Zalen chanchinbu chhiar thintute zawng zawng kum thar chibai vek ule. Kuminah hian eng tak tawng ang i maw? Kan tan kumin hi kum tha a ni ang nge, kum chhiaa ni zawk ang? Malsawmna kan dawn kum nge vanduaina kan tawh kum ni zawk ang? Beiseina nen hma lam i thlir phawt ang.

Kan hre vek a, tun kum liam taah khan Covid-19 hripui vangin nasa takin kan nun phung a khaihlak a, khawvel nun phung a buai a nih kha. Kumin hian ‘a zual zapui vailenhlo’ an tih ang chu a ni em lo turah ngai ila, kan hripui pawh hian zahngai se, kian zai rel tawh teh se.

Hripui leng te, khuare lchhiatna hrang hrang - lei min, tlangkang, khawkheng, tuilian etc. te hi kan thunun theih piah lam thil a ni a, saw ithu a cheng lo va. Chutiang ni lo, kan nun phung tha lo leh nun hman dan dik loh vanga kan chunga chhiatna lo thleng hi a awm bawk a. Vanduaina kan tih tam tak hi a tawnga kan tawng buak, a choa kan cho chhuah a ni ve nawk a nia. Thalai an han thi leh ringawt maite hi a lungchhiatthlak a, a chhan han zawt chik deuh ila, ngaihbel tur thil duhawm lo lianpui, thil chin than tha lo tak hi an lo nei leh thin. Chutianga chhiatna bawiha inbarh lut lui talh lo tur chuan he kum tharah hian kan nun kan fimkhur a, kan chin dan tha lo laite kan bansan a tul mang e.

Mihring kan inang lo a, kan nunphung leh khawsak phungte pawh a inang diak diak lo. Chutiang a nih avang chuan veng khata cheng theuh theuh, chhungkaw khata khawsa tlang theuh theuh hi kan thanmawh bawk te, hmasawn kan ngaihna laite pawh a inang lo zung ang. Entir nan, tho hma thang tan chuan zing khawvar ruala thawhmai hi a harsa reng reng lo. Chutih rualin kumkhaw thua tho hma ngai lo, tho tlai thang tan chuan zing dar 5-a tho nalh tur chuan er thapuia er a ngai thin. Chutiang mi tan chuan kum dang aia tho hma tura tan lak kha a hmasawnna tur lian tak a ni ang. Tho hma thang tan chuan a ho viau mai thei. Mahse, thenkhat tana la zai tawn chah ang leka awlsam hi mi thenkhat tan chuan ralpui phiara phiar a ngai thin. Mi thenkhat tana harsa deuh hi thenkhat tan chuan a awlsam viau thei bawk.

Hmasawn kan ngaihna lai hi mahni kan inhre ber a, tumah kan insawisak thei lo. Hmasawnna tura kan kum thar thutiam chu engpawh ni se, a tihlawhtling tura thil pawimawh ber pakhat chu mahni inthunun/mahni inhneh hi a ni. Kum thar thutiam tha tak tak nei mah ila, a tihlawhtling tura mahni kan inthunun that a, mahni kan inhnen si loh chuan reilo teah keimahni ngeiin kan bawhchhe leh ang a, kan tanna ngaihah bawk kan tang leh ang.

Tin, thil tha lam, hmasawnna lam thil hi chu beih fat fat ngai a ni thin. Chu hmasawnna kawng zawh tur chuan mahni inhnen/inthunun that a pawimawh ber a ni. Entir nan, lehkha den te, zu in te hi hmasawnna lam thil a ni lo a, nawmchenna lam a pawl zawk a ni. Lehkha deng tur hian tan lak a, mahnii nhneha mahni infuih chiam a ngai lo. Nun phungbuai khawp leh chhungkuain a tawrh khawpa deng thang tan chuan deng lo tura tan lak a, mahni inthunun a pawimawh zawk a ni. Chutiang bawkin zial zu mi tan chuan zial zu tura tan lak chiam a ngai miah lo. Mahse, meizial nghei tum tan chuan chaw ei kham puar pengpawng lai, châkna sosan lai ber pawha zu lo tura tan lak a, thutiam bawhchhe lo tura mahni inthunun fat fat kha a pawimawh lai chu a ni. Chutianga mahni inhneh a, mahni châkna thunun thei mi chuan hma lam an pan hret hret a, a tha lam kawnga mi dangte fuih theitu, mi te entawntlak an lo ni hial thin.

Mizo thufingin, ‘A tha lam kawng a chho a, a chhe lam kawng a phei’ an lo ti a. A chhe lam kawng phei nuam zawh tur hian tan lak a ngai reng reng lo. A tha lam, hmasawnna kawng zawh tur chuan mahni inthunun tlat a, beih fat fat a ngai thin. Zelthel takin a chhe lam kawng phei nuam chu kan zawh zel dawn nge, hmasawnna bung thar kai turin mahni inthununa, bei fat fat chungin a tha lam kawng chho kan zawh zawk dawn? Kan hriat reng tur erawh chu, a chhe lam kawng phei nuam zawhtute hian kawng nuam ringawt an zawh seng bik lo a, chhiatna kawr ruam an dai hun a awm ngei ngei thin. Chutiang bawkin a tha lam kawng chho zawh lui ngat ngatte hian kawng chho ringawt an zawh kumkhua bik lo a, a tawpah tlang chhip thengthaw nuam tak, chawlhna tlang thawveng an lawn chhuak nge nge thin.