ZALEN chanchinbua zalèn taka hmun min petute zárah hian ka va lãwm tak êm! Thuampui atanga Mission véng pa, Pu Dr Hrekima nèn te hiala kan han inthenawm thei te hi, ka làwmna hian bán aia sáng a chen ang chû!

Mahse, amah he Zalèn chanchinbua ka zalenpui Dr Hrekima roh hi, ka ziah tùr tak kár hmasa khan mi ziah khalh khanglang a; ka haw riau! Chhungkaw fiamthu pawimawhzia kha, a rawn sermon ta roh a—ka ngaih pawimawh tak a ni si. Ka’n tui hnih tui/thum ve dáwn teh ang!

Chhúngkua hi e, awmho kan ni a, hlim tlàn loh hi a nuam lo! Tûk tin tlai tina chaw ei ho thin kan ni a; hlim kan mamawh; a phù pawh kan phú. Chhungkaw inhauh bur burna hmuna awm kan châk nâng; mahse la, engati nge kan fiamthu peih tlat loh?

Páwn lamah kan va ho a, kan va uang a, kan va fiamthu vêl a; a nih leh, inah engah nge kan seng loh duh loh? Ho reng ila, uang reng ila tih thu ka sawi a ni lo a; chhungkaw hlim kan duh chuan hoh tûk, uan tlai, fiamthu zàn te pawh i nei ve ang u, ka tihna zâwk a ni.

Inhmuam ûp kohhran upa kan hnê tawh ang hian (ka tawng na mah mah em aw?) ti khèn khùn uaptu upa kham chin kan nei thuai dawn! Thangthar, thalaite hian e, uang ve fo te, hoh cháng nei ve thin te, fiamthu duh ve tak te hi kan tleipui tan riau tawh a nia. Chutih rual chuan, ho reng, uang reng erawh kan ngaithei leh chuang miah lo. Ka sawi awmzia chu, a hunah chuan fiamthu pawh duh ve mai tur, ka tihna a nih chu.

Chhungkuaa tan hi a va pawimawh êm! Fate hohpuia uanpui thiam te hi mi fing niah ka chhál. Hohpuia fiamnthupuia nuih uar uar chángte neih ve tur. Hlimna leh lawmna kan tih teh fo hi, zawn chiam chi a ni lo—chhungkuaah, hetah a awm a; bul kan tan thei reng a nia. 

Fate ti lãwm thiamte hian fate an hau khát viauin ania ka rin ni. Fa pahnih ka nei ve, ni lo pathum (pakhatin min kalsan ta!); ‘Fa enkawl hi ka thiam e,’ inti an awm a nih ngai chuan an rui a ni ang! Chhiarkawp ka zirtir thin, fa enkawl erawh … ka thiam lo thlâwt!

Mahse, a hunah chuan ka hohpui fo a, ka uanpui a, ka fiamthùpui fo mai. Chu chuan chhúngkaw hlimna a thlen niin ka hre ve tlat.

Mi hi e, an nuih na nâ nâ chuan an lãwm tlángpui.

Haw teh u, kan inkhung a, kan in lock-down a, min Red Zone thùl a, kan inawm hnem bawk a, chhúngkuaa hlim hi i zir thar teh ang u. Kohhran, kan véng … tih hluai aiin, hawh u, kan inah hian i tan teh ang u. 

A hunah chuan nui ila, fiamthu ila, ho ila … chu chu chhungkuaa tan i zir teh ang u khai.