Tunah hian Mizoram, Nagaland, Manipur leh Assam-ah he dan hi a la nung reng. Chumi awmzia chu he dan hi sut a nih loh avangin buaina a thlenin sipaiten he dan hi an chelek thei tihna a ni a, kut an thlakin, an dap thei a, silai hial an chelek thei. 1986-a Inremna thuthlung ziah a nih khan he dan hi hlih nghal tur anga ngaih a nih vang a ni maithei sawi zui a ni ta lo reng a. Mahse, Mizorama hman tura puangtu hian Mizoram a hlih a nih thu a puan loh chuan a la nung reng niin a lang a. Hman deuh khan NESO pawhin hmarchhak puma hlip turin an nawr tawh nghe nghe a nih kha. Kan sorkar neih tawhte hian he dan (Mizoram chhunga) hlip turin hma an lo la tawh thin em hriat a ni lo a. Hmalak hun lai tak a nih hmel.