Kan pi leh pute kha lehkha thiam lo, tunlai tehna atang chuan mi mawl an ni a. Mahse, kawng tam takah thangtharte aiin an fing zawk a, an thir thui zawk bawk. Chhungkaw pawimawhna an hre chiang em em, kawppui thlan kawngah fimkhur theihtawpin an fimkhur thin. An kawppui turte chu an thlahtute atang rengin eng ang mize pu nge an nih tih nasa takin an chhui thin a. Kutkem nei te, thatchhia chhungkua te, mi kamtam te, mi nunrawng leh phungzawl neih thinte hi nupui pasalah an duh ngai lo. Hmeichhe khawsak tha, taima leh la deh thiam kha tehfung pawimawh tak a ni bawk.

Hetiang taka chhungkaw din kawngah an fimkhur avang hian kan pi leh pute hun lai khan nupa inthen an awm zen zen lo. Tunah erawh mihring kan pung zel a, kan in chiahpiah tial tial a, nupui pasal zawn kawngah pawh kan duh tui lo tial tial a, tawn sabawpa intawng, innei ta mai lah kan tam. Inneih kan sam ang bawkin inthen lah kan sam. Karah fate an lo piang a, chung naupang pawisawi lote chu fahrahah kan siam ta thin a ni. Mizo hnam kan la tam loh ngaihtuahin fahrah chawmna in kan ngah ta viau mai. Ngaihtuah tham tak a ni.

Chhungkaw kehchhia (broken family) atanga chawrchhuak naupang te chu an lo thang lian a, enkawlna tha dawng lo ta na chu sual lam an awn sam bik a, sual khurpuiah an tlu leh mai thin. Veng tin leh khaw tinah hian mi awmtha duh lo, ruihhlo laka fihlim lo leh khawtlang tana mi hnawk tam zawk hi chhungkaw kehchhia atanga chawr chhuak an ni duh khawp mai. Chhungkaw khehchhia tanga chawr chhuak an nih em loh pawhin chhungkaw mumal lo tak, inkaihhruaina mumal lo tak atanga zi chhuak an ni duh khawp mai.

Naupangten kawn dik an zawh a, mi pangngaia an chhuah theihna tura pawimawh ber chu nu leh pa te hi an ni. Nupa an inngeih a, fanua enkawl kawnga an lungrual phawt chuan chu tluka seilenna boruak tha chu naupang tan a awm chuang lo. Kan thiante nupa chu kum sawm an innei tawh a, fa pali an nei a, an in hrethiam tawlh tawlh emaw tih tur an ni. Tum khat pawh an pa chuan an nu hnenah, “Engah nge hmanah khan kan lo inneih loh?” a ti a ni. Chutiang taka nupa inkungkaihna tha kara seilian naupangte chu an vannei ngawt mai.

Chutih rualin nupa inlungrual lo, tawngkam chhe tak leh hlawk tak taka inhau reng mai kara seilian naupangte hi an vanduai ngawt mai. Chutiang boruak kara seilian naupangte chu an rilru a chiai a, an nun a ruak a, mahni inrintawkna an tlachham a, an tihsual ni miah loah rilru hliampui an tuar fo thin. Chu nun ruak chuan pawn lamah hlimna a zawntir a, chhungkaw boruak hrehawm tlansanin pawn lamah hun an hmang tam tial tial a, sualnain a nangching leh mai thin.

Duhthusamah chuan nu ber hian in chhung hi uap tlat mai se, kohhran leh khawtlangah pawh inhmang lutuk lo se, an fate pawhin ina awm nuam an ti ang a, an chhuak lo nge nge ang. Nu ber len cheh tak, vak de de reng mai chu an fate pawh an vak de de duh khawp mai. Vai kan tihte hi keini Mizote aia a let za chuanga tam an ni a, an tam ngaihtuahin vaiho zingah hian drug addict leh zu ngawlvei hi an tam lo viauin a lang. A chhan pakhat nia lang chu- vai nu chuan in chhung an uap hneh a, an pasal fanaute rawngbawl chu an hna pui berah an ngai a, chumi atan chuan an inpumpek tawp mai a, an fate pawhin kawng dik an zawh phah nge nge niin a lang.

Mizo pa pakhat, fa enkawl kawnga hlawhtling tak chu an chhungkaw hlawhtlinna thuruk an zawt a, chuta a chhanna chu: “Kei hi chuan chuti takin ka thawh hlawk lo. Kohhran leh khawtlang thilah inhmanna apui ka ngah a, kan nu hi chu zanah a chhuak ngai lo. Kan fate men chen chen, an lehkha zir chen chen hi a menpui mai thin,” a ti. Kohhran leh khawtlangah inhmangin, rawngbawlna hming chhalin feh chhuak fo mah ila, kan faten nun sual an lo bawl hlauh si chuan kan rawngbawlnaah kan hlawhchham a va ni mai awm em?

Tin, tunlai khawvelah rualelna a nasa tial tial a, sum leh paiah kan intlansiak nasa tial tial a, nu leh pa tam takin an thlakhlelh ber chu sum a ni. Sum hmuhna tur a nih phawt chuan kan fate chu kan chhuahsan lawng lawng a, awmpuite kutah kan dah lawp lawp a. Sum leh pai kan ngah a, in leh loah kan ngelngheh bawk chuan thil hi fel duak turah kan ngaite pawh a ni mahna. Mahse, sum leh pai hian thil engkim hi a ching fel thei bik hauh lo. Sum leh pai ngahin, RCC in ropui takah cheng mah ila, kan faten veng tlabirha zu zuar in an ngainat zawk tlat chinah chuan nuam kan ti tawh chuang lo ang. Khum dup nuam takah kan inlet kan inlet ang a, zing khawvar ar khuan thlengin rilru hahin kan hui pap pap mai ang tih hlauhawm tak a ni.

Thuhriltu ropui Bill Grahma-a chuan, “Kan enkawl hman loh kan fate thluka hlu hi thil dang engmah a awm lo,” a ti a. Van thlen thlenga kan chhawm theih tur awm chhun kan fate tan hian hun pe tam i la, thil dang zawng aiin chhungkaw nun hi i ngaihlu thar leh ang u.