Khawvelah hian lal ram ropui tak tak te, civilization ropui tak tak te a lo ding tawh thin a. Chung lal ram ropui takte chu chhan hrang hrang avangin an boral zo ta. Greek ram ropui tak te, Rom lal ram ropui tak te chu thawnthu mai an chang zo ta. A hun laia sipai General ropui leh huaisen, khawvel pum pui hneh tumtu Alexander Ropui-a te, Nepoleon Bonaparte te, Hitler-a te meuh pawh leilungah an thamral ta.

British historian ropui, lehkhabu tam tak ziaktu Arnold Toynbee chuan khawvel acivilization ropui tak takte tlukchhiat chhan chu hmelmate beihna vang ni lovin, an chhungril nun chhiatna (moral degradation)-in a ei chhiat a ni a ti mauh mai. Keini Mizote pawh hi kan inenfiah a tul khawp mai. Mi thahnemngaite’n kan chhungril nun siam that lehna (moral reformation) chungchang an tlangaupui thin, bengkhawn erawh a hlawh lutuk lem lo. Pawn lam lang theiah hian hma sawnin, thang uak uak mah ila, kan chhungril nun a chhiat telh telh si chuan, chu chuan pan chhia angin min ei na tial tial ang a, a tawpah tho leh tur awm loin thing bul kar tluk ang maiin kan pum tluk rup mai ang tih pawh a hlauhawm hlel lo e.

He Mizo hnam hi Chakma chim ral vang te, thlang kawrvai chim ral vang te, Tuikuk/Takam inthlahpun chak vang te, kan ram min chuhpui vangte hian kan boral ka ring lo. Kan boral dawn a nih pawhin dikna mausama chintawk nei lek loa kan duham vang te, hnam rohlu tur project tha tak takte pawh tihlamzuih duh khawpa kan ei ruk nasat vang te, a loa luata mahni hma kan sial vang te a ni ngei ang. Chhungril nun thatna (morality)-in a kiansan tawh mihring chuan tihhreh a nei tawh lo a, ei ruk a hreh lo a, mi tlawn a hreh lo a, ze thup a thiam em em bawk. A tana mi tangkai tur lakah chuan a inphah hniam peih em em a, a tana tangkaina nei lo lakah erawh ui puar koh ang vang vang a ni. Chutiang mihring chuan lehkha a thiam san poh leh a vertherna a sang a, a hnathawh a len poh leh a ei ru lian a ni mai.

Chhungril nun thatna (morality)-a kan chim chin hi teh theih ni ta se, kan chim chin hi a sang lo viau mai thei. Mi thenkhat fiamthuin, “Mizorama politician hlawhtling ni tur chuan dawt sawi thiam a tawk lo a, mahni dawt sawi sawi mam thiam nih a ngai tawh,” an han ti tawl maite hi a beidawnthlak rum rum mai. Kan ram hruaitute hi dawt sawi mai duh tawk lo, dawtsawi sawi mam thiam an nih fur mai chuan khua a var mawh âwm teh e. Mipui nawlpui pawh hi eng kanni bik lo mai thei. Tumah hi kan inring tak tak lo ni maiin a lang. Bazarah kal ila, eng kurtai pawh lo zuar se, ‘Lungleng kurtai’ a ni vek mai. A leitu hian Lungleng kurtai a nih ka ring tak tak lo a, a zuartu lahin ka rin tak tak pawha ring tak tak chuang lo. Meng leh meng hi dawtvar kan inhrilh suau suau a ni ber e.

Kan rama thil pawi tak mai chu, kan ram rohlu tur hmasawnna project pawimawh tak takte tihhlawhtlin a bar kan nei lo hi a ni. Hydel project pawh kan ngah narawh e. Bairabi kan ti, Tuivai kan ti, Tuirini, Tuirial, Kau Tlabung, Miacham…. heng kan hydel project zinga a zahve chauh pawh hi tipuitling ila power-ah chuan kan intodelh tawh ngei ang. Kan project hlawhchhamna chhan hi central-in sum min pek tlem vang emaw, a hun taka sum kan hmuh theih loh vangte chu ni se thuhran a ni a. Mahse, chutiang vang pawh ni lo, ei ruk nasat vang leh uchuak taka compensation inpek nasat vanga kan project lian pui pui a han thuanawp leh ringawt mai thin hi a pawi a ni.

Kuttlingloa sum lakluhte hi kan hreh lo mai ni loin, a zawnin kan zawng ta emaw tih mai tur a ni. Tunah hian Mizoram khawthlang tawp atanga chhim tawp thleng National Highway-306 four lane zauh hna chu kalpui mek a ni a, he kawngpui laih zauh vang hian mi tam takin in leh lo an chân dawn niin a lang a, chung mite chuan an phu tawk ang zelin zangnadawmna (compensation) an dawng bawk a, an demawm miah lo.

Chutih laiin he khawngpuiin a paltlang dawn tih an hriat vanga rampalailenga ram neih lo tum ve ringawt, periodic patta neih tuma phe char char an lo awm leh thin. Tun hnaia National Highways and Infrastructure Development Corporation Ltd. Survey-a a lan danin Kolasib khawpui huam chhung, Thingdawl, Bilkhawthir leh Kawnpui Town area te hi National Highway kawng zauh tur hian a paltlang ngei dawn niin a lang a. Mahse, heng town area huam chhungah hian periodic patta neih phal a ni lo. Heti chung hian mi fing bengvar tak tak, a ngaihna hria, thiltithei bawk site chuan heng lai hmunah hian periodic patta an dil ta chum chum mai a, Kolasib Settlement Office chuan periodic patta dilna hi tun hnaiah 165 ngawt a dawng ta a ni. Periodic patta dil phal lohna hmuna an dil mah tih tawh laiin, Settlement office lam lahin thu an hmuh avangin heng dilna zozaite hi an hnawl ngam bawk si lo. A diltu tam zawk hi Aizawl lam mi an la ni zui.

Kan kristianna te, kan sakhawmina te, kan lehkhathiamna te, ziak leh chhiar thiam tam ber kan nihna te hian chhungril thatna min thlen zo lo a nih chuan, eng hian nge maw min siam tha tawh chuang ang le? Lo dawn ve teh.