Mi thiamte chuan chhungkua hi Zirna In hmasa ber leh pawimawh ber a ni an ti thin a. He Zirna In pawimawh ber hi 1037 BC atangin a lo intan tawh a ni, an ti bawk. Tun hma kum sang tam tak atang tawh khan tun hun thleng hian chhungkua hian hringnunah hian hmun pawimawh tak a la chang reng a. Chutiangin kan hun tam zawk hmanna chu chhungkua a ni a. Kan innghahna bulpui ber pawh chhungkua bawk a ni. Mimal hlawhtlinna leh mihring hlawhchhamna chu chhungkua hian a hril hle a ni. Chhungkaw  tha leh tha lo chu mimalah a innghat thui hle bawk. Chhungkaw tha atangin mi tha an lo chhuak a, chhungkaw relbawlna tha atangin mi hlawhtling leh mi ropui an chhuak thin a ni. 

Chhungkaw inrelbawlna tha loah chuan buaina in lalna a chang a, nun a buai a, chhungkua a keh chhe thin a ni. Chutiang chhungkua atang chuan thil tha a chhuak thei ngai lo bawk. Chutiang chhungkua chu kan ni ve mai em? tih kan inzâwt a ni. 

Heng inpumkhatna te,inlung­rualna te leh tanrualna te  hi chhungkaw tha siamtu leh kan mamawh a ni a. An tel lo chuan he 'Institution', hi a fuh thei lo a ni. Inpumkhatna te, inlungrualna te leh tanrualna te chuan remna a thlen a, chhungkaw chakna a ni a. A pawimawh zia chu kan hre thei mai âwm e. 

Heti taka pawimawh si hi kan ngaihthah ta deuh em? Kan chhungkaw dinhmun theuh hi han thlir ila, chhungkaw tha leh entawntlak kan ni meuh em? Thenawm te leh Vengte tan malsawmna nge kan nih a, an nunna atan hlauhawm hling, mi chhunna chi kan ni mai em? Kohhran leh khawtlanga kan that viau hian chaw tha lo kan lo fâh reng zawk em? tih hi zawhna lian tak a ni fan! 

He kan chênna khawvêlah hian hmasawn kan duh a, changkan kan mamawh. Chung hmasawnna leh changkanna nei tur chuan beih a ngai a, thawh chhuah a ngai. Sum a ngai a, eiin kan mamawh. Kan chênna turin in leh lo  din a lo tul a. Mi te tih ang kan thlir a, tih ve kan duh. Neih thing lung khawng tak meuhvin kan rual­awhna phuhru turin in ropui leh changkang tha, mawi leh duhawm puah kan tum ve zel a. Chumi piah lamah chuan lirthei changkang mang kheng cheng nuai bi tam man neih kan la duh cheu! Chutih laiin kan tû leh fate tan thil tha tinreng kan ui hek lo. Rual an pawl loh hlauvin school tha thaah tirh luh kan la tum zel! Kan sum lak luhin a tlin tawh si lova, eiruk a lo ngai ta a. A tam emaw a tlem emaw eiruk chu kan innghahna a  lo ni mek. Kawng ngil leh tha, tluang tlam aiin kawng bum boh kan zawh tan a. Corruption lamlian zawhin chhungkaw keh chhia kan hmachhawn  mek a lo ni. 

Chhungkaw pawimawhna uar taka sawiin a tak takin chhungkaw tha leh innghahna tlak kan hlat tial tial em? tih hi zawhna lian tak a lo ni mek. Khawtlangah theihtawp chhuahin kan inhmang a, nihna chelh theih zawng zawng kan chelh a, inah kan awm tlêm êm êm a. Chutiang mi khaw­tlanga mi langsar tak chu, an chhungkuaah 'Fellowship' awm lovin pawn lamah an fellowship ta thung thin a ni. 

Chungkuaa Kristian, Kristian chhungkua erawh an la inchhal zel a, mahse  Kristian chhungkua dik tak erawh hi tlem tlemin kan hlat tial tial thung si a ni. 

Pâwn lama hming thatna chu in lama chhiatna a ni mek! Chhungkua administration  chhe zel avangin nun a kim lova, nun a him lo tan a ni. 

Eng nge kan sawi tak ang le?

Mizote hi huau huau ngaina hnam kan ni a. Inlên pawh hnam, rual kawm thiam leh rual kawm duh mi kan ni. Mi dang tel lo chuan kan nung thiam lova, mi dang zara rah chhuah tum mi kan ni. Chutiang mi kan nih avang chuan 'Fianrial nun' kan ngaina lova, a hlauhvin kan hlau zawk em? a tih theih. Kan Kristian nun pawh hi Fellowship nun a ni deuh ber bawk. Nun fianrial leh nun tak aiin a huhova nun leh thil tih kan ngainâin kan duh zawk a, kan thlang zawk bawk a ni.      Hetiang nun ze nawi tam lutuk hian chhungkua chu thlaler hmunah a dah a, chhungkaw khawhar tak a lo chang thin. Chu chuan chhungkaw tla bal a hring thin a ni. Kha Zirna In tha ber kha Zirna In tha lo berah kan chhuah  mek a nih hi ! 

A thlawna Zirna hmun, pawisa chawi ngai lo, hlu leh tha tak chu ruahsanin awm a awm ta mek a ni. A va lungchhiat thlak em! 

Heng zawng zawng hi eng vang nge kan tih chuan chhungkaw nu leh pa pawn lama an inhmang nasa lutuk te, pawla kan inhmang nasa lutuk te hi a ni kan ti thei ang. Chhungkua thlah thlama pawn lama inhman lutuk hi chhungkuain a tuar hle a ni. Hei hi thil hmuh theih chiang em em chu a ni. Fate tuarna a thleng a, puitling tuarna a thleng bawk. Khawtlang a ding chhuak a, ram a thang duang a, chhungkua erawh a keh mek si, tih hi kan hlapui a ni ang tih a hlauhawm hle. 

A hmasa berah chuan chhungkua, a dawtah chhungkua, a dawt lehah chhungkua hi ni zel se, a va ropui dawn em! I fate kal kânin kohhran leh pawlah inhmang thin suh. Fate-ah bul tan la, fate-ah i ke pen tan rawh. I tu leh faten Pathian Biak In an hmuh peih loh laite, ruihhlo leh zu bawiha an kun reng laia Thlarau va lo khah tum phêt tum suh. I tu leh fate ruihhlovin a tihbuai êm êm laiin ngaih tha takin lam tual pan tum kher suh. 'Family First' tih hi kan thupui ni zawk se' hei hi kan ram, kan hnam, kan khawtlang leh chhungkaw damna tur chu a ni. 

Joshua chuan, ,"Kei leh ka chhungte erawh hi chuan Lalpa rawng a nia  kan bawl dawn a ni" a ti a, Joshua 24:15. A then zu ngawl vei, a then drug ngawl vei! a thenawm tha duh lo chhungkua ni lovin, zavaia Pathian rawngbawl a ni a. Mahni in chhungkhurah a kim thei ang bua 

Lalpa tana maicham buatsaih thin leh Family Fellowship neih thin hi kan damna tur chu a ni. Khawvela thil pawimawh ber chu chhungkua tha leh hmangaihna hi a ni a.        He Saptawnga tawngkam hi a ril hle bawk "Family is not an important thing, it's everything" Engkim hi chhungkua a ni a, thil pawimawh tak a ni ngawt lova, engkim bul leh tawp a ni. Tho la, ding la, in chhungkaw tan bul tan tha leh rawh le. Thil dang zawng zawng aiin a pawimawh hmasa ber si a.